Switzerland traffic fine Indian tourist
ന്യൂഡൽഹി: വിദേശരാജ്യങ്ങളിൽ വിനോദയാത്ര പോകുമ്പോൾ അവിടുത്തെ നിയമങ്ങൾ കൃത്യമായി പാലിച്ചില്ലെങ്കിൽ പണി എപ്പോൾ വേണമെങ്കിലും പാളാം. സ്വിറ്റ്സർലൻഡ് സന്ദർശിച്ച് നാട്ടിൽ തിരിച്ചെത്തി ഒരു വർഷം കഴിഞ്ഞപ്പോൾ ഡൽഹി സ്വദേശിനിയായ ഒരു യുവതിയെ തേടിയെത്തിയത് ഒന്നര ലക്ഷം രൂപയുടെ ട്രാഫിക് പിഴയാണ്. തനിക്ക് നേരിട്ട ഈ അപ്രതീക്ഷിത അനുഭവം യുവതി തന്നെയാണ് സോഷ്യൽ മീഡിയ പ്ലാറ്റ്ഫോമായ എക്സിലൂടെ പങ്കുവെച്ചത്.
Has anyone here received a traffic violation fine from Switzerland months after returning from a vacation?
We just received a challan of almost ₹1 lakh, nearly a year after our trip. We’re trying to understand if there’s any way to appeal, reduce, or get it waived.
— Poan Sapdi (@Poan__Sapdi) May 30, 2026
യാത്ര കഴിഞ്ഞ് മാസങ്ങൾക്ക് ശേഷം ഇത്രയും വലിയ തുകയുടെ ചെല്ലാൻ ലഭിച്ചതിൽ താൻ അത്ഭുതപ്പെട്ടുവെന്ന് എക്സ് ഹാൻഡിലിലുള്ള യുവതി കുറിച്ചു. ഈ പിഴയ്ക്കെതിരെ അപ്പീൽ നൽകാനോ തുക കുറയ്ക്കാനോ എന്തെങ്കിലും നിയമപരമായ വഴിയുണ്ടോ എന്ന് അറിയാൻ സഹായം തേടിയാണ് അവർ കുറിപ്പ് പങ്കുവെച്ചത്. ആദ്യ ഘട്ടത്തിൽ ഒരു ലക്ഷം രൂപയോളമാണ് പിഴയെന്ന് കരുതിയതെങ്കിലും, വിശദമായി പരിശോധിച്ചപ്പോഴാണ് ആകെ തുക 1.5 ലക്ഷം രൂപയോളമുണ്ടെന്ന് ഇവർക്ക് മനസ്സിലായത്.
യൂറോപ്യൻ രാജ്യങ്ങളിലെ കടുത്ത നിയമങ്ങൾ:
ഈ പോസ്റ്റ് വൈറലായതിന് പിന്നാലെ, വിദേശയാത്ര കഴിഞ്ഞ് നാട്ടിലെത്തിയ ശേഷം യൂറോപ്യൻ രാജ്യങ്ങളിൽ നിന്ന് സമാനമായ രീതിയിൽ ട്രാഫിക് പിഴകൾ ലഭിച്ച നിരവധി ആളുകൾ തങ്ങളുടെ അനുഭവങ്ങളുമായി രംഗത്തെത്തി. ഒരു യാത്രയ്ക്ക് ശേഷം ജർമ്മനിയിൽ നിന്ന് തനിക്ക് 10,000 രൂപയുടെ സ്പീഡിങ് ടിക്കറ്റ് ലഭിച്ചിരുന്നുവെന്നും താൻ അത് അടച്ചുതീർത്തുവെന്നും ഒരാൾ കമന്റ് ചെയ്തു. സമാനമായി ഇറ്റലിയിൽ നിന്ന് 15,000 രൂപയോളം ചെല്ലാൻ വന്നിട്ട് എങ്ങനെ അടയ്ക്കണമെന്ന് അറിയാതെ ഇരിക്കുകയാണെന്ന് മറ്റൊരാളും വ്യക്തമാക്കി.
ലഭിച്ച നോട്ടീസ് വളരെ ഗൗരവത്തോടെ കാണണമെന്നും പണം അടച്ചില്ലെങ്കിൽ കടുത്ത പ്രത്യാഘാതങ്ങൾ നേരിടേണ്ടി വരുമെന്നും സോഷ്യൽ മീഡിയ ഉപയോക്താക്കൾ യുവതിക്ക് മുന്നറിയിപ്പ് നൽകുന്നുണ്ട്. സ്വിസ് ട്രാഫിക് പിഴകൾ വളരെ വലുതാണെന്നും, അടയ്ക്കാതിരുന്നാൽ അവർ അതിന്മേൽ പലിശ കൂട്ടിക്കൊണ്ടേയിരിക്കുമെന്നും പലരും ചൂണ്ടിക്കാട്ടി.
യൂറോപ്യൻ യൂണിയൻ രാജ്യങ്ങളിലെ ട്രാഫിക് നിയമങ്ങൾ കർശനമാണ്. തുക ഒറ്റയടിക്ക് അടയ്ക്കാൻ ബുദ്ധിമുട്ടാണെങ്കിൽ തവണകളായി അടയ്ക്കാനുള്ള അനുമതി അധികൃതരോട് ചോദിക്കാവുന്നതാണ്. എന്നാൽ പിഴ അടയ്ക്കാതെ ഒഴിഞ്ഞുമാറിയാൽ, ഭാവിയിൽ 20 വർഷത്തിന് ശേഷമാണെങ്കിൽ പോലും വീണ്ടും യൂറോപ്പിലേക്ക് യാത്ര ചെയ്യുമ്പോൾ എയർപോർട്ടിൽ വെച്ച് തടഞ്ഞുവെക്കപ്പെടാനും നിയമനടപടികൾ നേരിടാനും സാധ്യതയുണ്ടെന്ന് വിദഗ്ദ്ധർ മുന്നറിയിപ്പ് നൽകുന്നു.
