Actor Salim Kumar hospitalized Kochi
കൊച്ചി: പ്രശസ്ത ചലച്ചിത്ര നടനും ദേശീയ പുരസ്കാര ജേതാവുമായ സലിം കുമാറിനെ പെട്ടെന്നുണ്ടായ ആരോഗ്യപ്രശ്നങ്ങളെ തുടർന്ന് ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചു. കൊച്ചിയിലെ അമൃത ആശുപത്രിയിലാണ് അദ്ദേഹത്തെ പ്രവേശിപ്പിച്ചിരിക്കുന്നത്. ആരോഗ്യസ്ഥിതി ഗുരുതരമായതിനെ തുടർന്ന് നിലവിൽ അദ്ദേഹത്തെ വെന്റിലേറ്റർ സഹായത്തോടെയാണ് തീവ്രപരിചരണ വിഭാഗത്തിൽ ചികിത്സിക്കുന്നതെന്നാണ് ആശുപത്രി വൃത്തങ്ങളിൽ നിന്നും ലഭിക്കുന്ന വിവരം.
വിദഗ്ധ ഡോക്ടർമാരുടെ പ്രത്യേക സംഘം അദ്ദേഹത്തിന്റെ ആരോഗ്യനില സൂക്ഷ്മമായി നിരീക്ഷിച്ചു വരികയാണ്. ആവശ്യമായ അടിയന്തര പരിശോധനകളും തുടർചികിത്സകളും പുരോഗമിക്കുകയാണെന്നും, കൂടുതൽ വിവരങ്ങൾ മെഡിക്കൽ ബുള്ളറ്റിനിലൂടെ പുറത്തുവിടുമെന്നും അധികൃതർ അറിയിച്ചു. നടൻ ദിലീപ് മുഖ്യവേഷത്തിലെത്തുന്ന ‘ഭ.ഭ.ബ’ എന്ന ചിത്രത്തിലാണ് സലിം കുമാർ ഏറ്റവും ഒടുവിലായി വേഷമിട്ടത്.
വർഷങ്ങളായി കടുത്ത കരൾ സംബന്ധമായ അസുഖങ്ങളോട് പോരാടുന്ന താരം മുൻപ് കരൾ മാറ്റിവെക്കൽ ശസ്ത്രക്രിയയ്ക്കും വിധേയനായിരുന്നു. രോഗമുക്തി നേടി പിന്നീട് സിനിമകളിലും പൊതുവേദികളിലും അദ്ദേഹം വീണ്ടും സജീവമായിരുന്നു. പ്രിയതാരത്തിന്റെ പെട്ടെന്നുള്ള ആരോഗ്യപ്രതിസന്ധി മലയാള സിനിമാ ലോകത്തെയും ആരാധകരെയും ഒരേപോലെ ആശങ്കയിലാഴ്ത്തിയിട്ടുണ്ട്. താരം എത്രയും വേഗം സുഖം പ്രാപിക്കട്ടെ എന്ന പ്രാർത്ഥനയിലാണ് സിനിമാ ലോകം.
Actor Salim Kumar hospitalized Kochi
