ടൊറന്റോ: കാനഡയിലെ ടൊറന്റോ നഗരത്തിലെ അപ്പാർട്ട്മെന്റ് കെട്ടിടങ്ങളിലെ ജീവിതസാഹചര്യങ്ങൾ മെച്ചപ്പെടുത്തുന്നതിനും കെട്ടിട ഉടമകളുടെ (Landlords) ഉത്തരവാദിത്തം വർദ്ധിപ്പിക്കുന്നതിനുമായി ‘റെന്റ്സേഫ് ടൊറന്റോ’ (RentSafeTO) പദ്ധതി പരിഷ്കരിക്കാൻ സിറ്റി കൗൺസിൽ അംഗീകാരം നൽകി. ഭക്ഷണശാലകൾക്ക് ഗുണനിലവാരമനുസരിച്ച് ഗ്രേഡിംഗ് നൽകുന്ന ‘ഡൈൻ സേഫ്’ (DineSafe) മാതൃകയിൽ, അപ്പാർട്ട്മെന്റുകളുടെ പ്രവേശന കവാടങ്ങളിൽ അവയുടെ സുരക്ഷയും ശുചിത്വവും വ്യക്തമാക്കുന്ന നിറങ്ങളോടു കൂടിയ ബോർഡുകൾ പ്രദർശിപ്പിക്കണമെന്നതാണ് ചട്ടങ്ങളിലെ പ്രധാന മാറ്റം.
മൂന്നോ അതിലധികമോ നിലകളും പത്തോ അതിലധികമോ വീടുകളുമുള്ള അപ്പാർട്ട്മെന്റ് സമുച്ചയങ്ങൾക്കാണ് ഈ ഉപനിയമങ്ങൾ ബാധകമാകുന്നത്. കെട്ടിടത്തിന്റെ ഗുണനിലവാരമനുസരിച്ച് മൂന്ന് നിറങ്ങളിലുള്ള സ്റ്റിക്കറുകൾ ഇനി മുതൽ പ്രവേശന കവാടത്തിൽ കാണാം. 85 ശതമാനത്തിൽ കൂടുതൽ മാർക്ക് ലഭിക്കുന്ന കെട്ടിടങ്ങൾക്ക് ‘പച്ച’ (Green) സ്റ്റിക്കറും, 70 മുതൽ 84 ശതമാനം വരെ മാർക്ക് നേടുന്നവയ്ക്ക് ‘മഞ്ഞ’ (Yellow) സ്റ്റിക്കറും ലഭിക്കും. എന്നാൽ 69 ശതമാനത്തിൽ താഴെ മാർക്ക് ലഭിക്കുന്ന, ഗുരുതരമായ സുരക്ഷാ പ്രശ്നങ്ങളുള്ള കെട്ടിടങ്ങൾക്ക് ‘ചുവപ്പ്’ (Red) സ്റ്റിക്കർ നൽകും. ഇത് പുതിയ താമസക്കാർക്ക് ആ കെട്ടിടം തിരഞ്ഞെടുക്കണോ എന്ന കാര്യത്തിൽ വ്യക്തത നൽകാൻ സഹായിക്കും.
മുൻപ് മൂന്ന് വർഷത്തിലൊരിക്കലായിരുന്നു കെട്ടിട പരിശോധന നടന്നിരുന്നത് എങ്കിൽ ഇനി മുതൽ ഓരോ രണ്ട് വർഷം കൂടുമ്പോഴും കർശനമായ പരിശോധനകൾ സിറ്റിയുടെ ഭാഗത്തുനിന്ന് ഉണ്ടാകും. കെട്ടിടത്തിന്റെ ചുവരിലെ വിള്ളലുകൾ പോലുള്ള പുറംമോടിയേക്കാൾ, പൂപ്പൽ ബാധ (Mold), പാറ്റയും മൂട്ടയും ഉൾപ്പെടെയുള്ള കീടങ്ങളുടെ ശല്യം, പ്രവർത്തിക്കാത്ത ലിഫ്റ്റുകൾ, തകരാറിലായ പാചക ഉപകരണങ്ങൾ തുടങ്ങിയ അടിസ്ഥാന സൗകര്യങ്ങൾക്കും ആരോഗ്യ സുരക്ഷയ്ക്കുമാണ് പരിശോധനയിൽ കൂടുതൽ മാർക്ക് നൽകുക.
ചട്ടങ്ങൾ പാലിക്കാത്ത ഉടമകൾക്കെതിരെ കനത്ത പിഴയും ശിക്ഷാ നടപടികളും ഉണ്ടാകും. ചുവപ്പ് സ്റ്റിക്കർ ലഭിക്കുന്ന കെട്ടിടങ്ങളിൽ സിറ്റി ഉദ്യോഗസ്ഥർ ഓരോ വാതിലിലുമെത്തി വിവരങ്ങൾ ശേഖരിക്കും. ഉടമകൾ ആവശ്യമായ അറ്റകുറ്റപ്പണികൾ കൃത്യസമയത്ത് നടത്തിയില്ലെങ്കിൽ നഗരസഭ മുൻകൈ എടുത്ത് കരാറുകാരെ വെച്ച് പണികൾ പൂർത്തിയാക്കും. ഇതിന്റെ ചിലവ് കെട്ടിട ഉടമയുടെ വസ്തു നികുതിയിൽ (Property tax) ഉൾപ്പെടുത്തി ഈടാക്കുകയും ചെയ്യും. വാടകക്കാർക്ക് കൂടുതൽ സുതാര്യതയും ഉടമകൾക്ക് അച്ചടക്കവും നൽകുന്ന ഈ പരിഷ്കാരം ടൊറന്റോയിലെ മലയാളി കുടിയേറ്റക്കാർ ഉൾപ്പെടെയുള്ള ആയിരക്കണക്കിന് താമസക്കാർക്ക് വലിയ ആശ്വാസമാകുമെന്നാണ് കരുതപ്പെടുന്നത്.
