ടൊറന്റോ: ഈ വേനൽക്കാലത്ത് അരങ്ങേറുന്ന ഫിഫ ലോകകപ്പ് ഫുട്ബോൾ ആവേശത്തിന് മാറ്റുകൂട്ടാൻ ബാറുകൾക്കും റെസ്റ്റോറന്റുകൾക്കും വൻ ഇളവുകളുമായി കാനഡയിലെ ഒന്റാറിയോ പ്രവിശ്യാ ഭരണകൂടം. ലോകകപ്പ് മത്സരങ്ങൾ നടക്കുന്ന ജൂൺ 11 മുതൽ ജൂലൈ 19 വരെയുള്ള കാലയളവിൽ ഒന്റാറിയോയിലെ മദ്യശാലകൾക്ക് പുലർച്ചെ 4 മണി വരെ മദ്യം വിളമ്പാൻ അനുമതി നൽകിക്കൊണ്ട് ചൊവ്വാഴ്ച സർക്കാർ ഉത്തരവിറക്കി. സാധാരണയായി പുലർച്ചെ 2 മണിക്ക് അവസാനിക്കുന്ന ‘ലാസ്റ്റ് കോൾ’ സമയമാണ് ടൂർണമെന്റ് പ്രമാണിച്ച് രണ്ട് മണിക്കൂർ കൂടി നീട്ടി നൽകിയിരിക്കുന്നത്.
അമേരിക്ക, മെക്സിക്കോ, കാനഡ എന്നീ രാജ്യങ്ങൾ സംയുക്തമായി ആതിഥേയത്വം വഹിക്കുന്ന ഈ വർഷത്തെ ലോകകപ്പിൽ ഒന്റാറിയോയിലെ ടൊറന്റോ നഗരവും ഒരു പ്രധാന വേദിയാണ്. ടൊറന്റോയിൽ മാത്രം ആറ് മത്സരങ്ങളാണ് നടക്കുന്നത്. ഇവിടെ ജൂൺ 12 മുതൽ ജൂലൈ 2 വരെയാണ് മത്സരങ്ങൾ ക്രമീകരിച്ചിരിക്കുന്നത്. ടൊറന്റോയിലെ അവസാന മത്സരങ്ങൾ പ്രാദേശിക സമയം (ET) വൈകിട്ട് 7 മണിക്ക് ആരംഭിക്കുമ്പോൾ, ടൂർണമെന്റിലെ മറ്റ് ചില മത്സരങ്ങൾ അർദ്ധരാത്രി 12 മണിക്ക് വരെ ആരംഭിക്കുന്നുണ്ട്. ഈ സമയവ്യത്യാസം കണക്കിലെടുത്താണ് ആരാധകർക്ക് തടസ്സമില്ലാതെ കളി കാണാനുള്ള സൗകര്യം സർക്കാർ ഒരുക്കിയത്.
“റസ്റ്റോറന്റുകൾക്കും ബാറുകൾക്കും കൂടുതൽ സമയം പ്രവർത്തിക്കാൻ അനുമതി നൽകുന്നതിലൂടെ കായികപ്രേമികൾക്ക് ടൂർണമെന്റിന്റെ ആവേശം പൂർണ്ണമായി ഉൾക്കൊള്ളാൻ സാധിക്കും. അതോടൊപ്പം തന്നെ ഇത് പ്രാദേശിക ബിസിനസ്സുകളെ ശക്തിപ്പെടുത്തുകയും പുതിയ തൊഴിലവസരങ്ങൾ സൃഷ്ടിക്കുകയും ഒന്റാറിയോയുടെ സാമ്പത്തിക വളർച്ചയ്ക്ക് വലിയ ഊർജ്ജം പകരുകയും ചെയ്യും,” ഒന്റാറിയോ അറ്റോർണി ജനറൽ ഡഗ് ഡൗണി (Doug Downey) വാർത്താക്കുറിപ്പിൽ വ്യക്തമാക്കി.
ബാറുകൾക്ക് പുറമെ, ഗ്രേറ്റർ ടൊറന്റോ ഏരിയയിലെയും (GTA) ഒട്ടാവയിലെയും തെരഞ്ഞെടുത്ത 27 എൽസിബിഒ (LCBO) റീറ്റെയ്ൽ മദ്യവിൽപ്പന ശാലകളുടെ പ്രവർത്തന സമയവും സർക്കാർ ദീർഘിപ്പിച്ചിട്ടുണ്ട്. ലോകകപ്പ് കാലയളവിൽ തിങ്കൾ മുതൽ ശനി വരെയുള്ള ദിവസങ്ങളിൽ രാവിലെ 9 മണി മുതൽ രാത്രി 11 മണി വരെയും, ഞായറാഴ്ചകളിൽ രാവിലെ 9 മുതൽ രാത്രി 8 മണി വരെയും ഈ ഔട്ട്ലെറ്റുകൾ പ്രവർത്തിക്കും.
പ്രധാന കായിക മാമാങ്കങ്ങൾ നടക്കുമ്പോൾ ഒന്റാറിയോ സർക്കാർ ഇത്തരത്തിൽ ഇളവുകൾ നൽകുന്നത് ഇതാദ്യമല്ല. ഖത്തർ ആതിഥേയത്വം വഹിച്ച 2022-ലെ ലോകകപ്പ് മത്സരങ്ങൾ കനേഡിയൻ സമയം പുലർച്ചെ 5:30-ന് ആരംഭിച്ചിരുന്നതിനാൽ അന്ന് പുലർച്ചെ മുതൽ ബാറുകൾ തുറക്കാൻ അനുമതി നൽകിയിരുന്നു. കൂടാതെ, ഈ വർഷം ഫെബ്രുവരിയിൽ നടന്ന മിലാനോ-കോർട്ടിന വിന്റർ ഗെയിംസ് പുരുഷ ഹോക്കി ഫൈനൽ പ്രമാണിച്ച് പുലർച്ചെ 6 മണി മുതൽ മദ്യം വിളമ്പാനും സർക്കാർ ലൈസൻസികൾക്ക് അനുവാദം നൽകിയിരുന്നു.
