Indian student stabbed to death Canada
ടൊറന്റോ: കാനഡയിൽ ഉപരിപഠനം നടത്തിവന്നിരുന്ന ഇന്ത്യൻ വിദ്യാർത്ഥിനി കുത്തേറ്റു മരിച്ച നിലയിൽ കണ്ടെത്തി. ഗുജറാത്തിലെ ആനന്ദ് ജില്ലയിലെ ബോർസഡ് സ്വദേശിയായ വിദ്ധി കൽപ്പേഷ്ഭായ് മേഘാനി (22) ആണ് കാനഡയിലെ നയാഗ്ര റീജിയണിൽ ക്രൂരമായി കൊല്ലപ്പെട്ടത്. കഴിഞ്ഞ നാല് വർഷമായി കാനഡയിൽ സ്ഥിരതാമസമാക്കി പഠിച്ചുവരികയായിരുന്നു വിദ്ധി. കഴിഞ്ഞ മെയ് 15 മുതൽ ഇവരെ കാണാതായിരുന്നു. തുടർന്ന് കനേഡിയൻ അധികൃതർ നടത്തിയ വിപുലമായ തിരച്ചിലിനൊടുവിലാണ് മൃതദേഹം കണ്ടെത്തിയത്.
ഉന്നതവിദ്യാഭ്യാസവും മികച്ചൊരു കരിയറും സ്വപ്നം കണ്ട് വിദേശത്തെത്തിയ യുവതിയുടെ അപ്രതീക്ഷിത വിയോഗം ഗുജറാത്തിലെ അവരുടെ കുടുംബത്തെയും കാനഡയിലെ ഇന്ത്യൻ പ്രവാസി സമൂഹത്തെയും ഒരുപോലെ ആഘാതത്തിലാഴ്ത്തിയിരിക്കുകയാണ്.
മെയ് 15-ന് വിദ്ധിയെ കാണാതായതോടെ സുഹൃത്തുക്കളും അധികൃതരും പോലീസിൽ പരാതി നൽകിയിരുന്നു. തുടർന്ന് നടത്തിയ അന്വേഷണത്തിലാണ് നയാഗ്ര മേഖലയ്ക്ക് സമീപം കുത്തേറ്റ നിലയിൽ മൃതദേഹം കണ്ടെത്തുന്നത്. ആക്രമണത്തിന് പിന്നിലെ കൃത്യമായ കാരണവും സാഹചര്യവും എന്താണെന്ന് വ്യക്തമല്ലെന്ന് കനേഡിയൻ പോലീസ് അറിയിച്ചു.
ഇതൊരു ആസൂത്രിത കൊലപാതകമാണോ അതോ യാദൃശ്ചികമായി ഉണ്ടായ ആക്രമണമാണോ എന്ന് കണ്ടെത്താൻ പ്രത്യേക ക്രൈം ഇൻവെസ്റ്റിഗേഷൻ വിഭാഗം തെളിവുകൾ ശേഖരിച്ചുവരികയാണ്. സംഭവസ്ഥലത്തെ സിസിടിവി ദൃശ്യങ്ങളും ഡിജിറ്റൽ തെളിവുകളും പോലീസ് വിശദമായി പരിശോധിക്കുന്നുണ്ട്.
പഠനത്തോടൊപ്പം പാർട്ട് ടൈം ജോലിയും ചെയ്താണ് വിദ്ധി കാനഡയിലെ തന്റെ ജീവിതച്ചെലവുകൾ കണ്ടെത്തിയിരുന്നത്. കാനഡയിൽ PR നേടാനുള്ള തയ്യാറെടുപ്പിലായിരുന്നു ഇവർ എന്ന് സുഹൃത്തുക്കൾ ഓർമ്മിക്കുന്നു. കാനഡയിൽ അടുത്ത കാലത്തായി ഇന്ത്യൻ പൗരന്മാർക്കും വിദ്യാർത്ഥികൾക്കും നേരെ ഉണ്ടാകുന്ന അക്രമ സംഭവങ്ങൾ വർദ്ധിച്ചുവരുന്നത് വലിയ രീതിയിലുള്ള ആശങ്കകൾക്ക് കാരണമാകുന്നുണ്ട്.
ഒട്ടാവയിലെ ഇന്ത്യൻ ഹൈക്കമ്മീഷനും പ്രാദേശിക കമ്മ്യൂണിറ്റി അസോസിയേഷനുകളും വിഷയത്തിൽ ഇടപെട്ടിട്ടുണ്ട്. വിധിയുടെ കുടുംബത്തിന് ആവശ്യമായ നിയമസഹായങ്ങളും മൃതദേഹം എത്രയും വേഗം നാട്ടിലെത്തിക്കാനുള്ള നയതന്ത്ര നടപടികളും പുരോഗമിക്കുകയാണ്.
