ടോറോന്റോ : കാനഡയിലെ ഒന്റാറിയോ പ്രവിശ്യയിലെ പോലീസ് സേനകൾ പൊതുജനങ്ങളുടെ സ്മാർട്ട്ഫോണുകൾ പൂർണ്ണമായി നിയന്ത്രണത്തിലാക്കാൻ ശേഷിയുള്ള അത്യാധുനിക മിലിട്ടറി ഗ്രേഡ് സ്പൈവെയറുകൾ ഉപയോഗിക്കുന്നതായി വെളിപ്പെടുത്തൽ. ടൊറന്റോ സർവകലാശാല ആസ്ഥാനമായി പ്രവർത്തിക്കുന്ന ഡിജിറ്റൽ നിരീക്ഷണ ഗവേഷണ സ്ഥാപനമായ ‘സിറ്റിസൺ ലാബ്’ പുറത്തുവിട്ട റിപ്പോർട്ടിലാണ് പ്രവിശ്യാ പോലീസിന് ഇസ്രായേൽ ആസ്ഥാനമായുള്ള സ്പൈവെയർ നിർമ്മാതാക്കളുമായി ബന്ധമുണ്ടെന്ന വിവരമുള്ളത്. സുപ്രധാനമായ ഈ നിരീക്ഷണ സാങ്കേതികവിദ്യയുടെ ഉപയോഗവും അതിന്റെ രഹസ്യസ്വഭാവവും കനേഡിയൻ മലയാളി കമ്മ്യൂണിറ്റി ഉൾപ്പെടെയുള്ള പൊതുസമൂഹത്തിനിടയിൽ വലിയ സ്വകാര്യതാ ആശങ്കകൾക്ക് കാരണമായിട്ടുണ്ട്.
സിറ്റിസൺ ലാബിന്റെ കണ്ടെത്തലുകൾ പ്രകാരം ഒന്റാറിയോ പ്രൊവിൻഷ്യൽ പോലീസ് (OPP) ആസ്ഥാനത്തെ ഒരു ഐപി (IP) വിലാസം, ആഗോളതലത്തിൽ വിവാദമുണ്ടാക്കിയ ‘ഗ്രാഫൈറ്റ്’ (Graphite) എന്ന സ്പൈവെയറിന്റെ സെർവറുകളുമായി ബന്ധപ്പെട്ടിരിക്കുന്നതായി കണ്ടെത്തി. ഇസ്രായേൽ കമ്പനിയായ പാരഗൺ സൊല്യൂഷൻസ് വികസിപ്പിച്ച ഈ സോഫ്റ്റ്വെയറിന് ഫോണുകളിലെ എൻക്രിപ്റ്റ് ചെയ്ത സന്ദേശങ്ങൾ ചോർത്താനും, ക്യാമറയും മൈക്രോഫോണും രഹസ്യമായി പ്രവർത്തിപ്പിക്കാനും, ഉപയോക്താവിന്റെ ലൊക്കേഷൻ വിവരങ്ങൾ ശേഖരിക്കാനും സാധിക്കും. മുൻപ് റോയൽ കനേഡിയൻ മൗണ്ടഡ് പോലീസ് (RCMP) ഇത്തരം ‘ഓൺ-ഡിവൈസ് ഇൻവെസ്റ്റിഗേറ്റീവ് ടൂളുകൾ’ (ODIT) ഉപയോഗിച്ചതായി സമ്മതിച്ചിരുന്നെങ്കിലും, പ്രാദേശിക പോലീസ് തലത്തിലും ഇത് വ്യാപകമാകുന്നു എന്നാണ് പുതിയ റിപ്പോർട്ടുകൾ സൂചിപ്പിക്കുന്നത്.
അന്വേഷണങ്ങളുടെ രഹസ്യസ്വഭാവം കാത്തുസൂക്ഷിക്കാൻ പോലീസ് ഈ സാങ്കേതികവിദ്യയെക്കുറിച്ചുള്ള വിവരങ്ങൾ അതീവ രഹസ്യമായി വെക്കാൻ ശ്രമിക്കുന്നതായാണ് റിപ്പോർട്ടുകൾ വ്യക്തമാക്കുന്നത്. എന്നാൽ, ഗുരുതരമായ കുറ്റകൃത്യങ്ങളും ഭീകരവാദ പ്രവർത്തനങ്ങളും തടയുന്നതിന് മാത്രമാണ് കോടതി മുൻകൂർ അനുമതിയോടെ ഇത്തരം സംവിധാനങ്ങൾ ഉപയോഗിക്കുന്നതെന്നാണ് ഒന്റാറിയോ പോലീസ് അധികൃതരുടെ വിശദീകരണം. കാനഡയിലെ നിയമസംവിധാനങ്ങൾക്ക് വിധേയമായാണ് തങ്ങൾ പ്രവർത്തിക്കുന്നതെന്നും അവർ അവകാശപ്പെടുന്നു.
