നോർവിച്ച് : നോർവിച്ചിൽ ആവശ്യത്തിന് സമയപരിധി നൽകാതെ റിട്ടയർമെന്റ് ഹോം പെട്ടെന്ന് അടച്ചുപൂട്ടിയ കേസിൽ സ്ഥാപനത്തിന്റെ ഉടമകൾ കോടതിയിൽ കുറ്റസമ്മതം നടത്തി. മുൻകൂട്ടി അറിയിക്കാതെ താമസക്കാരായ മുതിർന്ന പൗരന്മാരെ കൂട്ടത്തോടെ ഒഴിപ്പിച്ചതുമായി ബന്ധപ്പെട്ട് ‘ട്രില്യൺ കെയർ റിട്ടയർമെന്റ് ഹോം’ അധികൃതർക്കെതിരെ ചുമത്തിയ കേസിലാണ് ഇപ്പോൾ നിർണായക നിയമനടപടി ഉണ്ടായിരിക്കുന്നത്. പ്രവിശ്യാ നിയമപ്രകാരം നിഷ്കർഷിച്ചിട്ടുള്ള സമയപരിധി പാലിക്കാതെയാണ് സ്ഥാപനം പ്രവർത്തി അവസാനിപ്പിച്ചതെന്ന് കോടതി കണ്ടെത്തി.
കാനഡയിലെ ഒന്റാരിയോ പ്രവിശ്യാ നിയമപ്രകാരം ഒരു റിട്ടയർമെന്റ് ഹോം പൂർണ്ണമായി അടച്ചുപൂട്ടുന്നതിന് മുൻപ് കുറഞ്ഞത് 120 ദിവസത്തെ ഔദ്യോഗിക നോട്ടീസ് താമസക്കാർക്ക് നൽകേണ്ടതുണ്ട്. എന്നാൽ ട്രില്യൺ കെയർ അധികൃതർ വെറും 17 ദിവസത്തെ നോട്ടീസ് മാത്രം നൽകിക്കൊണ്ട് 2024 ഒക്ടോബർ 26-നാണ് സ്ഥാപനം നവംബർ 11-ഓടെ അടച്ചുപൂട്ടുകയാണെന്ന് താമസക്കാരെ അറിയിച്ചത്. വളരെ ചുരുങ്ങിയ ദിവസങ്ങൾക്കുള്ളിൽ പ്രായമായ താമസക്കാർക്ക് മറ്റ് താമസസൗകര്യങ്ങൾ കണ്ടെത്തേണ്ടി വന്നത് വലിയ പ്രതിസന്ധിക്കും മാനസിക വിഷമങ്ങൾക്കും കാരണമായിരുന്നു.
തുടർന്ന് ഒന്റാരിയോ അധികൃതർ നടത്തിയ ശക്തമായ നിയമനടപടികൾക്കൊടുവിലാണ് ഇപ്പോൾ ഉടമകൾ കോടതിയിൽ കുറ്റം സമ്മതിച്ചത്. അടിയന്തര സാഹചര്യങ്ങളിൽ മുതിർന്ന പൗരന്മാർക്ക് മറ്റ് താമസസൗകര്യങ്ങൾ കണ്ടെത്തുന്നതിനായി രൂപീകരിച്ചിട്ടുള്ള പ്രത്യേക ഫണ്ടിലേക്ക് 22,000 കനേഡിയൻ ഡോളറിലധികം നഷ്ടപരിഹാരമായി നൽകാമെന്ന് ഉടമകൾ കോടതിയിൽ സമ്മതിച്ചിട്ടുണ്ട്. ഈ തുക സമാനമായ സാഹചര്യങ്ങളിൽ ദുരിതമനുഭവിക്കുന്ന പ്രായമായവരുടെ പുനരധിവാസ പ്രവർത്തനങ്ങൾക്കായി വിനിയോഗിക്കും.
