ധോണിയെ അനുസ്മരിപ്പിച്ച മിന്നൽ സ്റ്റംപിംഗ്; ഗ്രൗണ്ടിൽ സഞ്ജുവും ക്ലാസനും തമ്മിൽ വാക്പോര്

Sanju Samson stumping Klaasen

ചെന്നൈ: ഐപിഎല്ലിൽ ചെന്നൈ സൂപ്പർ കിങ്സ് – സൺറൈസേഴ്സ് ഹൈദരാബാദ് മത്സരത്തിനിടെ ചെന്നൈ വിക്കറ്റ് കീപ്പർ സഞ്ജു സാംസണും ഹൈദരാബാദ് ബാറ്റർ ഹെൻറിച്ച് ക്ലാസനും തമ്മിൽ മൈതാനത്ത് വാക്പോര്. എം.എസ്. ധോണിയുടെ സുവർണ്ണകാലത്തെ ഓർമ്മിപ്പിക്കുന്ന രീതിയിൽ സഞ്ജു നടത്തിയ മിന്നൽ സ്റ്റംപിംഗിൽ ക്ലാസൻ പുറത്തായതിന് പിന്നാലെയാണ് ചെപ്പോക്ക് സ്റ്റേഡിയത്തിൽ നാടകീയ രംഗങ്ങൾ അരങ്ങേറിയത്. തിങ്കളാഴ്ച നടന്ന മത്സരത്തിൽ ചെന്നൈ ഉയർത്തിയ 181 റൺസ് വിജയലക്ഷ്യം പിന്തുടർന്ന ഹൈദരാബാദിനായി ഇഷാൻ കിഷനും (70), ഹെൻറിച്ച് ക്ലാസനും (47) തകർപ്പൻ പ്രകടനമാണ് പുറത്തെടുത്തത്. ആറ് ഫോറുകളും രണ്ട് സിക്സറുകളുമായി ക്ലാസൻ ചെന്നൈ ബൗളർമാരെ കടന്നാക്രമിക്കുന്നതിനിടെയാണ് 15-ാം ഓവറിൽ നൂർ അഹമ്മദ് ചെന്നൈക്ക് പ്രതീക്ഷ നൽകിയ ആ ബ്രേക്ക് ത്രൂ സമ്മാനിച്ചത്.

നൂർ അഹമ്മദിന്റെ തകർപ്പൻ ഗൂഗ്ലിയിൽ ക്ലാസൻ ബീറ്റണായ നിമിഷം, കണ്ണടച്ചു തുറക്കും വേഗത്തിലാണ് സഞ്ജു സാംസൺ ബെയിൽസ് തെറിപ്പിച്ചത്.

Completely by that sheer speed!

A wicketkeeping masterclass from Sanju Samson

Updates ▶️ https://t.co/4SxAzYKEvY#TATAIPL | #KhelBindaas | #CSKvSRH | @ChennaiIPL pic.twitter.com/1npyOFgFh1

— IndianPremierLeague (@IPL) May 18, 2026

ചെപ്പോക്കിലെ ഗാലറിയെയും ഡ്രസ്സിങ് റൂമിലിരുന്ന സാക്ഷാൽ എം.എസ്. ധോണിയെയും ഒരുപോലെ അത്ഭുതപ്പെടുത്തിയ വിക്കറ്റ് കീപ്പിങ് മികവായിരുന്നു സഞ്ജു പുറത്തെടുത്തത്. അമ്പയറുടെ തീരുമാനം വരും മുൻപ് തന്നെ സഞ്ജു അത് ഔട്ടാണെന്ന് ഉറപ്പിച്ച് ആവേശത്തോടെ തുള്ളിച്ചാടി. ടിവി റീപ്ലേയിൽ ക്ലാസൻ പുറത്താണെന്ന് വിധിച്ചതോടെ ചെന്നൈ താരങ്ങൾ സഞ്ജുവിനെ അഭിനന്ദിക്കാൻ ഒത്തുചേർന്നു. എന്നാൽ, അർധസെഞ്ചുറിക്ക് തൊട്ടരികെ വിക്കറ്റ് നഷ്ടമായതിന്റെ കടുത്ത നിരാശയിൽ മടങ്ങുകയായിരുന്ന ക്ലാസൻ, സഞ്ജുവിന് നേരെ തിരിഞ്ഞ് എന്തോ പറയുകയും വിരൽ ചൂണ്ടുകയും ചെയ്തു. സഞ്ജുവും ശക്തമായി പ്രതികരിച്ചതോടെ മൈതാനത്ത് നേരിയ സംഘർഷാവസ്ഥ ഉടലെടുത്തു. ഒടുവിൽ ചെന്നൈ താരം ശിവം ദുബെ ഇടപെട്ടാണ് ക്ലാസനെ ശാന്തനാക്കി പവലിയനിലേക്ക് പറഞ്ഞയച്ചത്. തുടർന്ന് സഞ്ജു സാംസൺ ഓൺ-ഫീൽഡ് അമ്പയറോട് കാര്യങ്ങൾ വിശദീകരിക്കുന്നതും കാണാമായിരുന്നു.

ക്ലാസൻ പുറത്തായെങ്കിലും ഒരറ്റത്ത് ഉറച്ചുനിന്ന ഇഷാൻ കിഷൻ ഹൈദരാബാദിനെ സുരക്ഷിതമായി വിജയതീരത്ത് എത്തിച്ചു. 19 ഓവറിൽ 5 വിക്കറ്റ് നഷ്ടത്തിൽ ഹൈദരാബാദ് ലക്ഷ്യം കണ്ടു (181/5). ഈ വിജയത്തോടെ ഹൈദരാബാദ് പ്ലേ ഓഫ് ഉറപ്പിച്ചപ്പോൾ, ലീഗ് ഘട്ടത്തിന്റെ അവസാന ഘട്ടത്തിൽ നേരിട്ട ഈ തോൽവി ചെന്നൈ സൂപ്പർ കിങ്സിന്റെ പ്ലേ ഓഫ് സാധ്യതകൾക്ക് കനത്ത തിരിച്ചടിയാണ് നൽകിയിരിക്കുന്നത്.