മലയാളിക്ക് വിഷു എന്നത് വെറുമൊരു ആഘോഷമല്ല, കാർഷിക സംസ്കാരത്തിന്റെയും വരുംവർഷത്തേക്കുള്ള സമൃദ്ധിയുടെയും പ്രതീക്ഷ കൂടിയാണ്. കണിക്കൊന്നയുടെ മഞ്ഞപ്പട്ടുടുത്ത മേടമാസത്തിലെ ആ പൊൻപുലരിയിൽ നന്മയുടെയും ഐശ്വര്യത്തിന്റെയും കാഴ്ചകൾ കണ്ട് ഉണരുക എന്നതാണ് വിഷുക്കണിയുടെ സങ്കല്പം.
കണി ഒരുക്കേണ്ട സമയം
വിഷുപ്പുലരിയിൽ ബ്രഹ്മമുഹൂർത്തത്തിലാണ് കണി കാണേണ്ടത്. സൂര്യോദയം 6 മണിക്കാണെങ്കിൽ പുലർച്ചെ 4:24 മുതൽ 5:12 വരെയാണ് ബ്രഹ്മമുഹൂർത്തം. വീടിന്റെ പൂജാമുറിയിലോ വടക്കു വശത്തോ വേണം കണിയൊരുക്കാൻ.
കണി ഒരുക്കാൻ ആവശ്യമായവ
വിളവെടുപ്പ് ഉത്സവമായതിനാൽ കാർഷിക വിളകൾക്കാണ് കണിയിൽ മുൻഗണന നൽകുന്നത്. പ്രധാനമായും വേണ്ട സാധനങ്ങൾ താഴെ പറയുന്നവയാണ്:
-
നിലവിളക്ക്, ഓട്ടുരുളി, ഓട്ടുകിണ്ടി (വെള്ളം നിറച്ചത്)
-
ധാന്യങ്ങൾ: ഉണക്കലരി, നെല്ല്
-
ഫലവർഗ്ഗങ്ങൾ: കണിവെള്ളരി, ചക്ക, മാങ്ങ, മാമ്പഴം, കദളിപ്പഴം, നാളികേരം
-
മംഗള ദ്രവ്യങ്ങൾ: വാൽക്കണ്ണാടി (ആറന്മുള കണ്ണാടി), കോടിമുണ്ട്, സ്വർണ്ണം, നാണയങ്ങൾ, വെറ്റില, അടയ്ക്ക
-
മറ്റുള്ളവ: കണിക്കൊന്ന പൂവ്, കൃഷ്ണ വിഗ്രഹം, ഗ്രന്ഥം (രാമായണമോ ഭാഗവതമോ), കുങ്കുമം, കൺമഷി
-
ദീപം: എള്ളെണ്ണ, തിരി
കണി ഒരുക്കുന്ന രീതി
-
ഉരുളി ഒരുക്കൽ: കഴുകി വൃത്തിയാക്കിയ ഓട്ടുരുളിയുടെ പകുതിയോളം ഉണക്കലരിയും നെല്ലും നിറയ്ക്കുക. ഇതിന് മുകളിൽ മുറിച്ച നാളികേരം വയ്ക്കുക.
-
വിഭവങ്ങൾ: ഉരുളിയിൽ കണിവെള്ളരി, ചക്ക, മാങ്ങ, കദളിപ്പഴം എന്നിവ ഭംഗിയായി ക്രമീകരിക്കുക.
-
വാൽക്കണ്ണാടി: ഇതിനൊപ്പം വാൽക്കണ്ണാടി കൂടി വയ്ക്കുക. ദൈവത്തിനൊപ്പം സ്വന്തം സ്വത്വത്തെയും കണ്ടുണരുക എന്നതാണ് ഇതിന് പിന്നിലെ സങ്കല്പം.
-
ദൈവസങ്കല്പം: ഉരുളിയുടെ പിന്നിലായി കൃഷ്ണവിഗ്രഹമോ ഫോട്ടോയോ വച്ച് കൊന്നപ്പൂക്കൾ കൊണ്ട് അലങ്കരിക്കുക.
-
മറ്റ് ദ്രവ്യങ്ങൾ: തൊട്ടടുത്തായി താലത്തിൽ കോടിമുണ്ട്, ഗ്രന്ഥം, സ്വർണ്ണം, നാണയങ്ങൾ എന്നിവ വയ്ക്കുക. വെറ്റിലയ്ക്കും അടയ്ക്കയ്ക്കും മുകളിലായി നാണയങ്ങൾ വെക്കുന്നതാണ് രീതി. കൺമഷിയും കുങ്കുമവും ഇതിനൊപ്പം കരുതുക.
-
ദീപം: നിലവിളക്കിൽ എള്ളെണ്ണ ഒഴിച്ച് അഞ്ച് തിരികൾ തെളിക്കുക. കിണ്ടിയിൽ ശുദ്ധജലം നിറച്ച് വിളക്കിനരികിൽ വയ്ക്കുക.
പുലർച്ചെ കൺതുറന്ന് ആദ്യം പ്രപഞ്ചനാഥനെയും പുണ്യദ്രവ്യങ്ങളെയും കണ്ടശേഷം കിണ്ടിയിലെ വെള്ളം കണ്ണിൽ തൊട്ടുവന്ദിക്കുന്നതോടെ കണിദർശനം പൂർത്തിയാകുന്നു. എല്ലാവർക്കും ഐശ്വര്യപൂർണ്ണമായ വിഷു ആശംസകൾ!
