ഒന്റാരിയോ പ്രവിശ്യയിൽ ഫ്രീഡം ഓഫ് ഇൻഫർമേഷൻ (FOI) അപേക്ഷകൾക്ക് മേൽ ഏർപ്പെടുത്തിയിരുന്ന താൽക്കാലിക വിലക്ക് പ്രവിശ്യാ സർക്കാർ ഔദ്യോഗികമായി പിൻവലിച്ചു. പുതിയ മാർഗ്ഗനിർദ്ദേശങ്ങൾ പുറപ്പെടുവിക്കുന്നതിന്റെ ഭാഗമായി ഒരാഴ്ചയിലധികമായി നിലനിന്നിരുന്ന ഈ നിയന്ത്രണം പൂർണ്ണമായും നീക്കിയതായി ഒന്റാരിയോ ഇൻഫർമേഷൻ ആൻഡ് പ്രൈവസി കമ്മീഷണറുടെ കാര്യാലയം സ്ഥിരീകരിച്ചു. പ്രീമിയർ ഡഗ് ഫോർഡിന്റെ ഭരണപരമായ തീരുമാനങ്ങൾക്കെതിരെ വലിയ വിമർശനങ്ങൾ ഉയർന്ന പശ്ചാത്തലത്തിലാണ് പുതിയ നീക്കം.
വിക്ടോറിയ ഡേ അവധിക്ക് മുന്നോടിയായാണ് പ്രവിശ്യാ സർക്കാരിലെ വിവിധ വകുപ്പുകളിൽ വിവരവകാശ അപേക്ഷകൾ കൈകാര്യം ചെയ്യുന്ന സിവിൽ സർവീസ് ഉദ്യോഗസ്ഥർക്ക് അപേക്ഷകൾ താൽക്കാലികമായി നിർത്തിവയ്ക്കാൻ ആഭ്യന്തര നിർദ്ദേശം ലഭിച്ചത്. പ്രീമിയർ, കാബിനറ്റ് അംഗങ്ങൾ, പാർലമെന്ററി അസിസ്റ്റന്റുമാർ, രാഷ്ട്രീയ ഉദ്യോഗസ്ഥർ എന്നിവരുടെ ഔദ്യോഗിക രേഖകൾ പുതിയ നിയമപ്രകാരം ഒഴിവാക്കുന്നതുമായി ബന്ധപ്പെട്ട മാർഗ്ഗനിർദ്ദേശങ്ങൾ രൂപീകരിക്കുന്നതിനാണ് ഈ വിലക്ക് ഏർപ്പെടുത്തിയത്. ഈ വിലക്ക് സംബന്ധിച്ച വിവരങ്ങൾ പ്രവിശ്യയിലെ സുതാര്യതാ നിരീക്ഷണ സമിതിയെപ്പോലും മുൻകൂട്ടി അറിയിക്കാതിരുന്നത് വലിയ രീതിയിൽ വാർത്തയായിരുന്നു.
വിവരവകാശ അപേക്ഷകൾ തടഞ്ഞുവെച്ച സർക്കാർ നടപടിയെ ന്യായീകരിച്ചുകൊണ്ട് പ്രീമിയർ ഡഗ് ഫോർഡ് രംഗത്തെത്തിയിരുന്നു. മാധ്യമങ്ങൾക്ക് മാത്രമാണ് ഇത്തരം സുതാര്യതാ നിയമങ്ങളിൽ താല്പര്യമെന്നും പൊതുജനങ്ങൾക്ക് ഇതിൽ പങ്കില്ലെന്നുമാണ് അദ്ദേഹം വെള്ളിയാഴ്ച മാധ്യമങ്ങളോട് പ്രതികരിച്ചത്. ഫെഡറൽ സർക്കാരിന്റെ നിയമങ്ങളുമായി പൊരുത്തപ്പെടുന്ന രീതിയിലാണ് പുതിയ മാറ്റങ്ങൾ കൊണ്ടുവരുന്നതെന്നും അദ്ദേഹം കൂട്ടിച്ചേർത്തു. എന്നാൽ പ്രതിപക്ഷ കക്ഷിയായ എൻ.ഡി.പി (NDP) നേതാവ് മരിറ്റ് സ്റ്റൈൽസ് ഉൾപ്പെടെയുള്ളവർ സർക്കാരിന്റെ ഈ നിലപാടിനെ രൂക്ഷമായി വിമർശിക്കുകയും സർക്കാർ വിവരങ്ങൾ ഒളിച്ചുവെക്കാൻ ശ്രമിക്കുകയാണെന്ന് ആരോപിക്കുകയും ചെയ്തു.
ഔദ്യോഗിക കണക്കുകൾ പ്രകാരം പ്രവിശ്യയിൽ ലഭിക്കുന്ന വിവരവകാശ അപേക്ഷകളിൽ ഭൂരിഭാഗവും സമർപ്പിക്കുന്നത് പൊതുജനങ്ങളും ബിസിനസ്സ് സ്ഥാപനങ്ങളുമാണ്.
