ഹാമിൽട്ടൺ: ഹാമിൽട്ടൺ ഡൗൺടൗണിലെ ജാക്സൺ സ്ക്വയർ മാളിൽ വെള്ളിയാഴ്ച വൈകുന്നേരമാണ് നാടിനെ നടുക്കിയ വെടിവെപ്പ് നടന്നത്. മാളിന്റെ കവാടത്തിന് സമീപം വെച്ച് നടന്ന തർക്കത്തിനൊടുവിൽ 14 വയസ്സുകാരൻ തോക്ക് പുറത്തെടുത്ത് നബീലിന് നേരെ വെടിയുതിർക്കുകയായിരുന്നു. ഗുരുതരമായി പരിക്കേറ്റ നബീലിനെ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
തന്റെ മാതാപിതാക്കൾക്കും ഇളയ സഹോദരനുമൊപ്പം സിറിയയിൽ നിന്നും മെച്ചപ്പെട്ട ജീവിതം തേടിയാണ് നബീൽ ഹാമിൽട്ടണിലെത്തിയത്. ഈ ദുരന്തത്തിൽ കുടുംബം ആകെ തകർന്നിരിക്കുകയാണെന്ന് അന്വേഷണ ഉദ്യോഗസ്ഥനായ റോബർട്ട് ഡി ഇയാന്നി പറഞ്ഞു.
പ്രതി കീഴടങ്ങി
വെടിവെപ്പിന് ശേഷം ഒളിവിൽ പോയ 14 വയസ്സുകാരനായി പോലീസ് ഊർജ്ജിതമായ തിരച്ചിൽ നടത്തിവരികയായിരുന്നു. ഒടുവിൽ ഞായറാഴ്ച പ്രതി സ്വയം പോലീസിൽ കീഴടങ്ങുകയായിരുന്നു. പ്രതി പ്രായപൂർത്തിയാകാത്ത ആളായതിനാൽ കനേഡിയൻ നിയമപ്രകാരം (Youth Criminal Justice Act) പേരോ മറ്റ് വിവരങ്ങളോ പോലീസ് പുറത്തുവിട്ടിട്ടില്ല.
തർക്കവും വെടിവെപ്പും
മാളിന് പുറത്തുവെച്ച് തുടങ്ങിയ വാക്കേറ്റമാണ് ഒടുവിൽ കൊലപാതകത്തിൽ കലാശിച്ചത്. മാളിന്റെ കവാടത്തിനടുത്ത് വെച്ച് വെടിയേറ്റ നബീൽ, അല്പം ദൂരെയുള്ള ഒരു കടയുടെ മുന്നിലേക്ക് നടന്നെങ്കിലും അവിടെ കുഴഞ്ഞുവീഴുകയായിരുന്നു. ഹാൻഡ് ഗണ്ണിനേക്കാൾ വലിപ്പമുള്ള തോക്കാണ് പ്രതി ഉപയോഗിച്ചതെന്ന് പോലീസ് കണ്ടെത്തിയിട്ടുണ്ട്. സംഭവവുമായി ബന്ധപ്പെട്ട് മറ്റ് പ്രതികളെയൊന്നും ഇനി കണ്ടെത്താനില്ലെന്നും പോലീസ് അറിയിച്ചു.
കാനഡയിൽ നിന്നുള്ള കൂടുതൽ വാർത്തകൾക്കായി ഞങ്ങളുടെ CANADA വിഭാഗം സന്ദർശിക്കുക.
മാളിലെ സുരക്ഷാ ക്യാമറകളിൽ നിന്നും കൃത്യമായ ദൃശ്യങ്ങൾ പോലീസിന് ലഭിച്ചിട്ടുണ്ട്. നിലവിൽ മാളിന്റെ പ്രവർത്തനം സാധാരണ നിലയിലായിട്ടുണ്ട്. സിറിയയിൽ നിന്നും അഭയാർത്ഥിയായെത്തിയ ഒരു ബാലന്റെ ദാരുണമായ അന്ത്യം പ്രവാസി സമൂഹത്തിനിടയിൽ വലിയ നോവാകുകയാണ്.
