Canadian passport validity Alberta separation
ഒട്ടാവ: കാനഡയിൽ നിന്ന് വേർപിരിയുന്നതിനെക്കുറിച്ച് ആൽബർട്ട പ്രവിശ്യയിൽ ഈ വർഷം ഒക്ടോബർ 19-ന് റഫറണ്ടം (ജനഹിതപരിശോധന) നടക്കാനിരിക്കെ പൗരത്വത്തെച്ചൊല്ലി തർക്കം മുറുകുന്നു. പുതിയ രാജ്യം രൂപീകരിക്കപ്പെട്ടാൽ ജനങ്ങൾക്ക് നിലവിലെ കനേഡിയൻ പൗരത്വവും പാസ്പോർട്ടും തുടർന്ന് ഉപയോഗിക്കാൻ സാധിക്കുമോ എന്നതിനെച്ചൊല്ലിയാണ് ആശങ്ക ഉയരുന്നത്. വേർപിരിയലിനെ അനുകൂലിക്കുന്ന സംഘടനകൾ ജനങ്ങൾക്ക് ഇരട്ട പൗരത്വം ലഭിക്കുമെന്ന് അവകാശപ്പെടുന്നുണ്ടെങ്കിലും, കാനഡയുടെ ഔദ്യോഗിക സമ്മതമില്ലാതെ ഇത് സാധ്യമല്ലെന്നാണ് ഭരണഘടനാ വിദഗ്ധർ ചൂണ്ടിക്കാണിക്കുന്നത്. വേർപിരിയലിനായി വാദിക്കുന്ന ‘ആൽബർട്ട പ്രോസ്പെരിറ്റി പ്രോജക്റ്റ്’ പോലുള്ള സംഘടനകൾ പറയുന്നത്, ഒരിക്കൽ ലഭിച്ച കനേഡിയൻ പൗരത്വം നഷ്ടമാകില്ലെന്നാണ്. ജനങ്ങൾക്ക് കനേഡിയൻ പാസ്പോർട്ടും ഒപ്പം പുതിയ ആൽബർട്ട പാസ്പോർട്ടും ഒരേസമയം കൈവശം വയ്ക്കാമെന്നും ഇവർ വാദിക്കുന്നു. എന്നാൽ നിയമ വിദഗ്ധരായ ജെറാർഡ് കെന്നഡി, എറോൾ മെൻഡിസ് എന്നിവർ ഈ വാദത്തെ പൂർണ്ണമായും തള്ളിക്കളയുന്നു. 2000-ൽ രാജ്യം പാസാക്കിയ ‘ക്ലാരിറ്റി ആക്ട്’ പ്രകാരം, പൗരത്വം ഉൾപ്പെടെയുള്ള നിർണായക കാര്യങ്ങളിൽ അന്തിമ തീരുമാനം എടുക്കേണ്ടത് കാനഡ സർക്കാരാണ്.
വോട്ടെടുപ്പിൽ വേർപിരിയലിന് ഭൂരിപക്ഷം ലഭിച്ചാൽ പോലും, പിന്നീട് നടക്കുന്ന ദീർഘമായ രാഷ്ട്രീയ-നിയമ ചർച്ചകളിലൂടെ മാത്രമേ പൗരത്വത്തിന്റെ കാര്യത്തിൽ അന്തിമ വ്യക്തത വരികയുള്ളൂ. ഒക്ടോബറിൽ നടക്കുന്നത് ഒരു ചോദ്യത്തെക്കുറിച്ചുള്ള പ്രാഥമിക വോട്ടെടുപ്പ് മാത്രമാണെന്ന് കഴിഞ്ഞ മാസം പ്രധാനമന്ത്രി മാർക്ക് കാർണി വ്യക്തമാക്കിയിരുന്നു. നിലവിൽ കാനഡ ഇരട്ട പൗരത്വം അനുവദിക്കുന്നുണ്ടെങ്കിലും, ഒരു പ്രവിശ്യ വേർപിരിഞ്ഞു പോകുമ്പോൾ ഈ ആനുകൂല്യം തുടർന്ന് നൽകണമോ എന്ന് തീരുമാനിക്കാനുള്ള അധികാരം കാനഡയ്ക്കുണ്ട്. ചർച്ചകൾ പരാജയപ്പെട്ടാൽ ആൽബർട്ടയിലെ ജനങ്ങൾക്ക് കനേഡിയൻ പാസ്പോർട്ട് നഷ്ടമായേക്കാം. കാനഡയുടെ പൂർണ്ണ സമ്മതമില്ലാതെ രൂപീകരിക്കുന്ന പുതിയ രാജ്യത്തിന്റെ പാസ്പോർട്ടിന് ലോകരാജ്യങ്ങൾ അംഗീകാരം നൽകിയില്ലെങ്കിൽ, ജനങ്ങൾക്ക് ഭാവിയിൽ കടുത്ത യാത്രാ നിയന്ത്രണങ്ങൾ നേരിടേണ്ടി വരുമെന്നും വിദഗ്ധർ മുന്നറിയിപ്പ് നൽകുന്നു.
