US green card rule change Trump 2026
വാഷിങ്ടൺ: അമേരിക്കയിൽ സ്ഥിരതാമസത്തിന് അപേക്ഷിക്കുന്ന വിദേശികൾക്ക് കനത്ത തിരിച്ചടി. യുഎസിൽ താൽക്കാലിക വിസകളിൽ തുടരുന്നവർ ഇനി സ്വന്തം നാട്ടിലേക്ക് മടങ്ങണം. അവിടെയിരുന്ന് മാത്രമേ ഗ്രീൻ കാർഡിനായി അപേക്ഷിക്കാവൂ എന്ന് ട്രംപ് ഭരണകൂടം ഉത്തരവിട്ടു. യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് വെള്ളിയാഴ്ചയാണ് ഈ പുതിയ മാർഗനിർദേശം പുറപ്പെടുവിച്ചത്.
അർഹതയുള്ള വിദേശികൾക്ക് യുഎസിൽ തുടർന്നുകൊണ്ട് പദവി മാറ്റം അനുവദിക്കുന്ന ദശാബ്ദങ്ങൾ പഴക്കമുള്ള രീതിയാണ് ഇതോടെ ഇല്ലാതാകുന്നത്. അസാധാരണമായ സാഹചര്യങ്ങളിൽ മാത്രമേ ഇനി യുഎസിനുള്ളിൽ വെച്ച് ഗ്രീൻ കാർഡ് നടപടികൾ അനുവദിക്കൂ. കാനഡ, യുകെ തുടങ്ങിയ രാജ്യങ്ങളിലേക്ക് കുടിയേറ്റം വർദ്ധിക്കാൻ ഇത് കാരണമായേക്കാം.
യുഎസ് ഗ്രീൻ കാർഡ് പുതിയ നിയമം; ഇന്ത്യക്കാരെ കടുത്ത പ്രതിസന്ധിയിലാക്കും:
കാനഡയിലെ സ്ഥിരതാമസക്കാർ ഉൾപ്പെടെ യുഎസിലുള്ള ഐടി ജീവനക്കാരെയും വിദ്യാർത്ഥികളെയും ഈ തീരുമാനം ബാധിക്കും. എച്ച്-1ബി (H-1B), എഫ്-1 (F-1 student visa), ഒ-1, ബി1/ബി2 വിസകളിൽ ഉള്ളവർക്കാണ് പുതിയ നിയമം ബാധകമാകുക. യുഎസിലേക്ക് താൽക്കാലികമായി എത്തുന്നവർ അവിടെ തുടരുന്നത് തടയുകയാണ് ലക്ഷ്യമെന്ന് യുഎസ്സിഐഎസ് വ്യക്തമാക്കി. ഇവർ വിസിറ്റ് കഴിഞ്ഞ് സ്വന്തം രാജ്യത്തേക്ക് മടങ്ങണമെന്നാണ് പുതിയ നയം വ്യക്തമാക്കുന്നത്.
ഗ്രീൻ കാർഡിനായി അപേക്ഷിക്കുന്ന ഇന്ത്യക്കാരുടെ എണ്ണം വളരെ കൂടുതലാണ്. നിലവിൽ ലക്ഷക്കണക്കിന് ഇന്ത്യക്കാരാണ് യുഎസിൽ ഗ്രീൻ കാർഡിനായി വർഷങ്ങളായി കാത്തിരിക്കുന്നത്. പുതിയ ഉത്തരവ് അനുസരിച്ച് ഇവർ ഇന്ത്യയിലേക്ക് മടങ്ങേണ്ടി വരും. അവിടെയുള്ള യുഎസ് എംബസി വഴി ഗ്രീൻ കാർഡ് വിസ നടപടികൾ പൂർത്തിയാക്കണം. ഇത്തരത്തിൽ നാട്ടിലേക്ക് മടങ്ങുന്നത് കുടുംബങ്ങളുടെ വേർപിരിയലിന് കാരണമാകുമെന്ന് കുടിയേറ്റ സംഘടനകൾ ആശങ്കപ്പെടുന്നു.
സാമ്പത്തിക നേട്ടമോ ദേശീയ താല്പര്യങ്ങളോ ഉള്ള ചിലർക്ക് ഇളവ് ലഭിച്ചേക്കാം. എന്നാൽ ഭൂരിഭാഗം ജീവനക്കാരെയും ഇത് ദോഷകരമായി ബാധിക്കും. ഈ ഉത്തരവിനെതിരെ അമേരിക്കയിലെ പ്രമുഖ ഐടി കമ്പനികളും മനുഷ്യാവകാശ സംഘടനകളും കോടതിയെ സമീപിക്കാൻ ഒരുങ്ങുകയാണ്. ഇത് കനത്ത നിയമപോരാട്ടങ്ങൾക്ക് വഴിവെക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.
അമേരിക്കയിൽ നിന്നുള്ള കൂടുതൽ വാർത്തകൾക്കായി USA വിഭാഗം സന്ദർശിക്കുക
