GCC Eid public holidays dates
കുവൈത്ത് സിറ്റി: ഇസ്ലാമിക ലോകം വലിയ പെരുന്നാളിനായി (Eid Al Adha 2026) ഒരുങ്ങുന്ന പശ്ചാത്തലത്തിൽ കുവൈത്ത് ഉൾപ്പെടെയുള്ള വിവിധ ഗൾഫ് രാജ്യങ്ങൾ ഔദ്യോഗിക പെരുന്നാൾ അവധികൾ പ്രഖ്യാപിച്ചു. മേയ് 26 ചൊവ്വാഴ്ച മുതൽ മേയ് 31 ഞായറാഴ്ച വരെ മന്ത്രാലയങ്ങൾക്കും സർക്കാർ ഏജൻസികൾക്കും പൊതുമേഖലാ സ്ഥാപനങ്ങൾക്കും കുവൈത്തിൽ പൂർണ്ണ അവധിയായിരിക്കും. വാരാന്ത്യ അവധി ദിനങ്ങൾ ഉൾപ്പെടെ ആകെ ആറ് ദിവസത്തെ നീണ്ട ഇടവേളയാണ് കുവൈത്ത് നിവാസികൾക്ക് ലഭിക്കുക.
പ്രധാനമന്ത്രി ശൈഖ് അഹമ്മദ് അബ്ദുള്ള അൽ-അഹമ്മദ് അൽ-സബാഹിന്റെ അധ്യക്ഷതയിൽ ചേർന്ന മന്ത്രിസഭാ യോഗത്തിലാണ് അവധി സംബന്ധിച്ച തീരുമാനമെടുത്തത്. മേയ് 26 മുതൽ 29 വരെയുള്ള ദിവസങ്ങൾ ഔദ്യോഗിക പെരുന്നാൾ അവധിയായും, മേയ് 30, 31 (ശനി, ഞായർ) തീയതികൾ വിശ്രമ ദിനങ്ങളായും കണക്കാക്കും. പെരുന്നാൾ അവധിക്ക് ശേഷം ജൂൺ 1 തിങ്കളാഴ്ച മുതൽ രാജ്യത്തെ സർക്കാർ ഓഫീസുകളുടെ പ്രവർത്തനം പുനരാരംഭിക്കും.
യുഎഇയിലും ഒമാനിലും സൗദിയിലും വിപുലമായ അവധി ദിനങ്ങൾ:
കുവൈത്തിന് പുറമെ യുഎഇ, ഒമാൻ, സൗദി അറേബ്യ എന്നീ രാജ്യങ്ങളും പെരുന്നാൾ അവധി ഷെഡ്യൂളുകൾ പുറത്തുവിട്ടിട്ടുണ്ട്:
-
യുഎഇ: ഫെഡറൽ ഗവൺമെന്റ് ജീവനക്കാർക്ക് മേയ് 25 തിങ്കളാഴ്ച മുതൽ മേയ് 29 വെള്ളിയാഴ്ച വരെ തുടർച്ചയായ അഞ്ച് ദിവസത്തെ ശമ്പളത്തോടുകൂടിയ അവധി ലഭിക്കും. സ്വകാര്യ മേഖലയ്ക്ക് മേയ് 26 ചൊവ്വാഴ്ച (അറഫാ ദിനം) മുതൽ മേയ് 29 വെള്ളിയാഴ്ച വരെ നാല് ദിവസമാണ് അവധി. വാരാന്ത്യ അവധികൾ കഴിഞ്ഞ് ഇരുവിഭാഗവും ജൂൺ 1 തിങ്കളാഴ്ച ജോലിയിൽ പ്രവേശിക്കണം.
-
ഒമാൻ: പൊതു-സ്വകാര്യ മേഖലകളിലെ ജീവനക്കാർക്ക് മേയ് 26 ചൊവ്വാഴ്ച മുതൽ പെരുന്നാൾ അവധി ആരംഭിക്കും. അവധി കഴിഞ്ഞ് മേയ് 31 ഞായറാഴ്ച മുതൽ സ്ഥാപനങ്ങൾ വീണ്ടും പ്രവർത്തിക്കും.
-
സൗദി അറേബ്യ: സ്വകാര്യ മേഖലയിലെയും എൻജിഒ സ്ഥാപനങ്ങളിലെയും ജീവനക്കാർക്ക് മേയ് 26 ചൊവ്വാഴ്ച (ദുൽ ഹജ്ജ് ഒമ്പത് – അറഫാ ദിനം) മുതൽ ആരംഭിച്ച് തുടർച്ചയായ നാല് ദിവസത്തെ അവധി മാനവ വിഭവശേഷി മന്ത്രാലയം പ്രഖ്യാപിച്ചു.
ബലിപെരുന്നാളിനോടനുബന്ധിച്ച് കുവൈത്ത് അമീർ ശൈഖ് മിശാൽ അൽ-അഹമ്മദ് അൽ-ജാബർ അൽ-സബാഹിനും, കിരീടാവകാശി ശൈഖ് സബാഹ് ഖാലിദ് അൽ-ഹമദ് അൽ-സബാഹിനും, രാജ്യത്തെ സ്വദേശികൾക്കും പ്രവാസികൾക്കും മന്ത്രിസഭ ഈദ് ആശംസകൾ നേർന്നു.
