ന്യൂയോർക്ക്: അമേരിക്കയിലെ കാലിഫോർണിയയിൽ ബീച്ചിൽ വിശ്രമിക്കുന്നതിനിടെ അപ്രതീക്ഷിതമായി ഉയർന്ന ശക്തമായ തിരമാലകളിൽപ്പെട്ട് ഇന്ത്യൻ വംശജരായ രണ്ട് യുവതികൾക്ക് ദാരുണാന്ത്യം. കാലിഫോർണിയയിലെ ഫ്രീമോണ്ട് സ്വദേശികളായ ഹർഷിത നായർ (21), മഹിയാൽ സ്രാൻ (20) എന്നിവരാണ് സാന്താക്രൂസ് കൗണ്ടിയിലെ പസഫിക് തീരത്തുണ്ടായ അപകടത്തിൽ മരണപ്പെട്ടത്. ഏറെ അപകടം നിറഞ്ഞ ശക്തമായ തിരമാലകൾക്ക് പേരുകേട്ട ബോണി ഡൂൺ ബീച്ചിലെ ‘കീഹോൾ’ എന്ന പാറക്കെട്ടുകൾ നിറഞ്ഞ ഭാഗത്താണ് ദാരുണമായ സംഭവം നടന്നത്.
യൂണിവേഴ്സിറ്റി ഓഫ് കാലിഫോർണിയ ബെർക്ക്ലിയിലെ ലീഗൽ സ്റ്റഡീസ് വിദ്യാർത്ഥിനിയായിരുന്നു ഹർഷിത നായർ. സാൻ ജോസെ സ്റ്റേറ്റ് യൂണിവേഴ്സിറ്റിയിലെ പബ്ലിക് ഹെൽത്ത് വിദ്യാർത്ഥിനിയായിരുന്നു മഹിയാൽ സ്രാൻ. സ്കൂൾ കാലഘട്ടം മുതൽക്കേ അടുത്ത സുഹൃത്തുക്കളായ ഇരുവരും കഴിഞ്ഞ ബുധനാഴ്ച വൈകുന്നേരമാണ് ബീച്ചിലെത്തിയത്. ബീച്ചിനോട് ചേർന്നുള്ള ഇടുങ്ങിയ പാറയിടുക്കിൽ ഇരുവരും ഉറങ്ങുകയോ വിശ്രമിക്കുകയോ ചെയ്യുന്നതിനിടെയാണ് അപ്രതീക്ഷിതമായി ശക്തമായ വേലിയേറ്റവും വലിയ തിരമാലകളും ഉണ്ടായത്. ഇരുവരെയും നിമിഷങ്ങൾക്കകം കടലിലേക്ക് ഒഴുക്കിക്കൊണ്ടുപോവുകയായിരുന്നു.
വൈകുന്നേരം അഞ്ച് മണിയോടെ അപകടം ശ്രദ്ധയിൽപ്പെട്ട ഒരു ദൃക്സാക്ഷി ഉടൻ തന്നെ രക്ഷാപ്രവർത്തകരെ വിവരമറിയിച്ചു. തുടർന്ന് കോസ്റ്റ് ഗാർഡും എട്ടോളം ലൈഫ് ഗാർഡ് നീന്തൽ വിദഗ്ധരും ഹെലികോപ്റ്ററും ഉൾപ്പെടെയുള്ള വലിയ സന്നാഹങ്ങളുമായി സ്ഥലത്തെത്തി രക്ഷാപ്രവർത്തനം ആരംഭിച്ചു. മിനിറ്റുകൾ നീണ്ട തിരച്ചിലിനൊടുവിൽ പരിക്കേറ്റ നിലയിൽ രണ്ടുപേരെയും വെള്ളത്തിൽ നിന്ന് പുറത്തെടുക്കാൻ സാധിച്ചു. ഇതിൽ ഹർഷിത നായർ ആശുപത്രിയിലെത്തിക്കുന്നതിന് മുൻപ് തന്നെ മരണത്തിന് കീഴടങ്ങിയിരുന്നു. എന്നാൽ കടുത്ത ആന്തരിക പരിക്കുകളോടെ തീവ്രപരിചരണ വിഭാഗത്തിൽ പ്രവേശിപ്പിക്കപ്പെട്ട മഹിയാൽ സ്രാൻ ദിവസങ്ങളോളം ജീവൻരക്ഷാ സംവിധാനങ്ങളുടെ സഹായത്തോടെ കഴിഞ്ഞ ശേഷമാണ് മരണപ്പെട്ടത്.
സാന്താക്രൂസ് തീരത്തെ ഈ പ്രത്യേക ‘കീഹോൾ’ മേഖല പലപ്പോഴും അപ്രതീക്ഷിതമായ വേലിയേറ്റങ്ങൾ കാരണം പെട്ടെന്ന് വെള്ളത്തിനടിയിലാകുന്ന അപകടമേഖലയാണെന്ന് സാന്താക്രൂസ് കൗണ്ടി ഫയർഫോഴ്സ് അധികൃതർ വ്യക്തമാക്കി. ഇത്തരം അപകടകരമായ പാറക്കെട്ടുകൾ നിറഞ്ഞ തീരങ്ങളിൽ പോകുമ്പോൾ കാലാവസ്ഥാ മുന്നറിയിപ്പുകൾ കൃത്യമായി പാലിക്കണമെന്നും ജാഗ്രത പുലർത്തണമെന്നും പോലീസ് നിർദ്ദേശിച്ചു. പഠനത്തിൽ മിടുക്കരായിരുന്ന രണ്ട് യുവതികളുടെ അപ്രതീക്ഷിത വിയോഗത്തിന്റെ ഞെട്ടലിലാണ് കാലിഫോർണിയയിലെ ഇന്ത്യൻ പ്രവാസി സമൂഹം.
Two Indian students die beach California
