Calgary to Drumheller FlixBus service
കാൽഗറി: കാനഡയിലെ പ്രശസ്തമായ വിനോദസഞ്ചാര കേന്ദ്രമായ ഡ്രംഹെല്ലറിലെ (Drumheller) വിസ്മയങ്ങൾ കാണാൻ ആഗ്രഹിക്കുന്ന സഞ്ചാരികൾക്ക് വലിയ ആശ്വാസമായി പുതിയ ബസ് സർവീസ് ആരംഭിച്ചു. പ്രമുഖ അന്താരാഷ്ട്ര ഇന്റർസിറ്റി ബസ് ശൃംഖലയായ ‘ഫ്ലിക്സ് ബസ്’ ആണ് കാൽഗറിയിൽ നിന്നും ഡ്രംഹെല്ലറിലേക്ക് നേരിട്ടുള്ള പുതിയ റൂട്ട് തുറന്നത്. സ്വന്തമായി വാഹനമില്ലാത്തവർക്കും കുറഞ്ഞ ചെലവിൽ യാത്ര ചെയ്യാൻ ആഗ്രഹിക്കുന്നവർക്കും ഈ പുതിയ തീരുമാനം വലിയ അനുഗ്രഹമാകും.
കാനഡയിലെ ആൽബർട്ട പ്രവിശ്യയിൽ സ്ഥിതി ചെയ്യുന്ന ഡ്രംഹെല്ലർ അവിടുത്തെ കൗതുകമുണർത്തുന്ന മലനിരകൾക്കും റോയൽ ടിറൽ മ്യൂസിയത്തിനും ഏറെ പ്രശസ്തമാണ്. വർഷം തോറും ലക്ഷക്കണക്കിന് ആളുകളാണ് ഇവിടം സന്ദർശിക്കുന്നത്. എന്നാൽ വർഷങ്ങളായി ഇവിടേക്ക് നേരിട്ടുള്ള പൊതുഗതാഗത സൗകര്യങ്ങൾ ലഭ്യമല്ലാതിരുന്നത് വിനോദസഞ്ചാരികളെയും തദ്ദേശവാസികളെയും ഒരുപോലെ ബുദ്ധിമുട്ടിച്ചിരുന്നു. പുതിയ സർവീസ് ആരംഭിച്ചതോടെ ഈ പ്രതിസന്ധിക്കാണ് ഇപ്പോൾ പരിഹാരമായിരിക്കുന്നത്.
നിലവിൽ ആഴ്ചയിൽ നാല് ദിവസങ്ങളിലാണ് (വെള്ളി, ശനി, ഞായർ, തിങ്കൾ) ഈ ബസ് സർവീസ് ലഭ്യമാകുക. ഒരു ദിവസം രണ്ട് സർവീസുകൾ വീതം ക്രമീകരിച്ചിട്ടുണ്ട്. കാൽഗറി ഡൗൺടൗൺ, വൈറ്റ്ഹോൺ എൽആർടി സ്റ്റേഷൻ, കാൽഗറി അന്താരാഷ്ട്ര വിമാനത്താവളം എന്നിവടങ്ങളിൽ നിന്നും ബസ് നേരിട്ട് ലഭ്യമാകും. വെറും 20 ഡോളറോളിൽ താഴെ തുകയ്ക്ക് യാത്രക്കാർക്ക് ടിക്കറ്റുകൾ സ്വന്തമാക്കാമെന്നതാണ് ഇതിന്റെ പ്രധാന ആകർഷണം. വരും ദിവസങ്ങളിൽ തിരക്കേറിയ വേനൽക്കാലത്ത് സർവീസുകളുടെ എണ്ണം ആഴ്ചയിൽ ആറ് ദിവസമായി വർദ്ധിപ്പിക്കുമെന്നും കമ്പനി അറിയിച്ചു.
ഇതിന് പുറമെ ഡ്രംഹെല്ലറിൽ എത്തുന്ന സഞ്ചാരികൾക്ക് പ്രദേശത്തെ പ്രധാന വിനോദസഞ്ചാര കേന്ദ്രങ്ങളായ ഹൂഡൂസ് , അറ്റ്ലസ് കോൾ മൈൻ നാഷണൽ ഹിസ്റ്റോറിക് സൈറ്റ് എന്നിവ സന്ദർശിക്കുന്നതിനായി ‘വാലി കണക്ട്’ എന്ന പേരിൽ സൗജന്യ ‘ഹോപ്പ്-ഓൺ, ഹോപ്പ്-ഓഫ്’ ഷട്ടിൽ ബസ് സർവീസും ഉടൻ ആരംഭിക്കും. ജൂൺ അവസാന വാരം മുതൽ ആരംഭിക്കുന്ന ഈ ഷട്ടിൽ ബസ് കൂടി ലഭ്യമാകുന്നതോടെ വിനോദസഞ്ചാരികൾക്ക് കാൽഗറിയിൽ നിന്നും ഡ്രംഹെല്ലറിലെത്തി സ്വന്തം വാഹനം ഇല്ലാതെ തന്നെ പൂർണ്ണമായും കമ്മ്യൂണിറ്റി സന്ദർശിക്കാൻ സാധിക്കും. ഈ പുതിയ ഗതാഗത സൗകര്യങ്ങൾ പ്രാദേശിക ടൂറിസം മേഖലയ്ക്കും ബിസിനസ്സുകൾക്കും വലിയ ഉണർവ് സമ്മാനിക്കുമെന്ന് ഡ്രംഹെല്ലർ അധികൃതരും വ്യക്തമാക്കിയിട്ടുണ്ട്.
Calgary to Drumheller FlixBus service
