Watch World Cup in Canadian theaters live
ടൊറന്റോ: കാനഡയിലെ ഫുട്ബോൾ പ്രേമികൾക്ക് വലിയൊരു ആവേശ വാർത്ത. വരാനിരിക്കുന്ന 2026 ഫിഫ ലോകകപ്പ് ഫുട്ബോൾ മത്സരങ്ങൾ ഇനി തിയേറ്ററുകളിലെ ബിഗ് സ്ക്രീനിലും ആസ്വദിക്കാം. കാനഡയിലെ പ്രമുഖ മൾട്ടിപ്ലക്സ് ശൃംഖലയായ സിനിപ്ലക്സ് (Cineplex), ഔദ്യോഗിക ബ്രോഡ്കാസ്റ്റർമാരായ ടിഎസ്എന്നുമായി (TSN) ചേർന്നാണ് ഈ വലിയ അവസരം ഒരുക്കുന്നത്.
കാനഡ, അമേരിക്ക, മെക്സിക്കോ എന്നീ രാജ്യങ്ങൾ സംയുക്തമായി ആതിഥേയത്വം വഹിക്കുന്ന ലോകകപ്പ് മത്സരങ്ങളിൽ തിരഞ്ഞെടുത്തവയാണ് തിയേറ്ററുകളിൽ തത്സമയം കാണിക്കുക. ടൊറന്റോ, ഒട്ടാവ, മോൺട്രിയൽ, ഹാലിഫാക്സ്, വിന്നിപെഗ്, കാൽഗറി, എഡ്മന്റൺ, വാൻകൂവർ തുടങ്ങിയ പ്രധാന നഗരങ്ങളിലെ 42 തിയേറ്ററുകളിലാണ് തുടക്കത്തിൽ ഈ സൗകര്യം ഉണ്ടാകുക. ഒന്റാറിയോ പ്രവിശ്യയിൽ മാത്രം ഇരുപതിലധികം തിയേറ്ററുകളിൽ ബിഗ് സ്ക്രീൻ പ്രദർശനമുണ്ടാകും.
മത്സരങ്ങൾ നേരിട്ട് തിയേറ്ററുകളിൽ കാണുന്നതിനായുള്ള ആദ്യഘട്ട ടിക്കറ്റ് വിൽപന ആരംഭിച്ചിട്ടുണ്ട്. 9.99 കനേഡിയൻ ഡോളറാണ് തിയേറ്ററുകളിലെ ടിക്കറ്റ് നിരക്ക്. ഓൺലൈൻ വഴി ബുക്ക് ചെയ്യുന്നവർക്ക് ബുക്കിംഗ് ഫീസും ബാധകമായിരിക്കും. ഗ്രൂപ്പ് ഘട്ടത്തിലെ പ്രധാന മത്സരങ്ങളുടെ ടിക്കറ്റുകളാണ് ഇപ്പോൾ ലഭ്യമായിട്ടുള്ളത്. നോക്കൗട്ട് മത്സരങ്ങളുടെ ടിക്കറ്റുകൾ പിന്നീട് ഘട്ടങ്ങളായി റിലീസ് ചെയ്യും.
മത്സരങ്ങൾ നടക്കുമ്പോൾ തിയേറ്ററുകളിൽ പ്രത്യേക ഭക്ഷണ ക്രമീകരണങ്ങളും ചില പ്രവിശ്യകളിലെ നിയമങ്ങൾക്ക് അനുസൃതമായി മദ്യവും ലഭ്യമാക്കുമെന്ന് സിനിപ്ലക്സ് അധികൃതർ വ്യക്തമാക്കി. ജൂൺ 11 മുതൽ ആരംഭിക്കുന്ന ലോകകപ്പിൽ മൊത്തം 48 ടീമുകളിലായി 104 മത്സരങ്ങളാണുള്ളത്. ജൂൺ 12-ന് ടൊറന്റോയിലെ ബിഎംഒ ഫീൽഡിൽ ബോസ്നിയക്കെതിരെയാണ് കാനഡയുടെ ആദ്യ മത്സരം. സ്റ്റേഡിയത്തിലെ ആവേശം അതേപടി തിയേറ്ററുകളിലും എത്തിക്കാനാണ് ഈ പദ്ധതിയിലൂടെ സിനിപ്ലക്സ് ലക്ഷ്യമിടുന്നത്.
കൂടുതൽ കായിക വാർത്തകൾക്കായി SPORTS വിഭാഗം സന്ദർശിക്കുക
