കൊച്ചി: കല്യാണി പ്രിയദർശൻ നായികയായി തീയേറ്ററുകളിൽ തരംഗമായി മാറിയ ‘ലോക ചാപ്റ്റർ 1: ചന്ദ്ര’ (Lokah: Chapter 1 Chandra) എന്ന ചിത്രത്തിൽ താൻ എത്തിയതിന് പിന്നിലെ രസകരമായ കഥ വെളിപ്പെടുത്തി മമ്മൂട്ടി. മലയാളത്തിലെ എക്കാലത്തെയും വലിയ കളക്ഷൻ നേടിയ ചിത്രമായി മാറിയ ‘ലോക’യിലെ ‘മൂത്തോൻ’ എന്ന നിഗൂഢ കഥാപാത്രത്തിന് ശബ്ദം നൽകാനുണ്ടായ സാഹചര്യത്തെക്കുറിച്ചാണ് മമ്മൂട്ടി മനസ്സ് തുറന്നത്.
ശബ്ദം നൽകാൻ വന്നത് ദുൽഖറല്ല!
ചിത്രത്തിൽ മമ്മൂട്ടി ഉണ്ടെന്ന കാര്യം അണിയറ പ്രവർത്തകർ ആദ്യം മറച്ചുവെച്ചുവെന്ന് അദ്ദേഹം പറയുന്നു. ‘ദി ഹോളിവുഡ് റിപ്പോർട്ടർ ഇന്ത്യ’യ്ക്ക് നൽകിയ അഭിമുഖത്തിലാണ് മെഗാസ്റ്റാറിന്റെ വെളിപ്പെടുത്തൽ. “സിനിമയിൽ അഭിനയിക്കണമെന്ന കാര്യം അവർ എന്നോട് പറഞ്ഞിരുന്നില്ല. ആദ്യം ദുൽഖറല്ല വന്നത്, അവന്റെ മാനേജരായ സുഹൃത്താണ് വന്ന് ശബ്ദം നൽകണമെന്ന് ആവശ്യപ്പെട്ടത്. ഞാൻ അത് ചെയ്തു. സിനിമയിൽ കണ്ട കൈ പോലും എന്റേതല്ല. പക്ഷേ സിനിമ ഇറങ്ങിയപ്പോൾ അത് ഞാനാണെന്ന് എല്ലാവരും പറഞ്ഞു,” മമ്മൂട്ടി തമാശയായി പറഞ്ഞു.
പറ്റിച്ചതാണ്, ഇനി പ്രതിഫലം നോക്കണം!
സത്യത്തിൽ തന്നെ അവർ പറ്റിച്ചതാണെന്നും അതുകൊണ്ട് തന്നെ ഇപ്പോൾ ആ കഥാപാത്രമായി അഭിനയിക്കുക എന്നത് തന്റെ ഉത്തരവാദിത്തമായി മാറിയെന്നും അദ്ദേഹം കൂട്ടിച്ചേർത്തു. ചിത്രത്തിന്റെ രണ്ടാം ഭാഗത്തിൽ മമ്മൂട്ടിയെ ഉൾപ്പെടുത്തുന്നത് അത്ര എളുപ്പമല്ലെന്ന് നിർമ്മാതാവ് കൂടിയായ ദുൽഖർ സൽമാൻ നേരത്തെ പറഞ്ഞിരുന്നു. ഇതിന് മറുപടിയായി, “അവർ എന്നെ അഭിനയിക്കാൻ ബോധ്യപ്പെടുത്തിയെങ്കിൽ, എന്റെ ഫീസിന്റെ കാര്യം സമ്മതിപ്പിക്കാൻ എനിക്കും അവരെ ബോധ്യപ്പെടുത്തേണ്ടി വരും” എന്ന് മമ്മൂട്ടി തമാശയായി പറഞ്ഞു.
ഡൊമിനിക് അരുൺ സംവിധാനം ചെയ്ത ഈ സൂപ്പർഹീറോ ചിത്രത്തിൽ നസ്ലെൻ, സാൻഡി മാസ്റ്റർ, ചന്തു സലിം കുമാർ തുടങ്ങിയവരാണ് മറ്റ് പ്രധാന വേഷങ്ങളിലെത്തിയത്. രണ്ടാം ഭാഗത്തിൽ മമ്മൂട്ടിയുടെ ‘മൂത്തോൻ’ എന്ന കഥാപാത്രം നേരിട്ട് പ്രത്യക്ഷപ്പെടുമെന്ന സൂചനകളാണ് ഇപ്പോൾ പുറത്തുവരുന്നത്.
