Canada bear attack 2026
വാൻകൂവർ: കാനഡയിലെ ബ്രിട്ടീഷ് കൊളംബിയ (B.C.) പ്രവിശ്യയിൽ ശീതകാല ഉറക്കം കഴിഞ്ഞ് ഭക്ഷണത്തിനായി ജനവാസ മേഖലകളിലേക്ക് കരടികൾ കൂട്ടത്തോടെ ഇറങ്ങുന്നത് ജനങ്ങളിൽ കടുത്ത ആശങ്കയുണ്ടാക്കുന്നു. പ്രവിശ്യയുടെ വിവിധ ഭാഗങ്ങളിൽ നിന്നായി കൗതുകമുണർത്തുന്നതും അതേസമയം ഭീതിപ്പെടുത്തുന്നതുമായ നിരവധി കരടി സംഭവങ്ങളാണ് കഴിഞ്ഞ ദിവസങ്ങളിൽ റിപ്പോർട്ട് ചെയ്തത്.
കെലോനയിലെ ഒരു പൂൾ ആൻഡ് സ്പാ കച്ചവട സ്ഥാപനത്തിൽ ബുധനാഴ്ച പകൽ സമയത്ത് ഒരു കറുത്ത കരടി തുറന്നുകിടന്ന വലിയ വാതിലിലൂടെ നേരിട്ട് അകത്തേക്ക് നടന്നു കയറി. തുടർന്ന് അവിടെ പ്രദർശിപ്പിച്ചിരുന്ന വലിപ്പമുള്ള ഒരു ശൂന്യമായ ഹോട്ട് ടബ്ബിനുള്ളിലേക്ക് ഇത് ചാടിയിറങ്ങി. കടയിലുണ്ടായിരുന്ന ജീവനക്കാരി ഭയന്ന് നിലവിളിച്ചതിനെത്തുടർന്ന് അവരുടെ പിതാവ് ഒച്ചവെച്ച് കരടിയെ പേടിപ്പിച്ചു പുറത്തോടിക്കുകയായിരുന്നു. ഈ അപ്രതീക്ഷിത സംഭവത്തിന്റെ വീഡിയോ നിലവിൽ സോഷ്യൽ മീഡിയയിൽ വൈറലാണ്.
അതേസമയം, പ്രവിശ്യയിലെ മിഷൻ നഗരത്തിൽ സ്വന്തം വീടിന്റെ പിൻവശത്തെ വരാന്തയിൽ നിന്ന വയോധികനെ ഒരു പെൺകരടി ആക്രമിച്ചു പരിക്കേൽപ്പിച്ചു. വളർത്തുനായ കുറയ്ക്കുന്നത് കേട്ട് പുറത്തിറങ്ങിയ വീട്ടുടമസ്ഥൻ ഒച്ചയുണ്ടാക്കി കരടിയെ ഓടിക്കാൻ ശ്രമിച്ചെങ്കിലും, മൃഗം ഇദ്ദേഹത്തിന് നേരെ ചീറിയടുത്ത് കൈയ്ക്ക് അടിച്ചു പരിക്കേൽപ്പിക്കുകയായിരുന്നു. തുടർന്ന് സ്ഥലത്തെത്തിയ ബ്രിട്ടീഷ് കൊളംബിയ കൺസർവേഷൻ ഓഫീസർ സർവീസ് അധികൃതർ, മനുഷ്യരെ ഒട്ടും ഭയമില്ലാത്ത രീതിയിൽ പെരുമാറിയ ഈ കരടിയെ പൊതുജന സുരക്ഷ മുൻനിർത്തി വെടിവെച്ചുകൊന്നു. കാനഡയിൽ 2011 മുതൽ ഇതുവരെ ജനങ്ങൾക്ക് ഭീഷണിയായ എണ്ണായിരത്തിലധികം കറുത്ത കരടികളെ ഇത്തരത്തിൽ വധിച്ചിട്ടുണ്ടെന്നാണ് കണക്കുകൾ.
മറ്റൊരു സംഭവത്തിൽ, സ്മിതേഴ്സ് മേഖലയിലെ റോഡരികിൽ വെച്ച് രണ്ട് പുരുഷന്മാർ ചേർന്ന് മാരകമായ ഗ്രിസ്ലി കരടികൾക്ക് (Grizzly Bears) കയ്യിൽ നിന്നും ക്യാരറ്റും ആപ്പിളും നൽകുന്ന വീഡിയോകൾ ഇൻസ്റ്റാഗ്രാമിലും എക്സിലും പ്രചരിച്ചിരുന്നു. വന്യമൃഗങ്ങൾക്ക് ഇത്തരത്തിൽ ഭക്ഷണം നൽകുന്നത് കടുത്ത നിയമലംഘനമാണെന്ന് കൺസർവേഷൻ ഉദ്യോഗസ്ഥർ മുന്നറിയിപ്പ് നൽകി. മനുഷ്യൻ നൽകുന്ന ഭക്ഷണ ശീലങ്ങളിലേക്ക് വന്യമൃഗങ്ങൾ ആകർഷിക്കപ്പെടുന്നത് അവയെ കൂടുതൽ അക്രമാസക്തരാക്കുമെന്നും, നിയമലംഘകർക്ക് ഒരു ലക്ഷം ഡോളർ വരെ പിഴയും ജയിൽ ശിക്ഷയും ലഭിക്കുമെന്നും അധികൃതർ വ്യക്തമാക്കി.
