ട്രാക്ക് നവീകരണം; ടൊറന്റോയിലും മിസിസാഗയിലും രണ്ട് ദിവസത്തേക്ക് ഗോ ട്രെയിൻ സർവീസുകൾ മുടങ്ങും

No GO trains Lakeshore West line Toronto Mississauga

ടൊറന്റോ: ഈ വീക്കെൻഡിൽ (ശനി, ഞായർ) ടൊറന്റോയുടെ പടിഞ്ഞാറൻ മേഖലകളിലും സൗത്ത് മിസിസാഗ ഉൾപ്പെടെയുള്ള ഭാഗങ്ങളിലും ഗോ ട്രെയിൻ സർവീസുകൾ പൂർണ്ണമായി മുടങ്ങുമെന്ന് ഗതാഗത വകുപ്പ് അധികൃതർ അറിയിച്ചു. ലേക്‌ഷോർ വെസ്റ്റ് റെയിൽവേ ലൈനിലെ തിരക്കേറിയ ഭാഗങ്ങളിൽ അടിയന്തിര ട്രാക്ക് നവീകരണ ജോലികൾ നടക്കുന്നതിനാലാണ് ഈ നിയന്ത്രണം. മെയ് 30, 31 തീയതികളിൽ വെസ്റ്റ് ടൊറന്റോയിലെ മിമിക്കോ ഗോ സ്റ്റേഷൻ മുതൽ ബർലിംഗ്ടണിലെ ആൽഡർഷോട്ട് ഗോ വരെയുള്ള റൂട്ടിൽ ട്രെയിനുകൾ സർവീസ് നടത്തില്ലെന്ന് ഗവൺമെന്റ് ഏജൻസിയായ മെട്രോലിങ്ക്സ് വ്യക്തമാക്കി.

ഇതുമൂലം വെസ്റ്റ് ടൊറന്റോ, മിസിസാഗ, ഓക്‌വില്ലെ, ബർലിംഗ്ടൺ എന്നീ പ്രദേശങ്ങളിലെ യാത്രക്കാരെ ഈ തടസ്സം നേരിട്ട് ബാധിക്കും. മെയ് 29 വെള്ളിയാഴ്ച രാത്രി വൈകിയുള്ള ചില സർവീസുകളിലും മാറ്റങ്ങളുണ്ടാകും. എന്നാൽ തിങ്കളാഴ്ച രാവിലെ മുതൽ ഈ റൂട്ടിൽ ട്രെയിൻ സർവീസുകൾ സാധാരണ നിലയിലാകും.

സർവീസുകൾ ലഭ്യമാകുന്ന റൂട്ടുകൾ:

• നിയാഗ്ര ഫാൾസ് മുതൽ ആൽഡർഷോട്ട് ഗോ വരെയുള്ള ലേക്‌ഷോർ വെസ്റ്റ് ട്രെയിൻ സർവീസുകൾ സാധാരണ പോലെ തുടരും.

• വെസ്റ്റ് ടൊറന്റോയിലെ മിമിക്കോ ഗോ മുതൽ ഡൗൺടൗൺ ടൊറന്റോയിലെ യൂണിയൻ സ്റ്റേഷൻ  വരെയുള്ള റൂട്ടിലും ട്രെയിനുകൾ ലഭ്യമായിരിക്കും.

• ഈ രണ്ട് ദിവസങ്ങളിൽ മിമിക്കോ ഗോയ്ക്കും യൂണിയൻ സ്റ്റേഷനും ഇടയിൽ പ്രതിദിനം 15 മിനിറ്റ് ഇടവേളകളിൽ പ്രത്യേക ഗോ ട്രെയിനുകൾ സർവീസ് നടത്തും.

യാത്രക്കാർ ശ്രദ്ധിക്കേണ്ട ഇതര ക്രമീകരണങ്ങൾ:

ട്രാക്ക് അടച്ചിടുന്ന സാഹചര്യത്തിൽ യാത്രക്കാർക്കായി പ്രത്യേക GO റീപ്ലേസ്‌മെന്റ് ബസുകൾ അധികൃതർ ഏർപ്പെടുത്തിയിട്ടുണ്ട്. വെസ്റ്റ് ഹാർബർ, ആൽഡർഷോട്ട്, ബർലിംഗ്ടൺ, ഓക്‌വില്ലെ, ക്ലാർക്സൺ GO സ്റ്റേഷനുകളിൽ ഈ ബസുകൾ നിർത്തും. ഇവിടെ നിന്നുള്ള യാത്രക്കാരെ ബസുകൾ ബ്രാമലെയ GO സ്റ്റേഷനിൽ എത്തിക്കും. അവിടെ നിന്നും യാത്രക്കാർക്ക് കിച്ചണർ GO ലൈൻ വഴി ടൊറന്റോ യൂണിയൻ സ്റ്റേഷനിലേക്ക് കണക്റ്റിംഗ് ട്രെയിനുകൾ ലഭിക്കും.

അതേസമയം ആപ്പിൾബി, ബ്രോണ്ടി, പോർട്ട് ക്രെഡിറ്റ്, ലോംഗ് ബ്രാഞ്ച്  എന്നീ GO സ്റ്റേഷനുകളിൽ മെയ് 30, 31 തീയതികളിൽ യാതൊരുവിധ GO ട്രാൻസിറ്റ് സർവീസുകളും ലഭ്യമായിരിക്കില്ല. GO നെറ്റ്‌വർക്ക് വിപുലീകരണത്തിന്റെ ഭാഗമായി കൂടുതൽ വേഗതയേറിയതും കാര്യക്ഷമവുമായ ട്രെയിൻ സർവീസുകൾ ഭാവിയിൽ ലഭ്യമാക്കുന്നതിനാണ് ഈ അത്യാവശ്യ നവീകരണ ജോലികൾ നടത്തുന്നതെന്ന് മെട്രോലിങ്ക്സ് അറിയിച്ചു. ഇതര യാത്രാ മാർഗ്ഗങ്ങളെക്കുറിച്ചുള്ള കൂടുതൽ വിവരങ്ങൾ GO ട്രാൻസിറ്റ് വെബ്‌സൈറ്റിൽ ലഭ്യമാണ്.