Canada fast track visa AI workers
ഒട്ടാവ: ആർട്ടിഫിഷ്യൽ ഇന്റലിജൻസ് (AI) മേഖലയിലെ ആഗോള പ്രതിഭകളെ രാജ്യത്തേക്ക് ആകർഷിക്കാൻ ലക്ഷ്യമിട്ട് അതിവേഗ വർക്ക് പെർമിറ്റ് പദ്ധതിയുമായി കനേഡിയൻ ഫെഡറൽ സർക്കാർ. പുതിയ ‘എഐ വർക്കർ സ്ട്രീം’ വഴി അപേക്ഷ സമർപ്പിച്ച് വെറും 20 ദിവസത്തിനുള്ളിൽ വിസ നടപടികൾ പൂർത്തിയാക്കി വർക്ക് പെർമിറ്റ് കൈയ്യിൽ കിട്ടുന്ന രീതിയിലാണ് പദ്ധതി വിഭാവനം ചെയ്യുന്നത്. സാധാരണയായി ഒരു കനേഡിയൻ വർക്ക് പെർമിറ്റ് ലഭിക്കാൻ രണ്ട് മുതൽ ആറ് മാസം വരെ സമയമെടുക്കുന്ന സ്ഥാനത്താണ് കാനഡയുടെ ഈ അടിയന്തര നീക്കം.
നിലവിലുള്ള ‘ഗ്ലോബൽ ടാലന്റ് സ്ട്രീം’ പദ്ധതിക്ക് കീഴിലാണ് പുതിയ എഐ വിസാ സ്ട്രീം നടപ്പിലാക്കുക. ഇതിലൂടെ തൊഴിലുടമകൾക്ക് ആവശ്യമായ ലേബർ മാർക്കറ്റ് ഇംപാക്ട് അസസ്മെന്റ് പത്ത് ദിവസത്തിനകവും, വർക്ക് പെർമിറ്റ് അപേക്ഷകൾ തുടർന്നുള്ള പത്ത് ദിവസത്തിനകവും പ്രോസസ്സ് ചെയ്ത് നൽകും. കൂടാതെ, ഈ വിസ വഴി കാനഡയിലെത്തുന്ന എഐ വിദഗ്ധർക്ക് ഭാവിയിൽ സ്ഥിരതാമസം എളുപ്പമാക്കാനുള്ള പ്രത്യേക സഹായങ്ങളും സർക്കാർ വാഗ്ദാനം ചെയ്യുന്നുണ്ട്. എന്നാൽ ഇതിലേക്ക് അപേക്ഷിക്കാനുള്ള കൃത്യമായ യോഗ്യതകളും പദ്ധതി എന്നുമുതൽ പ്രാബല്യത്തിൽ വരുമെന്ന വിവരങ്ങളും വരും ദിവസങ്ങളിലേ പുറത്തുവിടൂ.
കാനഡയുടെ ദീർഘകാല സാമ്പത്തിക വളർച്ച ലക്ഷ്യമിട്ട് പ്രധാനമന്ത്രി മാർക്ക് കാർണി പുറത്തിറക്കിയ ‘AI for All’ സ്ട്രാറ്റജിയുടെ ഭാഗമായാണ് ഈ വിപ്ലവകരമായ പ്രഖ്യാപനം. അടുത്ത അഞ്ച് വർഷത്തിനുള്ളിൽ എഐ മേഖലയിലൂടെ 2.5 ലക്ഷം പുതിയ തൊഴിലവസരങ്ങൾ സൃഷ്ടിക്കുകയാണ് ഇതിന്റെ പ്രധാന ലക്ഷ്യം. ഇതിലൂടെ രാജ്യത്തിന്റെ സാമ്പത്തിക രംഗത്ത് 200 ബില്യൺ ഡോളറിന്റെ അധിക വളർച്ചയും സർക്കാർ പ്രതീക്ഷിക്കുന്നുണ്ട്. നിലവിൽ കാനഡയിലെ കമ്പനികളിൽ വെറും 12 ശതമാനം മാത്രമുള്ള എഐ ഉപയോഗം വരും വർഷങ്ങളിൽ 60 ശതമാനമായി ഉയർത്താനും രാജ്യം ലക്ഷ്യമിടുന്നു. ടെക് പ്രൊഫഷണലുകൾക്ക് കാനഡയിലേക്ക് കുടിയേറാൻ പറ്റിയ ഏറ്റവും സുവർണ്ണാവസരമാണിത്.
