ഒട്ടാവ: ഒടിടി, മ്യൂസിക് സ്ട്രീമിംഗ് ഭീമന്മാരായ നെറ്റ്ഫ്ലിക്സ്, ആമസോൺ പ്രൈം, സ്പോട്ടിഫൈ, ആപ്പിൾ തുടങ്ങിയ ആഗോള കമ്പനികൾക്ക് കനത്ത തിരിച്ചടി നൽകിക്കൊണ്ട് കനേഡിയൻ ബ്രോഡ്കാസ്റ്റ് റെഗുലേറ്ററായ സിആർടിസി പുതിയ ഉത്തരവ് പുറപ്പെടുവിച്ചു. വിദേശ സ്ട്രീമിംഗ് പ്ലാറ്റ്ഫോമുകൾ കാനഡയിൽ നിന്ന് നേടുന്ന വാർഷിക വരുമാനത്തിന്റെ 15 ശതമാനം ഇനി മുതൽ കനേഡിയൻ പ്രാദേശിക ഉള്ളടക്കങ്ങളുടെ നിർമ്മാണത്തിനായി നിർബന്ധമായും നീക്കിവെക്കണമെന്നാണ് പുതിയ നിർദ്ദേശം.
കാനഡയിൽ വിവാദമായ ‘ഓൺലൈൻ സ്ട്രീമിംഗ് നിയമം’ നടപ്പിലാക്കുന്നതിന്റെ ഭാഗമായാണ് വ്യാഴാഴ്ച റെഗുലേറ്റർ ഈ ചരിത്രപരമായ തീരുമാനം പ്രഖ്യാപിച്ചത്. ഈ പുതിയ നിയമം വഴി പ്രതിവർഷം 2 ബില്യൺ ഡോളറിലധികം കനേഡിയൻ-ആദിവാസി ഭാഷാ ചിത്രങ്ങൾക്കും ഫ്രഞ്ച് വാർത്താ മാധ്യമങ്ങൾക്കുമായി സമാഹരിക്കാൻ സാധിക്കുമെന്നാണ് വിലയിരുത്തപ്പെടുന്നത്.
മൂന്നിരട്ടി വർദ്ധനവ്; കോർപ്പറേറ്റുകൾ കോടതിയിലേക്ക്:
2024-ൽ സിആർടിസി ഏർപ്പെടുത്തിയ 5 ശതമാനം പ്രാദേശിക വിഹിതം എന്ന മുൻ ഉത്തരവിനെതിരെ ആപ്പിളും ആമസോണും ഉൾപ്പെടെയുള്ള യുഎസ് കമ്പനികൾ കാനഡയിലെ ഫെഡറൽ കോടതിയെ സമീപിച്ചിരിക്കുകയാണ്. ഈ നിയമപോരാട്ടം തുടരുന്നതിനിടയിലാണ് കമ്പനികളെ ഞെട്ടിച്ചുകൊണ്ട് വിഹിതം ഒറ്റയടിക്ക് 15 ശതമാനമായി റെഗുലേറ്റർ ഉയർത്തിയിരിക്കുന്നത്. അതേസമയം, പരമ്പരാഗത കനേഡിയൻ ടെലിവിഷൻ ചാനലുകൾ നിലവിൽ നൽകേണ്ടി വരുന്ന 30 മുതൽ 45 ശതമാനം വരെയുള്ള വിഹിതം 25 ശതമാനമായി കുറയ്ക്കാനും സിആർടിസി തീരുമാനിച്ചു.
കാനഡയിൽ നിന്നും വാർഷിക വരുമാനമായി 25 മില്യൺ ഡോളറോ അതിൽ കൂടുതലോ നേടുന്ന എല്ലാ ഓഡിയോ-വിഷ്വൽ സ്ട്രീമിംഗ് ഗ്രൂപ്പുകൾക്കും ഈ നിയമം ബാധകമായിരിക്കും. ഇതിൽ 100 മില്യൺ ഡോളറിന് മുകളിൽ വരുമാനമുള്ള വമ്പൻ കമ്പനികൾ തങ്ങളുടെ വിഹിതത്തിന്റെ 30 ശതമാനം കനേഡിയൻ സ്വതന്ത്ര നിർമ്മാതാക്കളുമായും പ്രാദേശിക ബ്രോഡ്കാസ്റ്റർമാരുമായും ചേർന്നുള്ള സംയുക്ത സംരംഭങ്ങൾക്കായി ചിലവഴിക്കണമെന്നും കർശന വ്യവസ്ഥയുണ്ട്.
അമേരിക്കയുമായി കടുത്ത വ്യാപാരയുദ്ധത്തിന് സാധ്യത:
കാനഡയുടെ പുതിയ നീക്കത്തിനെതിരെ ഹോളിവുഡ് സ്റ്റുഡിയോകളുടെ കൂട്ടായ്മയായ മോഷൻ പിക്ചർ അസോസിയേഷൻ കടുത്ത ഭാഷയിൽ രംഗത്തെത്തിയിട്ടുണ്ട്. ഈ തീരുമാനം അമേരിക്കൻ കമ്പനികളോടുള്ള കടുത്ത വിവേചനമാണെന്നും യുഎസ്-മെക്സിക്കോ-കാനഡ (USMCA) വ്യാപാര കരാറിന്റെ ലംഘനമാണെന്നും അവർ ആരോപിക്കുന്നു. അമേരിക്കൻ കമ്പനികളെ ലക്ഷ്യമിട്ടുള്ള കാനഡയുടെ നീക്കത്തിന് തിരിച്ചടിയായി കനേഡിയൻ ഉൽപ്പന്നങ്ങൾക്ക് മേൽ വൻ നികുതി ചുമത്താൻ യുഎസ് കോൺഗ്രസിൽ റിപ്പബ്ലിക്കൻ പാർട്ടി അംഗങ്ങൾ പുതിയ ബിൽ അവതരിപ്പിച്ചതായും റിപ്പോർട്ടുകളുണ്ട്.
എന്നിരുന്നാലും, തങ്ങൾ ഒരു സ്വതന്ത്ര ജുഡീഷ്യൽ ട്രിബ്യൂണൽ ആണെന്നും അന്താരാഷ്ട്ര വ്യാപാര ചർച്ചകളെ ഭയപ്പെടാതെ കാനഡയിലെ നിയമങ്ങൾ കാനഡയ്ക്കുള്ളിൽ നടപ്പിലാക്കുക മാത്രമാണ് ചെയ്യുന്നതെന്നും സിആർടിസി വൈസ് പ്രസിഡന്റ് സ്കോട്ട് ഷോർട്ട്ലിഫ് വ്യക്തമാക്കി. പുതിയ നിയമപ്രകാരം സ്മാർട്ട് ടിവികളിലും ഒടിടി പ്ലാറ്റ്ഫോമുകളിലും കനേഡിയൻ സിനിമകളും ആദിവാസി വിഭാഗങ്ങളുടെ ഉള്ളടക്കങ്ങളും ഉപഭോക്താക്കൾക്ക് എളുപ്പത്തിൽ കണ്ടെത്താൻ കഴിയുന്ന രീതിയിൽ മുൻഗണന നൽകി പ്രദർശിപ്പിക്കണമെന്നും ഉത്തരവിൽ പറയുന്നുണ്ട്.
