London Ontario heat warning
ലണ്ടൻ: വിക്ടോറിയ ഡേ അവധിദിനങ്ങൾക്ക് പിന്നാലെ കാനഡയിലെ ഒന്റാറിയോയിലുള്ള ലണ്ടൻ മേഖലയിൽ ഈ സീസണിലെ ആദ്യത്തെ കടുത്ത ചൂട് രേഖപ്പെടുത്തി. അന്തരീക്ഷ ഊഷ്മാവ് കുതിച്ചുയരുന്ന സാഹചര്യത്തിൽ ലണ്ടൻ, പാർക്ക്ഹിൽ, ഈസ്റ്റേൺ മിഡിൽസെക്സ് കൗണ്ടി എന്നീ പ്രദേശങ്ങളിൽ പരിസ്ഥിതി മന്ത്രാലയം യെല്ലോ ഹീറ്റ് വാണിംഗ് പ്രഖ്യാപിച്ചു. ചൊവ്വാഴ്ച രാത്രി വരെ ഈ ഉഷ്ണതരംഗം തുടരുമെന്നാണ് മുന്നറിയിപ്പ്.
തെക്കുപടിഞ്ഞാറൻ കാറ്റിന്റെ സ്വാധീനം മൂലമാണ് ഒന്റാറിയോയിൽ ചൂട് പെട്ടെന്ന് വർദ്ധിച്ചതെന്ന് കാലാവസ്ഥാ വിദഗ്ധർ വ്യക്തമാക്കുന്നു. പകൽ സമയങ്ങളിൽ താപനില 31 ഡിഗ്രി സെൽഷ്യസ് വരെ ഉയരുമെങ്കിലും അന്തരീക്ഷത്തിലെ ഈർപ്പം കാരണം അനുഭവപ്പെടുന്ന ചൂട് 35 മുതൽ 36 ഡിഗ്രി സെൽഷ്യസ് വരെയായിരിക്കും. ചൊവ്വാഴ്ച ഉച്ചയ്ക്ക് ശേഷം ശക്തമായ ഇടിമിന്നലോടു കൂടിയ മഴ പെയ്യാൻ 40 ശതമാനം സാധ്യതയുണ്ടെന്നും ഇത് ചൂടിന് നേരിയ ശമനം നൽകുമെന്നും കാലാവസ്ഥാ നിരീക്ഷണ കേന്ദ്രത്തിലെ മെറ്റീരിയോളജിസ്റ്റ് ഇസബെൽ റിച്ചാർഡ്സൺ പറഞ്ഞു. ബുധനാഴ്ചയോടെ താപനില 11 ഡിഗ്രിയിലേക്ക് താഴ്ന്ന് തണുത്ത കാലാവസ്ഥ മടങ്ങിയെത്തുമെന്നാണ് പ്രവചനം.
ചൂട് കടുത്തതോടെ മിഡിൽസെക്സ്-ലണ്ടൻ ഹെൽത്ത് യൂണിറ്റും (MLHU) അതീവ ജാഗ്രതാ നിർദ്ദേശം നൽകിയിട്ടുണ്ട്. ഈ സാഹചര്യത്തിൽ പൊതുജനങ്ങൾ താഴെ പറയുന്ന മുൻകരുതലുകൾ സ്വീകരിക്കണമെന്ന് ആരോഗ്യ വകുപ്പ് ആവശ്യപ്പെട്ടു:
-
ധാരാളം വെള്ളം കുടിക്കുക: ദാഹം തോന്നിയില്ലെങ്കിൽ പോലും ശരീരത്തിൽ ജലാംശം നിലനിർത്താൻ തുടർച്ചയായി വെള്ളം കുടിക്കണം. നിർജ്ജലീകരണത്തിന് കാരണമാകുന്ന കഫീൻ അടങ്ങിയ പാനീയങ്ങളും മദ്യവും ഒഴിവാക്കുക.
-
കുട്ടികളെയും വളർത്തുമൃഗങ്ങളെയും കാറിനുള്ളിൽ ഇരുത്തരുത്: പാർക്ക് ചെയ്തിരിക്കുന്ന വാഹനങ്ങൾക്കുള്ളിലെ താപനില പെട്ടെന്ന് വർദ്ധിക്കുമെന്നതിനാൽ കുട്ടികളെയോ വളർത്തുമൃഗങ്ങളെയോ ഒരു കാരണവശാലും കാറുകളിൽ തനിച്ചാക്കരുത്.
-
ശാരീരിക അധ്വാനം കുറയ്ക്കുക: കടുത്ത വെയിലുള്ള സമയങ്ങളിൽ പുറത്തിറങ്ങുന്നതും കഠിനമായ ശാരീരിക അധ്വാനങ്ങളിൽ ഏർപ്പെടുന്നതും ഒഴിവാക്കുക. വീടുകൾക്കുള്ളിലേക്ക് നേരിട്ട് വെയിൽ അടിക്കാതിരിക്കാൻ ജനലുകളുടെ ബ്ലൈൻഡ്സുകൾ അടച്ചിടുക.
പ്രായമായവരുടെയും തനിച്ചു താമസിക്കുന്നവരുടെയും ആരോഗ്യാവസ്ഥ ഫോണിലൂടെയോ നേരിട്ടോ അന്വേഷിച്ച് ഉറപ്പുവരുത്തണമെന്നും ഹെൽത്ത് യൂണിറ്റ് ജനങ്ങളോട് അഭ്യർത്ഥിച്ചു.
