ഒട്ടാവ: കാനഡയിലെ വിവിധ ടെമ്പററി റസിഡന്റ് വിസകൾക്കായുള്ള പുതുക്കിയ പ്രോസസ്സിംഗ് സമയക്രമം ഇമിഗ്രേഷൻ വകുപ്പ് (IRCC) ഔദ്യോഗികമായി പുറത്തുവിട്ടു. ജൂൺ 17-ന് പ്രസിദ്ധീകരിച്ച പുതിയ കണക്കുകൾ പ്രകാരം വർക്ക് പെർമിറ്റ്, സന്ദർശക വിസ എന്നിവയ്ക്കുള്ള അപേക്ഷകരിൽ ചിലർക്ക് കാത്തിരിപ്പ് സമയം കുറഞ്ഞിട്ടുണ്ട്. കാനഡയ്ക്കുള്ളിൽ നിന്നുള്ള വർക്ക് പെർമിറ്റ് അപേക്ഷകളിൽ രണ്ടാഴ്ചയിലധികം ദിവസങ്ങളുടെ കുറവാണ് ഇത്തവണ രേഖപ്പെടുത്തിയത്. ഇന്ത്യ, നൈജീരിയ എന്നിവിടങ്ങളിൽ നിന്നുള്ള അപേക്ഷകർക്കും കാത്തിരിപ്പ് സമയം കുറഞ്ഞിട്ടുണ്ട്. അതേസമയം പാകിസ്ഥാൻ, അമേരിക്ക തുടങ്ങിയ രാജ്യങ്ങളിൽ നിന്നുള്ള സൂപ്പർ വിസ അപേക്ഷകരുടെ പ്രോസസ്സിംഗ് സമയത്തിൽ വലിയ വർദ്ധനവാണ് ഇത്തവണ ഉണ്ടായത്. അപേക്ഷകളുടെ എണ്ണവും പ്രോസസ്സിംഗ് ശേഷിയും വിലയിരുത്തി ആഴ്ചതോറും നടത്തുന്ന അവലോകനത്തിന്റെ ഭാഗമായാണ് ഐആർസിസി ഈ വിവരങ്ങൾ പുറത്തുവിട്ടത്.
ജൂൺ 10 മുതൽ ജൂൺ 17 വരെയുള്ള കണക്കുകൾ പരിശോധിക്കുമ്പോൾ വർക്ക് പെർമിറ്റ് വിഭാഗത്തിൽ വലിയ മാറ്റങ്ങളുണ്ട്. കാനഡയ്ക്കുള്ളിൽ നിന്ന് സമർപ്പിച്ച വർക്ക് പെർമിറ്റ് അപേക്ഷകളുടെ സമയം 186 ദിവസത്തിൽ നിന്നും 171 ദിവസമായി കുറഞ്ഞു. ഇന്ത്യ (9 ആഴ്ച), യുഎസ് (4 ആഴ്ച), ഫിലിപ്പീൻസ് (8 ആഴ്ച) എന്നീ രാജ്യങ്ങളിലെ കാത്തിരിപ്പ് സമയത്തിൽ ഇത്തവണ മാറ്റമില്ല. പാകിസ്ഥാനിൽ ഇത് 6 ആഴ്ചയിൽ നിന്ന് 5 ആഴ്ചയായും നൈജീരിയയിൽ 17 ആഴ്ചയിൽ നിന്ന് 16 ആഴ്ചയായും കുറഞ്ഞിട്ടുണ്ട്. പഠന പെർമിറ്റുകളുടെ (Study Permits) കാത്തിരിപ്പ് സമയത്തിൽ ഈ ആഴ്ച മാറ്റങ്ങളൊന്നും രേഖപ്പെടുത്തിയിട്ടില്ല. ഇന്ത്യ (5 ആഴ്ച), കാനഡ (6 ആഴ്ച), പാകിസ്ഥാൻ (6 ആഴ്ച) എന്നിങ്ങനെ മുൻ ആഴ്ചയിലെ അതേ പ്രോസസ്സിംഗ് സമയം തന്നെയാണ് തുടരുന്നത്.
സന്ദർശക വിസകളിൽ കാനഡ, നൈജീരിയ ഒഴികെയുള്ള രാജ്യങ്ങളിൽ നിന്നുള്ള അപേക്ഷകർക്ക് സമയക്കുറവ് അനുഭവപ്പെട്ടു. ഇന്ത്യയിൽ നിന്നുള്ള വിസ സമയം 26 ദിവസത്തിൽ നിന്ന് 24 ദിവസമായി കുറഞ്ഞു. പാകിസ്ഥാനിൽ ഇത് 43 ദിവസമായും ഫിലിപ്പീൻസിൽ 17 ദിവസമായും കുറഞ്ഞിട്ടുണ്ട്. എന്നാൽ കാനഡയ്ക്കുള്ളിൽ നിന്നും നൈജീരിയയിൽ നിന്നുമുള്ള കാത്തിരിപ്പ് സമയം യഥാക്രമം 44 ദിവസമായും 53 ദിവസമായും വർദ്ധിച്ചു. മാതാപിതാക്കൾക്കായുള്ള സൂപ്പർ വിസകളുടെ പ്രോസസ്സിംഗ് സമയം ഭൂരിഭാഗം രാജ്യങ്ങളിലും ഇത്തവണ വർദ്ധിച്ചിട്ടുണ്ട്. പാകിസ്ഥാനിൽ 11 ദിവസത്തെയും ഫിലിപ്പീൻസിൽ 7 ദിവസത്തെയും വർദ്ധനവുണ്ടായപ്പോൾ ഇന്ത്യയിൽ ഇത് 110 ദിവസമായി ഉയർന്നു.
ഐആർസിസി പ്രസിദ്ധീകരിക്കുന്ന ഈ പ്രോസസ്സിംഗ് സമയം മുൻകാല വിവരങ്ങൾ അടിസ്ഥാനമാക്കിയുള്ള ഏകദേശ മാർഗ്ഗനിർദ്ദേശം മാത്രമാണ്. സാധാരണ സാഹചര്യങ്ങളിൽ 80 ശതമാനം അപേക്ഷകളും തീർപ്പാക്കാൻ ഏജൻസി നിശ്ചയിച്ചിട്ടുള്ള ആന്തരിക ബെഞ്ച്മാർക്കാണ് സേവന മാനദണ്ഡം. അപേക്ഷകളുടെ പശ്ചാത്തലവും ബാക്ക്ലോഗുകളും അനുസരിച്ച് യഥാർത്ഥ പ്രോസസ്സിംഗ് സമയത്തിൽ വ്യത്യാസങ്ങൾ വരാം. ടെംപോററി വിസകളുടെ സേവന മാനദണ്ഡം അവസാനമായി പുതുക്കിയത് 2018–2019 കാലയളവിലാണ്.
