വിദേശ യാത്രകളിൽ കനത്ത ജാഗ്രത വേണം; കാനഡയിൽ നിന്ന് വിദേശത്തേക്ക് പോകുന്നവർക്കായി പുതിയ യാത്രാ മുന്നറിയിപ്പ്

ഒട്ടാവ: മിഡിൽ ഈസ്റ്റിലെ സംഘർഷങ്ങളെത്തുടർന്നുണ്ടായ ആഗോള വിമാന ഇന്ധനക്ഷാമവും സുരക്ഷാഭീഷണികളും മുൻനിർത്തി കനേഡിയൻ പൗരന്മാർക്കായി പുതിയ യാത്രാ മുന്നറിയിപ്പ് പുറപ്പെടുവിച്ച് ഗ്ലോബൽ അഫയേഴ്സ് കാനഡ (Global Affairs Canada). മേയ് 12-ന് പ്രാബല്യത്തിൽ വന്ന ഈ ഉത്തരവ് മിഡിൽ ഈസ്റ്റിലേക്ക് പോകുന്നവർക്ക് മാത്രമല്ല, ഈ വേനൽക്കാലത്ത് ലോകത്തിന്റെ ഏത് ഭാഗത്തേക്ക് യാത്ര ചെയ്യുന്ന കനേഡിയൻ പൗരന്മാർക്കും ബാധകമാണ്. പൗരന്മാർക്ക് പുറമെ സ്ഥിരതാമസക്കാർ (PR), അന്തർദേശീയ വിദ്യാർത്ഥികൾ, താൽക്കാലിക വിദേശ തൊഴിലാളികൾ എന്നിവരും ഈ നിർദ്ദേശങ്ങൾ കർശനമായി പാലിക്കണമെന്ന് സർക്കാർ അറിയിച്ചിട്ടുണ്ട്.

മിഡിൽ ഈസ്റ്റിലെ സംഘർഷങ്ങൾ കാരണം ആഗോളതലത്തിൽ ഏവിയേഷൻ ഇന്ധന വിതരണത്തിൽ വലിയ തടസ്സങ്ങൾ നേരിടുന്നുണ്ട്. ഇത് വിമാന സർവീസുകൾ കൂട്ടത്തോടെ റദ്ദാക്കുന്നതിനും റൂട്ടുകൾ മാറ്റുന്നതിനും യാത്രാച്ചെലവ് കുത്തനെ ഉയരുന്നതിനും കാരണമായിട്ടുണ്ട്. ഈ സാഹചര്യത്തിൽ വിദേശരാജ്യങ്ങളിൽ കുടുങ്ങിപ്പോകുന്ന യാത്രക്കാർക്ക് കാനഡ സർക്കാർ യാതൊരുവിധ സാമ്പത്തിക സഹായവും നൽകില്ലെന്ന് ഒട്ടാവയിൽ നിന്നുള്ള ഔദ്യോഗിക അറിയിപ്പിൽ വ്യക്തമാക്കുന്നു. ചില അടിയന്തര ഘട്ടങ്ങളിൽ കോൺസുലർ സേവനങ്ങൾ പോലും പരിമിതമായിരിക്കുമെന്നതിനാൽ, യാത്രയുടെ പൂർണ്ണ ഉത്തരവാദിത്തം വ്യക്തികൾക്കായിരിക്കുമെന്ന് അധികൃതർ ഓർമ്മിപ്പിച്ചു.

യാത്രക്കാർ ശ്രദ്ധിക്കേണ്ട പ്രധാന കാര്യങ്ങൾ:

• ഇൻഷുറൻസ് ഉറപ്പാക്കുക: യാത്ര റദ്ദാക്കൽ, ഇന്ധനക്ഷാമം മൂലമുള്ള തടസ്സങ്ങൾ എന്നിവയ്ക്ക് നിങ്ങളുടെ ട്രാവൽ ഇൻഷുറൻസ് പരിരക്ഷ നൽകുന്നുണ്ടോ എന്ന് ഉറപ്പുവരുത്തണം. മാനുലൈഫ് (Manulife) പോലുള്ള പ്രമുഖ ഇൻഷുറൻസ് കമ്പനികൾ ഇന്ധനക്ഷാമവും പ്രാദേശിക തർക്കങ്ങളും മൂലമുണ്ടാകുന്ന തടസ്സങ്ങളെ നിലവിൽ ഇൻഷുറൻസ് പരിധിയിൽ നിന്ന് ഒഴിവാക്കിയിട്ടുണ്ട്.

• യാത്രാ രേഖകൾ: മടങ്ങിവരുന്ന തീയതിക്ക് ശേഷവും പാസ്‌പോർട്ടിന് കുറഞ്ഞത് ആറുമാസത്തെ കാലാവധി ഉണ്ടായിരിക്കണം. കഴിഞ്ഞ ഏപ്രിലിൽ പ്രാബല്യത്തിൽ വന്ന പുതിയ നിയമപ്രകാരം അടിയന്തര പാസ്‌പോർട്ട് അപേക്ഷകൾ 30 പ്രവൃത്തിദിവസത്തിനകം ലഭ്യമാകും.

• രജിസ്ട്രേഷൻ: വിദേശത്തേക്ക് തിരിക്കും മുൻപ് ‘റജിസ്ട്രേഷൻ ഓഫ് കനേഡിയൻസ് അബ്രോഡ്’ (ROCA) സേവനം വഴി യാത്ര നിർബന്ധമായും രജിസ്റ്റർ ചെയ്യണം.

• അടിയന്തര ഫണ്ട്: യാത്ര നീണ്ടുപോയാൽ താമസം, ഭക്ഷണം, മരുന്ന് എന്നിവയ്ക്കുള്ള അധിക തുകയും സാമ്പത്തിക മാർഗ്ഗങ്ങളും കയ്യിൽ കരുതണം.

ജൂൺ 1 മുതൽ നവംബർ 30 വരെയുള്ള അറ്റ്ലാന്റിക് ചുഴലിക്കാറ്റ് സീസൺ കൂടി വരുന്നതിനാൽ കരീബിയൻ, മെക്സിക്കോ, അമേരിക്കയുടെ തെക്കുകിഴക്കൻ മേഖലകൾ എന്നിവിടങ്ങളിലേക്ക് പോകുന്നവർ കൂടുതൽ ജാഗ്രത പാലിക്കണം. നിലവിൽ വിദേശത്തുള്ളവർ കാനഡ സർക്കാരിന്റെ ഔദ്യോഗിക വെബ്‌സൈറ്റായ ‘Travel.gc.ca’ വഴി യാത്രാ റൂട്ടുകളിലെ സുരക്ഷാ നിലവാരം നിരന്തരം പരിശോധിക്കേണ്ടതാണ്. അടിയന്തര സാഹചര്യങ്ങളിൽ സഹായത്തിനായി ഗ്ലോബൽ അഫയേഴ്സ് കാനഡയുടെ +1 613 996 8885 എന്ന നമ്പറിലോ SOS@international.gc.ca എന്ന ഇമെയിലിലോ ബന്ധപ്പെടാവുന്നതാണ്.