ലണ്ടൻ: ലണ്ടൻ നഗരത്തിലെ മലയാളി സമൂഹവും പ്രാദേശിക പോലീസും തമ്മിലുള്ള പരസ്പര വിശ്വാസവും സഹകരണവും വർദ്ധിപ്പിക്കുന്നതിനായി പ്രത്യേക സംവാദ പരിപാടി സംഘടിപ്പിക്കുന്നു. ലണ്ടൻ ഒന്റാരിയോ മലയാളി അസ്സോസിയേഷന്റെയും (LOMA) ലണ്ടൻ പോലീസ് സർവീസിന്റെയും സംയുക്ത ആഭിമുഖ്യത്തിൽ ‘ബിൽഡിംഗ് കോൺഫിഡൻസ് & ട്രസ്റ്റ്: എ കമ്മ്യൂണിറ്റി ഡയലോഗ് ഓൺ പോലീസിംഗ്’ എന്ന പേരിൽ ജൂൺ 27 ശനിയാഴ്ചയാണ് ഈ പരിപാടി നടക്കുക. ലണ്ടൻ ഡൗൺടൗണിലെ Dundas Street-ലുള്ള പോലീസ് ആസ്ഥാനത്ത് ഉച്ചയ്ക്ക് 12 മണി മുതൽ പൊതുജനങ്ങൾക്ക് ഈ സമ്പർക്ക പരിപാടിയിൽ പങ്കെടുക്കാവുന്നതാണ്.
കുടിയേറ്റക്കാരായ മലയാളി സമൂഹത്തിന് കനേഡിയൻ നിയമവ്യവസ്ഥയെയും പോലീസ് നടപടിക്രമങ്ങളെയും കുറിച്ച് കൃത്യമായ അവബോധം നൽകുക എന്ന ലക്ഷ്യത്തോടെയാണ് ഈ ചർച്ച സംഘടിപ്പിച്ചിരിക്കുന്നത്. വാഹനങ്ങൾ പോലീസ് തടയുമ്പോൾ പാലിക്കേണ്ട സുരക്ഷാ മാനദണ്ഡങ്ങൾ, ഉദ്യോഗസ്ഥരുമായി എങ്ങനെ കൃത്യമായി ആശയവിനിമയം നടത്തണം തുടങ്ങിയ പ്രായോഗിക കാര്യങ്ങൾ പരിപാടിയിൽ വിശദീകരിക്കും. കാനഡയിലെ നിയമപാലന രീതികളെക്കുറിച്ച് പുതുതായി എത്തിയവർക്കുള്ള ആശങ്കകൾ പരിഹരിക്കാൻ ഈ സെഷൻ സഹായകരമാകും.
അടിയന്തര സാഹചര്യങ്ങളിൽ 911 സേവനം എങ്ങനെ ഫലപ്രദമായി ഉപയോഗിക്കാമെന്നും, പോലീസിന് കൃത്യമായ വിവരങ്ങൾ എങ്ങനെ കൈമാറാമെന്നും ഈ പരിപാടിയിലൂടെ വിശദമായി മനസ്സിലാക്കാൻ സാധിക്കും. കൂടാതെ, സമീപകാലത്ത് വർദ്ധിച്ചുവരുന്ന വെറുപ്പ് ഉളവാക്കുന്ന സംഭവങ്ങൾ (Hate Incidents), വിദ്വേഷ കുറ്റകൃത്യങ്ങൾ (Hate Crimes) എന്നിവയെ എങ്ങനെ തിരിച്ചറിയാമെന്നും അവ സുരക്ഷിതമായി പോലീസിൽ എങ്ങനെ റിപ്പോർട്ട് ചെയ്യാമെന്നും ഈ സംവാദത്തിൽ ചർച്ച ചെയ്യും. സുരക്ഷിതമായ ഒരു സാമൂഹിക അന്തരീക്ഷം സൃഷ്ടിക്കുന്നതിൽ കമ്മ്യൂണിറ്റിയുടെ പങ്കും ഇവിടെ ചർച്ചയാകും.
ലണ്ടൻ പോലീസ് ആസ്ഥാനത്ത് (601 Dundas Street, London, ON) നടക്കുന്ന ഈ പരിപാടിയിലേക്ക് പ്രവേശനം പൂർണ്ണമായും സൌജന്യമാണ്. പങ്കെടുക്കുന്നവർക്കായി ലഘുഭക്ഷണവും കുടിവെള്ളവും ക്രമീകരിച്ചിട്ടുണ്ട്. കമ്മ്യൂണിറ്റി പോലീസിംഗിന്റെ ഭാഗമായി പ്രാദേശിക ജനവിഭാഗങ്ങളുമായി അടുത്ത ബന്ധം സ്ഥാപിക്കുന്നതിനായി ഒരുക്കുന്ന ഈ സംവാദത്തിലേക്ക് എല്ലാ മലയാളി കുടുംബങ്ങളെയും സ്വാഗതം ചെയ്യുന്നതായി സംഘാടകർ അറിയിച്ചു.
