YouTuber Rachna Gurjar home tour robbery
ശിവപുരി: സോഷ്യൽ മീഡിയയിൽ ലൈക്കിനും ഫോളോവേഴ്സിനും വേണ്ടി സ്വന്തം വീടും സമ്പത്തും അമിതമായി പ്രദർശിപ്പിച്ച യൂട്യൂബർക്ക് ഒടുവിൽ എട്ടിന്റെ പണി കിട്ടി. ആഭരണങ്ങളും പണവും കാണിച്ച് ‘ഹോം ടൂർ’ വീഡിയോ പങ്കുവെച്ച യുവതിയുടെ വീട്ടിൽ നിന്നും ലക്ഷക്കണക്കിന് രൂപയുടെ മൂല്യമുള്ള വസ്തുക്കൾ കള്ളന്മാർ കവർന്നു. മധ്യപ്രദേശിലെ ശിവപുരി ജില്ലയിലെ മോഹാനി ഗ്രാമത്തിലാണ് ഈ വിചിത്രമായ സംഭവം നടന്നത്. പ്രമുഖ സോഷ്യൽ മീഡിയ ഇൻഫ്ലുവൻസറായ രചന ഗുർജാറിന്റെ വീട്ടിലാണ് കവർച്ച നടന്നത്.
ശനിയാഴ്ച പുലർച്ചെ രണ്ട് മണിയോടെയാണ് അജ്ഞാതരായ മോഷ്ടാക്കൾ രചനയുടെ വീട്ടിൽ അതിക്രമിച്ചു കയറിയത്. ഈ സമയത്ത് രചനയും കുടുംബവും വീട്ടിൽ ഗാഢനിദ്രയിലായിരുന്നു. വീടിന് ചുറ്റുമുള്ള കമ്പിവേലി മുറിച്ചുമാറ്റിയാണ് നാലംഗ മോഷ്ടാക്കൾ അകത്തുകടന്നത്. തുടർന്ന് വീട്ടുകാരെ അവർ ഉറങ്ങിക്കിടന്ന മുറിയിൽ പുറത്തുനിന്ന് പൂട്ടിയിട്ടു. അതിനുശേഷമാണ് വീട്ടിനുള്ളിൽ പരക്കെ തിരച്ചിൽ നടത്തി കവർച്ച നടത്തിയത്.
ഏകദേശം 8 ലക്ഷം മുതൽ 10 ലക്ഷം രൂപ വരെ വിലമതിക്കുന്ന സ്വർണ്ണ, വെള്ളി ആഭരണങ്ങളും കള്ളന്മാർ കൊണ്ടുപോയി. ഒരു ലക്ഷത്തിലധികം രൂപയുടെ കാഷും ഇതിൽ ഉൾപ്പെടുന്നു. വിലപിടിപ്പുള്ള വസ്തുക്കൾക്ക് പുറമെ വീട്ടിൽ സൂക്ഷിച്ചിരുന്ന എനർജി ഡ്രിങ്കുകൾ അടങ്ങിയ ഒരു പെട്ടിയും കള്ളന്മാർ മോഷ്ടിച്ചതായി വീട്ടുകാർ പറഞ്ഞു. മോഷ്ടാക്കളുടെ മുഖം ക്യാമറയിൽ പെടാതിരിക്കാൻ സിസിടിവി ക്യാമറകളുടെ ആംഗിളുകൾ ഒരു വടികൊണ്ട് അവർ മാറ്റിയിരുന്നു.
ഒരു ലക്ഷത്തിലധികം ഫോളോവേഴ്സുള്ള രചന അടുത്തിടെ തന്റെ ആഭരണങ്ങളും പണവും കാണിക്കുന്ന വീഡിയോകൾ പോസ്റ്റ് ചെയ്തിരുന്നു. ഒരു വീഡിയോയിൽ ആഭരണങ്ങൾ മേശപ്പുറത്ത് വച്ച് പ്രദർശിപ്പിക്കുന്നതായും കാണാം. കള്ളന്മാർ ഈ വീഡിയോകൾ കണ്ട് വീടിന്റെ ഘടന മനസ്സിലാക്കിയാകാം മോഷണം ആസൂത്രണം ചെയ്തതെന്ന് പോലീസ് സംശയിക്കുന്നു. സംഭവത്തിൽ നർവാർ പോലീസ് സ്റ്റേഷനിൽ പരാതി നൽകിയിട്ടുണ്ട്. പ്രതികൾക്കായി പോലീസ് അന്വേഷണം ഊർജ്ജിതമാക്കി.
Madhya Pradesh viral YouTuber house theft
