ലണ്ടൻ/UK : ചെറിയൊരു മുറിവിൽ വളർത്തുനായ നക്കിയതിനെത്തുടർന്ന് ലണ്ടനിൽ താമസിക്കുന്ന മഞ്ജീത് സംഘ എന്ന 56-കാരിക്ക് രണ്ട് കൈകളും കാലുകളും നഷ്ടപ്പെട്ട വാർത്ത ലോകത്തെ നടുക്കിയിരിക്കുകയാണ്. അണുബാധയോട് ശരീരം അമിതമായി പ്രതികരിക്കുന്ന ‘സെപ്സിസ്’ (Sepsis) എന്ന അവസ്ഥയാണ് ഈ ഇന്ത്യൻ വംശജയെ മരണമുനമ്പിലെത്തിച്ചത്. 32 ആഴ്ച നീണ്ട ആശുപത്രി വാസത്തിനും ആറ് തവണയുണ്ടായ ഹൃദയാഘാതത്തിനും ശേഷമാണ് മഞ്ജീത് ജീവിതത്തിലേക്ക് തിരിച്ചുവന്നത്.
ജോലി കഴിഞ്ഞ് മടങ്ങിയെത്തിയ മഞ്ജീത്തിന് പെട്ടെന്നുണ്ടായ ശാരീരിക അസ്വസ്ഥതകളാണ് ദുരന്തത്തിന്റെ തുടക്കം. പിറ്റേന്ന് രാവിലെ ആയപ്പോഴേക്കും ബോധം നഷ്ടപ്പെടുകയും കൈകാലുകൾ നീല നിറമാവുകയും ചെയ്തു. നായയുടെ ഉമിനീരിലെ ബാക്ടീരിയ മുറിവിലൂടെ രക്തത്തിൽ കലർന്നതാണ് അണുബാധയ്ക്ക് കാരണമായത്. ജീവൻ രക്ഷിക്കാനായി ഡോക്ടർമാർക്ക് ഇവരുടെ രണ്ട് കൈകളും മുട്ടിന് താഴെ രണ്ട് കാലുകളും മുറിച്ചുമാറ്റേണ്ടി വന്നു. നിലവിൽ കൃത്രിമ കൈകാലുകൾ ഘടിപ്പിക്കുന്നതിനായുള്ള ധനസമാഹരണത്തിലാണ് ഇവർ.
എന്താണ് സെപ്സിസ്?
ശരീരത്തിലുണ്ടാകുന്ന അണുബാധയെ പ്രതിരോധിക്കാൻ നമ്മുടെ ഇമ്മ്യൂൺ സിസ്റ്റം അസാധാരണമായി പ്രവർത്തിക്കുകയും സ്വന്തം അവയവങ്ങളെ ആക്രമിക്കുകയും ചെയ്യുന്ന അവസ്ഥയാണിത്. വിറയൽ, പേശിവേദന, ശ്വാസംമുട്ടൽ, ചർമ്മത്തിന്റെ നിറം മാറുന്നത് എന്നിവയാണ് പ്രധാന ലക്ഷണങ്ങൾ. വളർത്തുമൃഗങ്ങൾ മുറിവുകളിൽ നക്കാൻ അനുവദിക്കരുത് എന്ന വലിയ പാഠമാണ് ഈ സംഭവം നൽകുന്നത്. മുറിവുകൾ എപ്പോഴും വൃത്തിയാക്കി മൂടിവെക്കാനും അസാധാരണമായ വീക്കമോ ചുവപ്പ് നിറമോ കണ്ടാൽ ഉടൻ ഡോക്ടറെ സമീപിക്കാനും ആരോഗ്യവിദഗ്ധർ മുന്നറിയിപ്പ് നൽകുന്നു.
