തിരഞ്ഞെടുപ്പ് വിജയാഹ്ലാദത്തിന്റെ പേരിൽ ആടിന്റെ തലയറുത്ത് പ്രദർശിപ്പിച്ച സംഭവത്തിൽ മലപ്പുറം മുസ്ലിം ലീഗ് പ്രവർത്തകർക്കെതിരെ തിരൂർ പോലീസ് കേസെടുത്തു. യൂത്ത് ലീഗ് പെരുനല്ലൂർ വാർഡ് സെക്രട്ടറിയും തൃപ്രങ്ങോട് പഞ്ചായത്ത് ഭാരവാഹിയുമായ മച്ചിങ്ങൽ റാഫി, ലീഗ് പ്രവർത്തകൻ ഷുഹൈബ് എന്നിവർക്കെതിരെയാണ് നടപടി. മൃഗങ്ങളോടുള്ള ക്രൂരത തടയുന്നതിനുള്ള നിയമം (Prevention of Cruelty to Animals Act), സോഷ്യൽ മീഡിയ വഴി ദൃശ്യങ്ങൾ പ്രചരിപ്പിച്ചതിന് ഐടി ആക്ട് എന്നിവ പ്രകാരമാണ് കേസെടുത്തിരിക്കുന്നത്.
ആട്ടിൻതല പ്രദർശനം; ആഹ്ലാദ പ്രകടനത്തിലെ ക്രൂരത
തിരഞ്ഞെടുപ്പ് ഫലപ്രഖ്യാപന ദിവസം തവനൂർ മണ്ഡലത്തിലെ തൃപ്രങ്ങോട് പെരുന്നല്ലൂർ അങ്ങാടിയിൽ നടന്ന യുഡിഎഫ് വിജയാഹ്ലാദ പ്രകടനത്തിനിടയിലാണ് വിവാദ സംഭവം അരങ്ങേറിയത്. ആടിന്റെ ചോരയിറ്റുന്ന തല പരസ്യമായി അറുത്തെടുക്കുകയും ലീഗിന്റെ കൊടിമരത്തിൽ കെട്ടി പ്രദർശിപ്പിക്കുകയുമായിരുന്നു. ഈ ദൃശ്യങ്ങൾ പകർത്തി സോഷ്യൽ മീഡിയയിൽ വ്യാപകമായി പ്രചരിപ്പിച്ചതോടെയാണ് സംഭവം പുറംലോകമറിയുന്നത്. രാഷ്ട്രീയ ആഘോഷങ്ങളിൽ ഇത്തരത്തിലുള്ള ക്രൂരതകൾ അനുവദിക്കാനാവില്ലെന്നും കുറ്റക്കാർക്കെതിരെ കർശന നടപടി വേണമെന്നും സിപിഎം തവനൂർ ഏരിയാ സെക്രട്ടറി കെ.വി. സുധാകരൻ ആവശ്യപ്പെട്ടിരുന്നു.
