ഒന്റാറിയോയിലെ അലിസ്റ്റണിൽ (Alliston) സ്ഥാപിക്കാനിരുന്ന 15 ബില്യൺ ഡോളറിന്റെ ഭീമൻ ഇലക്ട്രിക് വാഹന (EV) നിർമ്മാണ പദ്ധതി ഹോണ്ട മോട്ടോർ കമ്പനി അനിശ്ചിതകാലത്തേക്ക് നിർത്തിവെച്ചു. ആഗോളതലത്തിൽ ഇലക്ട്രിക് വാഹനങ്ങളുടെ ആവശ്യകതയിലുണ്ടായ കുറവും വിപണിയിലെ അനിശ്ചിതാവസ്ഥയുമാണ് ഈ പിൻമാറ്റത്തിന് പിന്നിലെ പ്രധാന കാരണമായി കമ്പനി ചൂണ്ടിക്കാട്ടുന്നത്. കാനഡയുടെ ചരിത്രത്തിലെ തന്നെ ഏറ്റവും വലിയ വ്യവസായ നിക്ഷേപങ്ങളിലൊന്നായി കണക്കാക്കപ്പെട്ടിരുന്ന ഈ പദ്ധതിയുടെ സ്തംഭനം വലിയ ചർച്ചകൾക്കാണ് വഴിതുറന്നിരിക്കുന്നത്.
2024-ൽ ജസ്റ്റിൻ ട്രൂഡോ സർക്കാരും ഒന്റാറിയോ പ്രീമിയർ ഡഗ് ഫോർഡും വലിയ പ്രാധാന്യത്തോടെ പ്രഖ്യാപിച്ചതായിരുന്നു ഈ പദ്ധതി. പൂർണ്ണതോതിൽ പ്രവർത്തനസജ്ജമാകുമ്പോൾ പ്രതിവർഷം 2,40,000 വാഹനങ്ങൾ ഉത്പാദിപ്പിക്കാനും മേഖലയിൽ ആയിരത്തിലധികം പുതിയ തൊഴിലവസരങ്ങൾ സൃഷ്ടിക്കാനും ഇത് ലക്ഷ്യമിട്ടിരുന്നു. എന്നാൽ, അമേരിക്കൻ ഭരണകൂടം ഇലക്ട്രിക് വാഹനങ്ങൾക്കുള്ള ഇനസെന്റീവ് ആനുകൂല്യങ്ങൾ വെട്ടിക്കുറച്ചതും ഇറക്കുമതി തീരുവകളിൽ വരുത്തിയ മാറ്റങ്ങളും പദ്ധതിയുടെ സാമ്പത്തിക ഭദ്രതയെ ബാധിച്ചതായി റിപ്പോർട്ടുകൾ സൂചിപ്പിക്കുന്നു.
നിലവിൽ ഹൈബ്രിഡ്, ഗ്യാസ് വാഹനങ്ങളിൽ ശ്രദ്ധ കേന്ദ്രീകരിക്കാനാണ് ഹോണ്ടയുടെ തീരുമാനം. തങ്ങളുടെ ആദ്യത്തെ വാർഷിക നഷ്ടം രേഖപ്പെടുത്തിയതിന് പിന്നാലെയാണ് ഈ നയം മാറ്റം കമ്പനി പ്രഖ്യാപിച്ചത്. അതേസമയം, അലിസ്റ്റണിലെ നിലവിലെ ഫാക്ടറിയിലെ ഉത്പാദനത്തെയോ ജീവനക്കാരെയോ ഈ തീരുമാനം ബാധിക്കില്ലെന്ന് ഹോണ്ട വ്യക്തമാക്കിയിട്ടുണ്ട്. ഫെഡറൽ-പ്രൊവിൻഷ്യൽ സർക്കാരുകൾ വാഗ്ദാനം ചെയ്ത 5 ബില്യൺ ഡോളറിന്റെ ധനസഹായം പദ്ധതി പൂർത്തിയാകാത്തതിനാൽ കമ്പനിക്ക് ലഭിക്കില്ലെന്ന് ഒന്റാറിയോ സാമ്പത്തിക വികസന മന്ത്രാലയം അറിയിച്ചു.
ഒന്റാറിയോയിലെ ലണ്ടൻ ഉൾപ്പെടെയുള്ള നഗരങ്ങളിലെ ഓട്ടോമൊബൈൽ അനുബന്ധ വ്യവസായങ്ങളെയും ഈ തീരുമാനം പരോക്ഷമായി ബാധിച്ചേക്കാം. ഇലക്ട്രിക് വാഹന വിപണിയിലെ തണുത്ത പ്രതികരണം കാനഡയിലെ മറ്റ് വലിയ നിക്ഷേപങ്ങളെയും ബാധിക്കുമോ എന്ന ആശങ്ക വ്യവസായ ലോകത്തുണ്ട്.
