Indian international students drowning cases Canada
ടൊറന്റോ: കാനഡയിൽ ഇന്ത്യൻ പൗരന്മാരുടെയും പ്രത്യേകിച്ച് അന്താരാഷ്ട്ര വിദ്യാർത്ഥികളുടെയും മുങ്ങിമരണ കേസുകൾ വർദ്ധിച്ചുവരുന്ന സാഹചര്യത്തിൽ അതീവ ജാഗ്രതാ നിർദ്ദേശവുമായി ടൊറന്റോയിലെ ഇന്ത്യൻ കോൺസുലേറ്റ് ജനറൽ. വേനൽക്കാലം ആരംഭിച്ചതോടെ പ്രവാസികളും വിദ്യാർത്ഥികളും കൂട്ടത്തോടെ ബീച്ചുകളിലേക്കും തടാകങ്ങളിലേക്കും വിനോദയാത്രകൾ പോകുന്ന പശ്ചാത്തലത്തിലാണ് കടുത്ത സുരക്ഷാ മുന്നറിയിപ്പുകളുമായി കോൺസുലേറ്റ് രംഗത്തെത്തിയത്.
ടൊറന്റോയിലെ ഇന്ത്യൻ കോൺസുലേറ്റ് അവരുടെ ഔദ്യോഗിക വെബ്സൈറ്റിലൂടെയും ഫേസ്ബുക്ക് പേജിലൂടെയുമാണ് ഈ അടിയന്തര സുരക്ഷാ നിർദ്ദേശം പുറപ്പെടുവിച്ചത്. കാനഡയിലെ വിവിധ പ്രവിശ്യകളിലുള്ള തടാകങ്ങൾ, നദികൾ, സമുദ്രതീരങ്ങൾ തുടങ്ങിയ ജലാശയങ്ങൾ സന്ദർശിക്കുമ്പോൾ കടുത്ത മുൻകരുതലുകൾ എടുക്കണമെന്ന് കോൺസുലേറ്റ് ആവശ്യപ്പെട്ടു. പ്രാദേശിക അധികൃതർ നൽകുന്ന സുരക്ഷാ നിർദ്ദേശങ്ങൾ വിട്ടുവീഴ്ചയില്ലാതെ പിന്തുടരാനും നിർദ്ദേശമുണ്ട്.
അപരിചിതമായ ഇടങ്ങളിലോ ലൈഫ് ഗാർഡുമാരുടെ സേവനമില്ലാത്ത സുരക്ഷിതമല്ലാത്ത ജലാശയങ്ങളിലോ ഇറങ്ങുന്നത് പൂർണ്ണമായും ഒഴിവാക്കണം. ഒപ്പം ലൈഫ് ജാക്കറ്റുകൾ ധരിക്കാൻ നിർദ്ദേശമുള്ളതോ അല്ലെങ്കിൽ ആവശ്യകതയുള്ളതോ ആയ സാഹചര്യങ്ങളിൽ അവ ഉപയോഗിക്കാൻ മടിക്കരുത്. കാനഡയിലെ ജലാശയങ്ങളിൽ ഒഴുക്കും ആഴവും പെട്ടെന്ന് മാറാൻ സാധ്യതയുള്ളതിനാൽ നീന്തൽ അറിയാത്തവർ യാതൊരു കാരണവശാലും വെള്ളത്തിൽ ഇറങ്ങരുതെന്നും ലഹരിപദാർത്ഥങ്ങൾ ഉപയോഗിച്ച ശേഷം ബോട്ടിംഗിനോ വാട്ടർ സ്പോർട്സിലോ ഏർപ്പെടരുതെന്നും അധികൃതർ കർശനമായി ഓർമ്മിപ്പിക്കുന്നു.
കൂടുതൽ കൃത്യമായ മരണനിരക്കോ മറ്റ് സ്ഥിതിവിവരക്കണക്കുകളോ കോൺസുലേറ്റ് നിലവിൽ പുറത്തുവിട്ടിട്ടില്ല. എങ്കിലും ലോകമെമ്പാടും യുവാക്കളെയും കുട്ടികളെയുമാണ് മുങ്ങിമരണം കാര്യമായി ബാധിക്കുന്നത്. യുകെ ആസ്ഥാനമായുള്ള റോയൽ ലൈഫ് സേവിംഗ് സൊസൈറ്റിയുടെ കണക്കുകൾ പ്രകാരം 2021-ൽ കോമൺവെൽത്ത് രാജ്യങ്ങളിൽ ഏറ്റവും കൂടുതൽ മുങ്ങിമരണം റിപ്പോർട്ട് ചെയ്തത് ഇന്ത്യയിലാണ് (54,682 പേർ). കാനഡയിൽ ഇതേ വർഷം 298 പേരാണ് ഇത്തരത്തിൽ മരണപ്പെട്ടത്. കാനഡയിലെ സുന്ദരമായ വേനൽക്കാലം ആസ്വദിക്കുമ്പോൾ ഇത്തരം ദൗർഭാഗ്യകരമായ അപകടങ്ങൾ ഒഴിവാക്കാൻ എല്ലാ ഇന്ത്യൻ പൗരന്മാരും പരമാവധി മുൻകരുതലുകൾ എടുക്കണമെന്ന് അധികൃതർ ആവർത്തിച്ച് വ്യക്തമാക്കി.
Indian international students drowning cases Canada
