Harshina medical negligence case
കോഴിക്കോട് മെഡിക്കൽ കോളേജിലെ പ്രസവ ശസ്ത്രക്രിയയ്ക്കിടെ വയറ്റിൽ കത്രിക കുടുങ്ങി വർഷങ്ങളോളം ദുരിതമനുഭവിച്ച അടിവാരം സ്വദേശി ഹർഷിനയ്ക്ക് കൈത്താങ്ങായി സംസ്ഥാന സർക്കാർ. ഹർഷിനയ്ക്ക് അർഹമായ നഷ്ടപരിഹാരവും അതോടൊപ്പം കോഴിക്കോട് മെഡിക്കൽ കോളേജിൽ തന്നെ സർക്കാർ ജോലിയും നൽകാൻ തീരുമാനമായി. മുഖ്യമന്ത്രി വി. ഡി. സതീശൻ, ആരോഗ്യമന്ത്രി കെ. മുരളീധരൻ എന്നിവരെ ഹർഷിന നേരിൽ കണ്ട് നടത്തിയ ചർച്ചകൾക്കൊടുവിലാണ് ഈ നിർണ്ണായക പ്രഖ്യാപനം ഉണ്ടായത്.
തനിക്ക് കോഴിക്കോട് മെഡിക്കൽ കോളേജിൽ ഓഫീസ് അറ്റൻഡന്റായി ജോലി നൽകാമെന്ന് ആരോഗ്യമന്ത്രി കെ. മുരളീധരൻ ഉറപ്പുനൽകിയതായി ഹർഷിന മാധ്യമങ്ങളോട് പറഞ്ഞു. കൂടാതെ ഹർഷിനയുടെ വീടിന്റെ അറ്റകുറ്റപ്പണികൾ നടത്തുന്നതിനുള്ള സഹായവും സർക്കാർ വാഗ്ദാനം ചെയ്തിട്ടുണ്ട്. പുതുതായി അധികാരമേറ്റ യുഡിഎഫ് സർക്കാരിന്റെ ആദ്യ മന്ത്രിസഭാ യോഗത്തിലെ തീരുമാനങ്ങളിൽ ഒന്നുകൂടിയാണ് ഇത്.
2017 നവംബർ 30 നാണ് കോഴിക്കോട് മെഡിക്കൽ കോളേജ് ആശുപത്രിയിൽ വെച്ച് ഹർഷിനയുടെ മൂന്നാമത്തെ പ്രസവ ശസ്ത്രക്രിയ നടക്കുന്നത്. ഈ ശസ്ത്രക്രിയയ്ക്കിടെ ഡോക്ടർമാർ അശ്രദ്ധമായി വയറ്റിൽ മറന്നുവെച്ച ആർട്ടറി ഫോർസെപ്സ് (കത്രിക പോലുള്ള ഉപകരണം) ഹർഷിനയുടെ മൂത്രസഞ്ചിയിൽ തറച്ചുനിൽക്കുകയായിരുന്നു. 12 സെന്റിമീറ്റർ നീളമുള്ള ഈ ഉപകരണം ശരീരത്തിനുള്ളിലിരുന്ന് നിരന്തരമായ കടുത്ത വേദനയ്ക്ക് കാരണമായി.
പല ആശുപത്രികളിലും മാറിമാറി ചികിത്സ തേടിയെങ്കിലും വേദനയ്ക്ക് കുറവുണ്ടായില്ല. ഒടുവിൽ 2022-ൽ ഒരു സ്വകാര്യ ആശുപത്രിയിൽ നടത്തിയ സിടി സ്കാനിംഗിലാണ് മൂത്രസഞ്ചിയിൽ കത്രിക തറച്ചിരിക്കുന്നത് കണ്ടെത്തിയത്. തുടർന്ന് മെഡിക്കൽ കോളേജിൽ വെച്ച് തന്നെ വീണ്ടും ശസ്ത്രക്രിയ നടത്തിയാണ് ഇത് പുറത്തെടുത്തത്. ശസ്ത്രക്രിയാ പിഴവ് മൂലം തന്റെ ഭർത്താവിന്റെ ബിസിനസ്സ് അടച്ചുപൂട്ടേണ്ടി വന്നതായും കൊടുംവേദന അനുഭവിക്കേണ്ടി വന്നതായും കാണിച്ച് ഹർഷിന വലിയ രീതിയിൽ സമരരംഗത്തുണ്ടായിരുന്നു.
തുടക്കത്തിൽ ഈ വീഴ്ച കോഴിക്കോട് മെഡിക്കൽ കോളേജിൽ വെച്ചല്ല സംഭവിച്ചതെന്ന നിലപാടിലായിരുന്നു അധികൃതർ. എന്നാൽ പിന്നീട് തെറ്റ് സമ്മതിക്കുന്ന ദൃശ്യങ്ങൾ പുറത്തുവന്നതോടെ ആശുപത്രി പ്രതിരോധത്തിലായി. തുടർന്ന് പോലീസ് നടത്തിയ അന്വേഷണത്തിൽ രണ്ട് ഡോക്ടർമാരെയും രണ്ട് നഴ്സുമാരെയും പ്രതികളാക്കി 750 പേജുകളുള്ള കുറ്റപത്രം സമർപ്പിച്ചിരുന്നു. നിലവിൽ ഈ കേസിൽ വിചാരണ നടപടികൾ പുരോഗമിക്കുകയാണ്. കൊടിയ വേദനകൾക്കും നീണ്ട സമരങ്ങൾക്കും ഒടുവിൽ ജോലി ലഭിച്ചതോടെ വലിയൊരു ആശ്വാസത്തിലാണ് ഹർഷിനയും കുടുംബവും.
