ഒട്ടാവ: കാനഡയിൽ സ്ഥിരതാമസമാക്കിയ മലയാളി പ്രവാസികൾക്കും കനേഡിയൻ പൗരന്മാർക്കും ഫെഡറൽ സർക്കാർ ജോലി സ്വന്തമാക്കാൻ മികച്ച അവസരം. കറക്ഷണൽ സർവീസ് ഓഫ് കാനഡ രാജ്യത്തെ 9 പ്രവിശ്യകളിലായി 35-ലധികം കേന്ദ്രങ്ങളിലേക്ക് വിവിധ തസ്തികകളിലേക്ക് അപേക്ഷ ക്ഷണിച്ചു. പുരുഷ-വനിതാ തടവുകാരെ പാർപ്പിച്ചിരിക്കുന്ന കറക്ഷണൽ സ്ഥാപനങ്ങളിലെ സുഗമമായ നടത്തിപ്പിനായാണ് ഈ വൻ റിക്രൂട്ട്മെന്റ് ഡ്രൈവ് ആരംഭിച്ചിരിക്കുന്നത്.
ഒക്യുപേഷണൽ തെറാപ്പിസ്റ്റ്, രജിസ്റ്റേർഡ് സൈക്കോളജിസ്റ്റ്, സോഷ്യൽ വർക്കർമാർ എന്നിവയ്ക്ക് പുറമെ കൺസ്ട്രക്ഷൻ, പ്ലംബിംഗ്, ഇലക്ട്രീഷ്യൻ തുടങ്ങിയ വിവിധ ട്രേഡ്സ് തസ്തികകളിലേക്കും ഒഴിവുകളുണ്ട്. ഈ വിജ്ഞാപനത്തിലെ ഏറ്റവും ആകർഷകമായ ഘടകം ഫുഡ് സർവീസ് ഹെൽപ്പർ തസ്തികയാണ്. ഇതിലേക്ക് അപേക്ഷിക്കാൻ ഉയർന്ന വിദ്യാഭ്യാസ യോഗ്യതയോ മുൻപരിചയമോ ആവശ്യമില്ല. ഈ തസ്തികയിൽ പ്രവേശിക്കുന്നവർക്ക് മണിക്കൂറിന് 22.32 ഡോളർ മുതൽ 28.39 ഡോളർ വരെ (ഏകദേശം 1,800 മുതൽ 2,400 ഇന്ത്യൻ രൂപ) ആകർഷകമായ ശമ്പളം ലഭിക്കും. ഉയർന്ന തസ്തികകളായ സൈക്കോളജിസ്റ്റുകൾക്ക് പ്രതിവർഷം 1,20,780 ഡോളർ വരെയാണ് കമ്പനി വാഗ്ദാനം ചെയ്യുന്നത്.
ഫെഡറൽ ഗവൺമെന്റ് നിയമപ്രകാരമുള്ള മികച്ച മെഡിക്കൽ, ഡെന്റൽ, വിഷൻ കെയർ ഇൻഷുറൻസ് ആനുകൂല്യങ്ങളും പെൻഷൻ പദ്ധതികളും തിരഞ്ഞെടുക്കപ്പെടുന്നവർക്ക് ലഭ്യമാകും. കാനഡയിലെ സ്ഥിര താമസക്കാർക്കും (PR Holders) കനേഡിയൻ പൗരന്മാർക്കും മാത്രമാണ് ഈ തസ്തികകളിലേക്ക് അപേക്ഷിക്കാൻ യോഗ്യതയുള്ളത്. കനേഡിയൻ സായുധ സേനയിലെ വിമുക്തഭടന്മാർക്ക് നിയമനത്തിൽ പ്രത്യേക മുൻഗണന ലഭിക്കും. കാനഡ സർക്കാരിന്റെ ഔദ്യോഗിക തൊഴിൽ പോർട്ടലായ ജി.സി ജോബ്സ് (GC Jobs Portal) വഴി ഓൺലൈനായാണ് അപേക്ഷ സമർപ്പിക്കേണ്ടത്.
ചില തസ്തികകളിലേക്ക് അപേക്ഷിക്കാനുള്ള അവസാന തീയതി ജൂൺ 18 ആയതിനാൽ താല്പര്യമുള്ള ഉദ്യോഗാർത്ഥികൾ എത്രയും വേഗം അപേക്ഷകൾ സമർപ്പിക്കാൻ ശ്രദ്ധിക്കുക. അപേക്ഷാ ഫോറം പൂരിപ്പിക്കുമ്പോൾ ഉദ്യോഗാർത്ഥികൾ തങ്ങളുടെ യോഗ്യതകൾ തെളിയിക്കുന്ന കൃത്യമായ വിവരങ്ങൾ മാത്രമേ നൽകാവൂ. അപേക്ഷകളിലെ വിവരണങ്ങൾ തയ്യാറാക്കാൻ ആർട്ടിഫിഷ്യൽ ഇന്റലിജൻസ് (AI) ടൂളുകൾ ഉപയോഗിച്ചിട്ടുണ്ടെങ്കിൽ അത് ഫോമിൽ വ്യക്തമായി വെളിപ്പെടുത്തണമെന്നും കറക്ഷണൽ സർവീസ് വകുപ്പ് കർശനമായി നിർദ്ദേശിച്ചിട്ടുണ്ട്. കൂടുതൽ വിവരങ്ങൾക്കും അപേക്ഷ സമർപ്പിക്കുന്നതിനുമായി കാനഡ സർക്കാരിന്റെ ഔദ്യോഗിക റിക്രൂട്ട്മെന്റ് വെബ്സൈറ്റ് സന്ദർശിക്കാവുന്നതാണ്.
