കിച്ചനർ-വാട്ടർലൂ : കോണസ്റ്റോഗ കോളേജിന്റെ ഭരണനിർവ്വഹണത്തിനായി ഒന്റാരിയോ സർക്കാർ പ്രത്യേക സൂപ്പർവൈസറെ നിയമിച്ചു. കോളേജിലെ സാമ്പത്തിക മാനേജ്മെന്റിലും ഭരണപരമായ കാര്യങ്ങളിലും ഗുരുതരമായ വീഴ്ചകൾ കണ്ടെത്തിയ ഓഡിറ്റ് റിപ്പോർട്ടിനെത്തുടർന്നാണ് ഉന്നതവിദ്യാഭ്യാസ മന്ത്രാലയത്തിന്റെ ഈ അടിയന്തര ഇടപെടൽ.
കോളേജിന്റെ സാമ്പത്തിക വിനിയോഗത്തിൽ സുതാര്യതയില്ലെന്നും നയപരമായ തീരുമാനങ്ങളിൽ വലിയ അപാകതകൾ ഉണ്ടെന്നും കണ്ടെത്തിയതിനെത്തുടർന്നാണ് സർക്കാർ നടപടി ശക്തമാക്കിയത്. സ്വതന്ത്ര ഓഡിറ്റിംഗിൽ ഉയർന്നുവന്ന കണ്ടെത്തലുകൾ ഗൗരവകരമാണെന്ന് ഒന്റാരിയോ കോളേജസ് ആൻഡ് യൂണിവേഴ്സിറ്റി മന്ത്രി വ്യക്തമാക്കി. നിലവിലുള്ള ബോർഡ് ഓഫ് ഗവർണേഴ്സിന്റെ അധികാരം താൽക്കാലികമായി റദ്ദാക്കിക്കൊണ്ടാണ് സർക്കാർ നിയമിച്ച അഡ്മിനിസ്ട്രേറ്റർ ചുമതലയേൽക്കുന്നത്.
കോളേജിന്റെ ദൈനംദിന പ്രവർത്തനങ്ങളെയും നിലവിൽ പഠിച്ചുകൊണ്ടിരിക്കുന്ന വിദ്യാർത്ഥികളുടെ അക്കാദമിക് ഭാവിയെയും ഈ മാറ്റങ്ങൾ ബാധിക്കില്ലെന്ന് അധികൃതർ അറിയിച്ചിട്ടുണ്ട്. ഭരണരംഗത്തെ ശുദ്ധീകരണവും സാമ്പത്തിക അച്ചടക്കം ഉറപ്പാക്കുകയുമാണ് സർക്കാരിന്റെ പ്രാഥമിക ലക്ഷ്യം. എന്നിരുന്നാലും, അന്താരാഷ്ട്ര വിദ്യാർത്ഥി പ്രവേശനം ഉൾപ്പെടെയുള്ള ഭാവി നയങ്ങളിൽ പുതിയ ഭരണസംവിധാനം എത്തരത്തിലുള്ള മാറ്റങ്ങൾ കൊണ്ടുവരുമെന്നത് കാത്തിരുന്നു കാണേണ്ടതാണ്.
കാനഡയിലെ, പ്രത്യേകിച്ച് ഒന്റാരിയോയിലെ ഉന്നതവിദ്യാഭ്യാസ മേഖലയിൽ സമീപകാലത്തുണ്ടായ ഏറ്റവും വലിയ ഭരണപരമായ ഇടപെടലുകളിൽ ഒന്നാണിത്. ലണ്ടൻ, കിച്ചനർ-വാട്ടർലൂ മേഖലകളിൽ താമസിക്കുന്ന ആയിരക്കണക്കിന് മലയാളി വിദ്യാർത്ഥികൾക്ക് നേരിട്ട് ബന്ധമുള്ള സ്ഥാപനമായതിനാൽ, വാർത്ത വലിയ ആശ്ച്ചര്യത്തോടു നോക്കിക്കാണുന്നത്. കോളേജിന്റെ പ്രവർത്തനം കൂടുതൽ സുതാര്യമാക്കാൻ ഈ നടപടി സഹായിക്കുമെന്നാണ് മന്ത്രാലയത്തിന്റെ പ്രതീക്ഷ.
