ഒട്ടാവ: കാനഡയിൽ സാധാരണക്കാരുടെ കുടുംബ ബജറ്റ് തകിടംമറിച്ചുകൊണ്ട് കുതിച്ചുയരുന്ന പലചരക്ക് സാധനങ്ങളുടെ വില നിയന്ത്രിക്കാനും വിപണിയിലെ വൻകിട കമ്പനികളുടെ കുത്തക അവസാനിപ്പിക്കാനും ലക്ഷ്യമിട്ട് ഫെഡറൽ സർക്കാർ ചരിത്രപരമായ ‘ദേശീയ ഭക്ഷ്യസുരക്ഷാ നയം’ പ്രഖ്യാപിച്ചു. പ്രധാനമന്ത്രി മാർക്ക് കാർണി ടൊറന്റോയിൽ വെച്ചാണ് ഈ വൻ പ്രഖ്യാപനം നടത്തിയത്. അടുത്ത പത്ത് വർഷത്തിനുള്ളിൽ 3.2 ബില്യൺ ഡോളർ (320 കോടി ഡോളർ) ചെലവഴിച്ചാണ് ഈ ബൃഹത്തായ പദ്ധതി രാജ്യമൊട്ടാകെ നടപ്പിലാക്കുകയെന്ന് സർക്കാർ വ്യക്തമാക്കി.
നിലവിൽ കാനഡയിലെ പലചരക്ക് വിപണിയുടെയും ഭക്ഷ്യവിതരണ ശൃംഖലയുടെയും 75 ശതമാനവും നിയന്ത്രിക്കുന്നത് അഞ്ചോളം വരുന്ന വൻകിട കോർപ്പറേറ്റ് റീട്ടെയ്ൽ ശൃംഖലകളാണ്. ഇത് വിപണിയിൽ കൃത്രിമ വിലക്കയറ്റത്തിന് കാരണമാകുന്നുണ്ടെന്നാണ് കണ്ടെത്തൽ. പുതിയ തന്ത്രത്തിന്റെ ഭാഗമായി കാനഡയിലുടനീളം ആഹാരസാധനങ്ങൾ സംഭരിക്കുന്നതിലും വിതരണം ചെയ്യുന്നതിലും വലിയ മാറ്റങ്ങൾ കൊണ്ടുവരും. ‘ഫുഡ് ലിങ്ക് ഫണ്ട്’ വഴി പ്രാദേശിക ഹോൾസെയിൽ വിപണികൾ, ഫുഡ് ഹബുകൾ, ടെർമിനലുകൾ എന്നിവ വിപുലീകരിക്കും. ഇതിലൂടെ ചെറുകിട ബ്രാൻഡുകൾക്കും സ്വതന്ത്ര വ്യാപാരികൾക്കും വൻകിടക്കാരെ ആശ്രയിക്കാതെ കുറഞ്ഞ വിലയ്ക്ക് സാധനങ്ങൾ സംഭരിക്കാനും ഉപഭോക്താക്കൾക്ക് വിലകുറച്ച് നൽകാനും സാധിക്കും.
സർക്കാരിന്റെ പുതിയ നീക്കത്തെ കനേഡിയൻ ഫെഡറേഷൻ ഓഫ് ഇൻഡിപെൻഡന്റ് ഗ്രോസേഴ്സ് (CFIG) സ്വാഗതം ചെയ്തു. വിപണിയിൽ ആരോഗ്യമുള്ള മത്സരം വർദ്ധിക്കുന്നത് ദീർഘകാലാടിസ്ഥാനത്തിൽ ഉപഭോക്താക്കൾക്ക് വലിയ ആശ്വാസം നൽകുമെന്ന് സംഘടനയുടെ സീനിയർ വൈസ് പ്രസിഡന്റ് ഗാരി സാൻഡ്സ് വ്യക്തമാക്കി. കൂടാതെ കാനഡയിലെ ചുരുങ്ങിയ കാർഷിക വിളവെടുപ്പ് കാലത്തെ മറികടക്കാൻ അത്യാധുനിക ഗ്രീൻഹൗസുകൾ, വെർട്ടിക്കൽ ഫാമിംഗ് എന്നിവ പ്രോത്സാഹിപ്പിക്കും. ഇതിലൂടെ രാജ്യത്ത് വർഷം മുഴുവൻ പച്ചക്കറികളും പഴവർഗ്ഗങ്ങളും ഉൽപ്പാദിപ്പിക്കാനും ആഗോള വിപണിയിലെ വിലക്കയറ്റത്തിൽ നിന്ന് കാനഡയെ സംരക്ഷിക്കാനും സാധിക്കുമെന്ന് കാർഷിക മന്ത്രാലയം അവകാശപ്പെടുന്നു.
അതേസമയം, വിലക്കയറ്റ വിഷയത്തിൽ ലിബറൽ സർക്കാരിനെതിരെ പ്രതിപക്ഷം കടുത്ത രാഷ്ട്രീയ ആയുധവുമായി രംഗത്തെത്തിയിട്ടുണ്ട്. സർക്കാരിന്റെ പുതിയ പദ്ധതി വെറും കൺകെട്ടുവിദ്യയാണെന്ന് പ്രതിപക്ഷമായ കൺസെർവേറ്റീവ് പാർട്ടി നേതാവ് പിയറി പൊയ്ലിവ്റെ കുറ്റപ്പെടുത്തി. “ജി7 (G7) രാജ്യങ്ങളിൽ ഏറ്റവും മോശം ഭക്ഷ്യ പണപ്പെരുപ്പമുള്ളത് കാനഡയിലാണ്. ഓരോ രണ്ടുമാസം കൂടുമ്പോഴും ഒരു ലിബറൽ മന്ത്രി പുറത്തുവന്ന് കുറഞ്ഞ വിലയിൽ ഭക്ഷണം ലഭ്യമാക്കുമെന്ന് പ്രഖ്യാപിക്കും. എന്നാൽ വിപണിയിൽ വില വീണ്ടും ഉയരുകയാണ് ചെയ്യുന്നത്,” പൊയ്ലിവ്റെ പരിഹസിച്ചു. മുൻപ് പ്രഖ്യാപിച്ച ‘ഗ്രോസറി ആൻഡ് എസൻഷ്യൽസ് ബെനഫിറ്റ്’ ഉൾപ്പെടെയുള്ള പദ്ധതികൾ പരാജയമാണെന്നും അദ്ദേഹം കൂട്ടിച്ചേർത്തു. വരും മാസങ്ങളിൽ ഈ പുതിയ ഭക്ഷ്യസുരക്ഷാ നയം വിപണിയിൽ എങ്ങനെയുള്ള സ്വാധീനമാണ് ചെലുത്തുകയെന്നാണ് രാജ്യം ഉറ്റുനോക്കുന്നത്.
Canada National Food Security Strategy
