Shigella outbreak Wayanad
കൽപ്പറ്റ: വയനാട്ടിൽ സ്കൂൾ കുട്ടികൾക്ക് ഷിഗല്ല രോഗബാധ സ്ഥിരീകരിച്ച പശ്ചാത്തലത്തിൽ ജില്ലയിൽ പ്രതിരോധ പ്രവർത്തനങ്ങൾ ഊർജിതമാക്കി. സാഹചര്യം വിലയിരുത്താൻ കൃഷിമന്ത്രി ടി. സിദ്ദിഖിന്റെ നേതൃത്വത്തിൽ ഇന്ന് രാവിലെ ഉന്നതതലയോഗം ചേർന്നു. കൂടുതൽ ജാഗ്രതയോടെയുള്ള പ്രവർത്തനങ്ങൾ നടത്താൻ യോഗത്തിൽ നിർദേശം നൽകിയിട്ടുണ്ട്. ജില്ലയിലെ സ്ഥിതിഗതികൾ നേരിട്ട് വിലയിരുത്താനായി ആരോഗ്യമന്ത്രി കെ. മുരളീധരൻ ഇന്ന് വൈകിട്ടോടെ വയനാട്ടിലെത്തും.
കോളിയാടി മാർ ബസേലിയോസ് സ്കൂളിലെ വിദ്യാർത്ഥികൾക്കാണ് ഷിഗല്ല സ്ഥിരീകരിച്ചത്. നിലവിൽ 25 വിദ്യാർത്ഥികൾ സുൽത്താൻ ബത്തേരി താലൂക്ക് ആശുപത്രിയിലും 38 വിദ്യാർത്ഥികൾ സ്വകാര്യ ആശുപത്രികളിലും ചികിത്സയിലാണ്. ആരുടെയും നില ഗുരുതരമല്ലെന്നും എല്ലാവരുടെയും ആരോഗ്യനില തൃപ്തികരമാണെന്നും ആരോഗ്യവകുപ്പ് അറിയിച്ചു. സ്കൂൾ തുറന്നതിന് പിന്നാലെ കുട്ടികൾക്ക് പനിയും ഛർദിയും വയറിളക്കവും അനുഭവപ്പെടുകയായിരുന്നു. തുടർന്ന് നടത്തിയ പരിശോധനയിലാണ് രോഗം സ്ഥിരീകരിച്ചത്.
READ NEWS: ഈ ലക്ഷണങ്ങളുണ്ടോ? അവഗണിക്കരുത്, ഷിഗെല്ലയാകാം; പൊതുജനങ്ങൾ ജാഗ്രത പാലിക്കണമെന്ന് ആരോഗ്യവകുപ്പ്
കോളിയാടി സ്കൂളിലെ കുട്ടികളുമായി സമ്പർക്കം പുലർത്തിയ 14 പേർക്ക് കൂടി പുതിയതായി രോഗലക്ഷണം ഉണ്ടായിട്ടുണ്ട്. നിലവിൽ മുന്നൂറിലധികം കുട്ടികൾ ആരോഗ്യവകുപ്പിന്റെ പ്രത്യേക നിരീക്ഷണത്തിലാണ്. രോഗം ബാധിച്ച കുട്ടികളുടെ സഹോദരങ്ങൾ പഠിക്കുന്ന സ്കൂളുകളിൽ പ്രത്യേക മെഡിക്കൽ സംഘത്തെ നിയോഗിക്കും. രോഗം ഭേദമായി ഡിസ്ചാർജ് ചെയ്ത കുട്ടികളിൽ ചിലർ വീണ്ടും ലക്ഷണങ്ങൾ പ്രകടിപ്പിച്ചതിനാൽ അവർക്ക് പ്രത്യേക നിരീക്ഷണം ഏർപ്പെടുത്തും.
പ്രതിരോധ പ്രവർത്തനങ്ങളുടെ ഭാഗമായി ജില്ലയിലെ കിണറുകൾ സ്പെഷ്യൽ ഡ്രൈവിലൂടെ അടിയന്തരമായി ക്ലോറിനേഷൻ നടത്തും. സ്കൂളുകളിൽ നിന്ന് ജലപരിശോധന നടത്തിയതിൽ എന്തെങ്കിലും വീഴ്ച വന്നിട്ടുണ്ടോ എന്ന് പരിശോധിക്കാൻ മന്ത്രി നിർദേശം നൽകി. കോഴിക്കോട് മെഡിക്കൽ കോളേജിൽ നിന്നുള്ള പ്രത്യേക മെഡിക്കൽ സംഘത്തെ നിലവിൽ വയനാട്ടിൽ വിന്യസിച്ചിട്ടുണ്ട്. മലിനമായ വെള്ളത്തിലൂടെയും ഭക്ഷണത്തിലൂടെയും പടരുന്ന ബാക്ടീരിയൽ അണുബാധയായതിനാൽ പൊതുജനങ്ങൾ അതീവ ജാഗ്രത പാലിക്കണമെന്ന് ആരോഗ്യവകുപ്പ് നിർദേശിച്ചു.
