ഹാലിഫാക്സ്: കാനഡയിലെ കടുത്ത ജീവിതച്ചെലവ് പ്രതിസന്ധിയെത്തുടർന്ന് കനേഡിയൻ കുടുംബങ്ങളുടെ ഗാർഹിക കടബാധ്യത വരുമാനത്തേക്കാൾ വൻതോതിൽ ഉയരുന്നതായി റിപ്പോർട്ട്. സ്റ്റാറ്റിസ്റ്റിക്സ് കാനഡ പുറത്തുവിട്ട ഏറ്റവും പുതിയ കണക്കുകൾ പ്രകാരം തുടർച്ചയായ ആറാം പാദത്തിലും ജനങ്ങളുടെ കടബാധ്യത കുതിച്ചുയരുകയാണ്. നിലവിൽ രാജ്യത്തെ ഗാർഹിക വരുമാനത്തിന്റെ ഓരോ ഡോളറിനും ഏകദേശം 1.80 ഡോളർ കടമുണ്ടെന്നാണ് ഇമിഗ്രേഷൻ കേന്ദ്രങ്ങളെയും പ്രവാസികളെയും ഒരുപോലെ ആശങ്കപ്പെടുത്തുന്ന ഈ പുതിയ കണക്കുകൾ സൂചിപ്പിക്കുന്നത്.
ഉയർന്ന പലചരക്ക് നിരക്കുകൾ, ഇന്ധനവില, തണുപ്പുകാലത്തെ വീട് ചൂടാക്കൽ ചിലവുകൾ എന്നിവയ്ക്കൊപ്പം വാടകയിലുണ്ടായ അമിത വർദ്ധനവുമാണ് സാധാരണക്കാരുടെ സാമ്പത്തിക സ്ഥിതി പൂർണ്ണമായും തകർത്തത്. ജീവിതച്ചെലവ് കുറവാണെന്ന പ്രതീക്ഷയിൽ ഒന്റാറിയോയിൽ നിന്ന് അറ്റ്ലാന്റിക് പ്രവിശ്യയായ നോവ സ്കോട്ടിയയിലേക്ക് കുടിയേറിയ ഹെയ്ലി ബോഡ്ഗനും കുടുംബവും ഉൾപ്പെടെയുള്ള ലക്ഷക്കണക്കിന് കനേഡിയൻമാരാണ് ഇപ്പോൾ കടുത്ത സാമ്പത്തിക പ്രതിസന്ധി നേരിടുന്നത്. മുൻപ് നോവ സ്കോട്ടിയയിൽ പ്രതിമാസം 1,200 ഡോളർ ആയിരുന്ന ശരാശരി വാടക, വെറും നാല് വർഷം കൊണ്ട് നിലവിൽ ഇരട്ടിയിലധികമായി വർദ്ധിച്ചു.
Rentals.ca, Urbanation എന്നിവ സംയുക്തമായി നടത്തിയ പഠനപ്രകാരം അപ്പാർട്ട്മെന്റ്, കോണ്ടോ വാടകകൾക്ക് കാനഡയിൽ ഏറ്റവും കൂടുതൽ ചിലവേറിയ പ്രവിശ്യയായി നോവ സ്കോട്ടിയ മാറിയിരിക്കുകയാണ്. പലചരക്ക് സാധനങ്ങൾ വാങ്ങാൻ പോലും ആളുകൾക്ക് ക്രെഡിറ്റ് കാർഡുകളെ അമിതമായി ആശ്രയിക്കേണ്ടി വരുന്നു. മറ്റ് കനേഡിയൻ പ്രവിശ്യകളെ അപേക്ഷിച്ച് നോവ സ്കോട്ടിയയിലെ നികുതി കഴിഞ്ഞുള്ള ശരാശരി വ്യക്തിഗത വരുമാനം രാജ്യത്തിന്റെ പൊതുശരാശരിയേക്കാൾ 10,000 ഡോളറിലധികം പിന്നിലാണെന്ന് ഡൽഹൗസി യൂണിവേഴ്സിറ്റി മാനേജ്മെന്റ് പ്രൊഫസർ ഡാൻ ഷാ വ്യക്തമാക്കി. ശരാശരി കുടുംബ വരുമാനത്തിൽ ഏകദേശം 25,000 ഡോളറിന്റെ കുറവാണുള്ളത്.
സാധാരണക്കാരായ കുടുംബങ്ങളെ ഈ വലിയ പ്രതിസന്ധിയിൽ നിന്ന് രക്ഷിക്കുന്നതിനായി കനേഡിയൻ സർക്കാർ രാജ്യത്തെ വിവിധ ഉൽപ്പാദന വ്യവസായങ്ങളിൽ പുതിയ നിക്ഷേപങ്ങൾ നടത്തണമെന്ന് പ്രമുഖ റീട്ടെയിൽ അനലിസ്റ്റ് ബ്രൂസ് വിൻഡർ അഭിപ്രായപ്പെട്ടു. തദ്ദേശീയ കമ്പനികൾ ഉൽപ്പാദനക്ഷമത വർദ്ധിപ്പിക്കുന്നതിലൂടെ ഉയർന്ന ലാഭവിഹിതം നേടാനും അത് വഴി ജീവനക്കാരുടെ വേതനം വർദ്ധിപ്പിക്കാനും സാധിക്കും. എങ്കിൽ മാത്രമേ ബാങ്ക് ഓഫ് കാനഡയുടെ പലിശനിരക്ക് വർദ്ധനവും ഭവന പ്രതിസന്ധിയും സൃഷ്ടിച്ച ഈ പണപ്പെരുപ്പക്കയത്തിൽ നിന്നും ജനങ്ങൾക്ക് താൽക്കാലിക ആശ്വാസമെങ്കിലും ലഭിക്കൂ എന്നും സാമ്പത്തിക വിദഗ്ദ്ധർ കൂട്ടിച്ചേർത്തു.
