ടോറോന്റോ : ഒന്റാറിയോയിൽ 15 ബില്യൺ ഡോളർ നിക്ഷേപത്തിൽ ആരംഭിക്കാനിരുന്ന ഇലക്ട്രിക് വാഹന (EV) നിർമ്മാണ പ്ലാന്റ് പദ്ധതിയിൽ നിന്ന് ഹോണ്ട പിന്മാറുന്നതായി റിപ്പോർട്ടുകൾ. ജാപ്പനീസ് മാധ്യമങ്ങളെ ഉദ്ധരിച്ചുള്ള ഈ വാർത്ത കാനഡയിലെയും പ്രത്യേകിച്ച് ഒന്റാറിയോയിലെയും വ്യവസായ മേഖലയിൽ വലിയ ചർച്ചകൾക്ക് വഴിതുറന്നിരിക്കുകയാണ്. ദക്ഷിണ ഒന്റാറിയോയുടെ സാമ്പത്തിക മേഖലയ്ക്കും തൊഴിലവസരങ്ങൾക്കും വൻ മുന്നേറ്റം നൽകുമെന്ന് പ്രതീക്ഷിച്ചിരുന്ന പദ്ധതിയാണിത്.
ഒന്റാറിയോയിലെ അല്ലിസ്റ്റണിൽ നിലവിലുള്ള ഹോണ്ട പ്ലാന്റിനോട് ചേർന്ന് പുതിയ ബാറ്ററി യൂണിറ്റും ഇവി അസംബ്ലി ലൈനും സ്ഥാപിക്കാനായിരുന്നു നേരത്തെ തീരുമാനിച്ചിരുന്നത്. എന്നാൽ ആഗോളതലത്തിൽ ഇലക്ട്രിക് വാഹനങ്ങളുടെ വിപണിയിലുണ്ടായ ഇടിവും ഉൽപ്പാദന ചെലവിലെ വർദ്ധനവുമാണ് കമ്പനിയെ ഇത്തരമൊരു പുനർചിന്തയ്ക്ക് പ്രേരിപ്പിക്കുന്നതെന്ന് കരുതപ്പെടുന്നു. കനേഡിയൻ ഫെഡറൽ-പ്രൊവിൻഷ്യൽ സർക്കാരുകൾ നൽകുന്ന കോടിക്കണക്കിന് ഡോളറിന്റെ സബ്സിഡികൾ നിലനിൽക്കെയാണ് ഈ പുതിയ നീക്കം.
ഈ പദ്ധതി യാഥാർത്ഥ്യമായാൽ ആയിരക്കണക്കിന് നേരിട്ടുള്ള തൊഴിലവസരങ്ങളും അനുബന്ധ വ്യവസായങ്ങളിലായി പതിനായിരക്കണക്കിന് അവസരങ്ങളും സൃഷ്ടിക്കപ്പെടുമായിരുന്നു. . ഔദ്യോഗികമായ സ്ഥിരീകരണം ഹോണ്ടയുടെ ഭാഗത്തുനിന്ന് ഇതുവരെ ലഭ്യമായിട്ടില്ലെങ്കിലും, പ്രവിശ്യാ സർക്കാർ കമ്പനിയുമായി ചർച്ചകൾ തുടരുകയാണ്.
നിലവിൽ വോക്സ്വാഗൺ (Volkswagen), സ്റ്റെല്ലാന്റിസ് (Stellantis) തുടങ്ങിയ കമ്പനികൾ ഒന്റാറിയോയിൽ തങ്ങളുടെ ഇവി പ്ലാന്റുകളുടെ നിർമ്മാണം തുടരുന്നുണ്ട്. ഹോണ്ടയുടെ പിന്മാറ്റം കാനഡയുടെ ഇലക്ട്രിക് വാഹന ഹബ്ബ് എന്ന പദവിയെ ബാധിക്കുമോ എന്ന ആശങ്കയും ഉയരുന്നുണ്ട്. വരും ദിവസങ്ങളിൽ കമ്പനിയുടെ ഔദ്യോഗിക പ്രഖ്യാപനം ഉണ്ടാകുമെന്നാണ് സാമ്പത്തിക വിദഗ്ധർ വിലയിരുത്തുന്നത്.
