Insurance claim rejection for non compatible E20 petrol
ന്യൂഡൽഹി: ഇന്ത്യയിൽ പഴയ വാഹനങ്ങൾ ഉപയോഗിക്കുന്ന ലക്ഷക്കണക്കിന് ഡ്രൈവർമാർക്ക് കനത്ത തിരിച്ചടി നൽകിക്കൊണ്ട് പ്രമുഖ ജനറൽ ഇൻഷുറൻസ് കമ്പനിയായ ഐസിഐസിഐ ലോംബാർഡ് രംഗത്ത്. 2023 ഏപ്രിലിന് മുൻപ് നിർമ്മിച്ച ഇ20 ഇന്ധനത്തിന് അനുയോജ്യമല്ലാത്ത വാഹനങ്ങളിൽ ഇത് ഉപയോഗിച്ചതുമൂലം ഉണ്ടാകുന്ന എഞ്ചിൻ തകരാറുകൾക്ക് ഇൻഷുറൻസ് ക്ലെയിം ലഭിക്കില്ലെന്നാണ് കമ്പനി വ്യക്തമാക്കിയത്. തങ്ങളുടെ ഔദ്യോഗിക ബ്ലോഗിലൂടെയാണ് കമ്പനി ഇക്കാര്യം അറിയിച്ചത്.
രാജ്യത്തെ പരിസ്ഥിതി മലിനീകരണം കുറയ്ക്കുന്നതിന്റെ ഭാഗമായി 80 ശതമാനം പെട്രോളും 20 ശതമാനം എഥനോളും അടങ്ങിയ ഇ20 പെട്രോൾ ഇന്ധന മിശ്രിതം ഭാരത സർക്കാർ പമ്പുകളിൽ നിർബന്ധമാക്കിയിട്ടുണ്ട്. പുതിയ വാഹനങ്ങൾക്ക് ഇത് സുരക്ഷിതമാണെങ്കിലും ബിഎസ് 6 ഫേസ് 2 മാനദണ്ഡങ്ങൾ നിലവിൽ വന്ന 2023 ഏപ്രിലിന് മുൻപ് പുറത്തിറങ്ങിയ ഭൂരിഭാഗം കാറുകളും ഇരുചക്ര വാഹനങ്ങളും ഇ20 ഇന്ധനം ഉപയോഗിക്കാൻ അനുയോജ്യമല്ല. വാഹനത്തിന് അനുയോജ്യമല്ലാത്ത ഇത്തരം ഇന്ധനങ്ങൾ ഉപയോഗിക്കുന്നത് വാഹന ഉടമയുടെ ഭാഗത്തുനിന്നുള്ള ‘അശ്രദ്ധ’ അല്ലെങ്കിൽ ‘തെറ്റായ ഉപയോഗം’ ആയി മാത്രമേ ഇൻഷുറൻസ് കമ്പനികൾ കണക്കാക്കൂ. ഇത്തരത്തിലുള്ള പരിശോധനകൾക്ക് ശേഷമായിരിക്കും ക്ലെയിമുകൾ നിരസിക്കുക.
എഥനോൾ അടങ്ങിയ ഇന്ധനം പരിസ്ഥിതിക്ക് നല്ലതാണെങ്കിലും പഴയ എഞ്ചിനുകളിൽ ഇത് വ്യത്യസ്തമായാണ് പ്രവർത്തിക്കുന്നത്. എഥനോളിന് തുരുമ്പെടുപ്പിക്കാനുള്ള ശേഷി കൂടുതലായതിനാൽ ഇത് വാഹനങ്ങളിലെ റബർ സീലുകൾ, ഫ്യൂവൽ ലൈനുകൾ, മറ്റ് എഞ്ചിൻ ഭാഗങ്ങൾ എന്നിവയെ ക്രമേണ നശിപ്പിക്കുകയും മൈലേജ് കുറയ്ക്കുകയും ചെയ്യും. ഈ നാശനഷ്ടങ്ങൾ ഒറ്റ ദിവസം കൊണ്ട് സംഭവിക്കുന്നതല്ല. മറിച്ച് വളരെ പതുക്കെയും ക്രമേണയും ഉണ്ടാകുന്നതുമാണ്. ഇൻഷുറൻസ് പോളിസി നിയമപ്രകാരം ഇത്തരം ‘തുടർന്നുണ്ടാകുന്ന നാശനഷ്ടങ്ങൾ’ സാധാരണ ഇൻഷുറൻസ് പോളിസ പരിരക്ഷയിൽ ഉൾപ്പെടാറില്ല.
ഇ20 പെട്രോൾ ഉപയോഗിക്കുന്നത് വഴി നിങ്ങളുടെ നിലവിലുള്ള കാർ ഇൻഷുറൻസ് പോളിസി റദ്ദാകില്ലെങ്കിലും അത് മൂലമുണ്ടാകുന്ന കെമിക്കൽ കൊറോഷൻ അല്ലെങ്കിൽ എഞ്ചിൻ തകരാറുകൾക്കൊന്നും പണം ലഭിക്കില്ലെന്ന് കമ്പനി ഊന്നിപ്പറഞ്ഞു. സാധാരണയായി ഉപഭോക്താക്കൾ എടുക്കാറുള്ള പ്രത്യേക ‘എഞ്ചിൻ പ്രൊട്ടക്ഷൻ’ കവറുകൾ പോലും വെള്ളം കയറുന്നത് മൂലമോ ഓയിൽ ലീക്കേജ് മൂലമോ ഉണ്ടാകുന്ന തകരാറുകൾക്ക് മാത്രമാണ് ബാധകമാകുന്നത്. അതിനാൽ പോളിസി രേഖകളിലെ ഒഴിവാക്കലുകൾ ഉപഭോക്താക്കൾ ശ്രദ്ധയോടെ വായിക്കണം. നിലവിൽ പമ്പുകളിൽ സാധാരണ പെട്രോളിന്റെ ലഭ്യത കുറവായതിനാൽ പഴയ വാഹന ഉടമകൾ കമ്പനി മാനുവൽ പരിശോധിക്കുകയോ ഡീലർമാരുമായി ബന്ധപ്പെട്ട് ഉയർന്ന ഒക്ടേനുള്ള പ്രീമിയം ഇന്ധനങ്ങൾ ഉപയോഗിക്കുകയോ ചെയ്യുന്നതാണ് ഇതിനൊരു താൽക്കാലിക പരിഹാരം.
