ടൊറന്റോ: വിവാദങ്ങൾക്കും രാഷ്ട്രീയ തർക്കങ്ങൾക്കും നടുവിൽ, ടൊറന്റോ വാട്ടർഫ്രണ്ടിലെ പുതിയ ഒന്റാറിയോ സയൻസ് സെന്ററിന്റെ നിർമ്മാണ പ്രവർത്തനങ്ങൾക്ക് ഔദ്യോഗികമായി തുടക്കമായി. ഒന്റാറിയോ പ്ലേസ് നവീകരണ പദ്ധതിയുടെ ഭാഗമായി നിർമ്മിക്കുന്ന പുതിയ കെട്ടിടത്തിന്റെ തറക്കല്ലിടൽ ചടങ്ങ് പ്രീമിയർ ഡഗ് ഫോർഡ് നിർവ്വഹിച്ചു. ‘ഷവലുകൾ മണ്ണിലിറങ്ങി കഴിഞ്ഞു’ എന്ന് വ്യക്തമാക്കിയ പ്രീമിയർ, ഈ അത്യാധുനിക സമുച്ചയം 2029-ഓടെ പൊതുജനങ്ങൾക്കായി തുറന്നുകൊടുക്കുമെന്നും പ്രഖ്യാപിച്ചു.
ഡോൺ മിൽസ് റോഡിലെയും എഗ്ലിന്റൺ അവന്യൂവിലെയും പഴയ കെട്ടിടത്തിന്റെ മേൽക്കൂര തകരാൻ സാധ്യതയുണ്ടെന്ന എഞ്ചിനീയറിംഗ് റിപ്പോർട്ടിനെ തുടർന്ന് 2024 ജൂണിലാണ് പഴയ സയൻസ് സെന്റർ അപ്രതീക്ഷിതമായി അടച്ചുപൂട്ടിയത്. താൽക്കാലികമായി ഹാർബർഫ്രണ്ട് സെന്ററിൽ ചില പ്രദർശനങ്ങൾ ഒരുക്കുന്നുണ്ടെങ്കിലും, സ്ഥിരമായ പുതിയ ശാസ്ത്രകേന്ദ്രം ഒന്റാറിയോ പ്ലേസിലേക്ക് മാറ്റാൻ പ്രവിശ്യാ ഭരണകൂടം നേരിട്ട് തീരുമാനിക്കുകയായിരുന്നു.
ടൊറന്റോയിലെ ഒന്റാറിയോ പ്ലേസ് വാട്ടർഫ്രണ്ടിൽ ഏകദേശം 400,000 ചതുരശ്ര അടി വിസ്തീർണ്ണത്തിലാണ് ഈ പുതിയ ശാസ്ത്രകേന്ദ്രം ഒരുങ്ങുന്നത്. 1.04 ബില്യൺ ഡോളർ നിർമ്മാണച്ചെലവ് പ്രതീക്ഷിക്കുന്ന ഈ പ്രൊജക്റ്റിന്റെ കരാർ ‘ഒന്റാറിയോ സയൻസ് പാർട്ണർമാർ’ എന്ന കൂട്ടായ്മയ്ക്കാണ് ലഭിച്ചിരിക്കുന്നത്. പുതിയ സമുച്ചയത്തിൽ കുറഞ്ഞത് 120,000 ചതുരശ്ര അടി വിസ്തീർണ്ണം ശാസ്ത്ര പ്രദർശനങ്ങൾക്കായി മാത്രം നീക്കിവയ്ക്കും. പഴയ കെട്ടിടത്തേക്കാൾ ഈ പുതിയ നിർമ്മിതിക്ക് 100,000 ചതുരശ്ര അടി വിസ്തീർണ്ണം കുറവായിരിക്കുമെങ്കിലും സ്ഥലത്തിന്റെ ഉപയോഗം കൂടുതൽ കാര്യക്ഷമമായിരിക്കുമെന്ന് ടൂറിസം മന്ത്രി സ്റ്റാൻ ചോ വ്യക്തമാക്കിയിട്ടുണ്ട്.
ആധുനികവൽക്കരിച്ച ഐമാക്സ് സിനിസ്ഫിയർ, നവീകരിച്ച പോഡുകൾ, അത്യാധുനിക മെയിൻലാൻഡ് കെട്ടിടം എന്നിവ ഇതിന്റെ പ്രധാന ആകർഷണങ്ങളായിരിക്കും. പദ്ധതി പൂർത്തിയാകുന്നതോടെ കാനഡയിലെ ഏറ്റവും വലിയ വിനോദസഞ്ചാര-വിദ്യാഭ്യാസ ലാൻഡ്മാർക്കുകളിൽ ഒന്നായി ഇത് മാറുമെന്നും, ആയിരത്തിലധികം തൊഴിലവസരങ്ങൾ സൃഷ്ടിക്കപ്പെടുമെന്നും സർക്കാർ അവകാശപ്പെടുന്നു.
ശാസ്ത്രകേന്ദ്രം ഒന്റാറിയോ പ്ലേസിലേക്ക് മാറ്റുന്നതിനെതിരെ പ്രതിപക്ഷ പാർട്ടികളും പരിസ്ഥിതി പ്രവർത്തകരും ഇപ്പോഴും ശക്തമായ പ്രതിഷേധത്തിലാണ്. കനത്ത മഞ്ഞുവീഴ്ചയും കഴിഞ്ഞ വർഷങ്ങളിലെ കനത്ത മഴയും അതിജീവിച്ചിട്ടും പഴയ കെട്ടിടത്തിന്റെ മേൽക്കൂരയ്ക്ക് തകരാറുകൾ ഒന്നും സംഭവിച്ചിട്ടില്ലെന്നും, അതിനാൽ ഈ സ്ഥലംമാറ്റവും കോടികളുടെ ചെലവും അനാവശ്യമാണെന്നുമാണ് വിമർശകരുടെ വാദം. കൂടാതെ, ഒന്റാറിയോ പ്ലേസ് പുനർവികസനത്തിന്റെ ഭാഗമായി നിർമ്മിക്കുന്ന വലിയ പാർക്കിംഗ് ഗാരേജ്, പുനർരൂപകൽപ്പന ചെയ്ത ആർ.ബി.സി ആംഫി തിയേറ്റർ, സ്വകാര്യ മേഖലയ്ക്കായി നിർമ്മിക്കുന്ന വിവാദ ലക്ഷ്വറി മെഗാ സ്പാ പദ്ധതി എന്നിവയും ഒന്റാറിയോയിൽ വലിയ രീതിയിലുള്ള രാഷ്ട്രീയ ആയുധമായി തുടരുകയാണ്
