Ontario auto theft ring Project Jack Links
ടൊറന്റോ: ദക്ഷിണ ഒന്റാറിയോയിൽ കോടികളുടെ ആഡംബര കാറുകൾ മോഷ്ടിച്ച് വിദേശത്തേക്ക് കടത്തുന്ന വൻ സംഘത്തെ തകർത്ത് കനേഡിയൻ പൊലീസ്. ‘പ്രോജക്റ്റ് ജാക്ക് ലിങ്ക്സ്’ എന്ന് പേരിട്ട പ്രത്യേക അന്വേഷണത്തിലൂടെയാണ് നയാഗ്ര റീജിയണൽ പൊലീസ് അന്താരാഷ്ട്ര വാഹനക്കവർച്ചാ ശൃംഖലയെ പൂട്ടിയത്. ഈ സംഘത്തിൽ നിന്നും ഏകദേശം 5.5 മില്യൺ ഡോളർ (ഏകദേശം 45 കോടിയിലധികം രൂപ) വിലമതിക്കുന്ന മോഷ്ടിച്ച ആഡംബര വാഹനങ്ങൾ പൊലീസ് വീണ്ടെടുത്തു.
ഈ തട്ടിപ്പ് സംഘം വഴി ഒന്റാറിയോയിൽ ഇതുവരെ 20 മില്യൺ ഡോളറിന്റെ നഷ്ടം സംഭവിച്ചിട്ടുണ്ടെന്നാണ് ഡിറ്റക്ടീവുകൾ കണക്കാക്കുന്നത്. ഇതിൽ 14 മില്യൺ ഡോളറിലധികം വിലവരുന്ന വാഹനങ്ങൾ ഇനിയും കണ്ടെത്താനുണ്ട്.
2025 ഏപ്രിലിൽ ഒരു ലക്സസ് എസ്യുവി മോഷ്ടിക്കപ്പെട്ടതുമായി ബന്ധപ്പെട്ട് നടന്ന അന്വേഷണമാണ് ഈ വൻ മാഫിയയിലേക്ക് പൊലീസിനെ എത്തിച്ചത്. നയാഗ്ര മേഖലയിൽ മാത്രം പുതിയ മോഡൽ ലക്സസ്, ടൊയോട്ട വാഹനങ്ങൾ മോഷ്ടിക്കാൻ ശ്രമിച്ച 50-ലധികം സംഭവങ്ങളാണ് ഈ സംഘത്തിന് എതിരെ രജിസ്റ്റർ ചെയ്തിട്ടുള്ളത്.
സ്വതന്ത്രമായി പ്രവർത്തിക്കുന്ന ഒന്നിലധികം ക്രിമിനൽ സംഘങ്ങൾ ഒത്തുചേർന്നാണ് ഈ ശൃംഖല രൂപീകരിച്ചിരിക്കുന്നത്. ഒന്റാറിയോയിലെ നയാഗ്ര, ഹാമിൽട്ടൺ, ബ്രാൻഫോർഡ്, ഓക്ക്വില്ലെ, ബർലിംഗ്ടൺ, ലണ്ടൻ, വാട്ടർലൂ, കേംബ്രിഡ്ജ്, ടൊറന്റോ തുടങ്ങി വിവിധ നഗരങ്ങളിലായി 112-ലധികം കവർച്ചാ കേസുകളിൽ ഇവർക്ക് പങ്കുണ്ടെന്ന് പൊലീസ് കണ്ടെത്തി. മോഷ്ടിക്കുന്ന വാഹനങ്ങൾ പടിഞ്ഞാറൻ ആഫ്രിക്കൻ രാജ്യങ്ങളിലേക്ക് കടത്താനായി മോൺട്രിയൽ തുറമുഖത്ത് എത്തിക്കുകയായിരുന്നു ഇവരുടെ രീതി.
കേസുമായി ബന്ധപ്പെട്ട് ഒന്റാറിയോയുടെ വിവിധ ഭാഗങ്ങളിൽ നിന്നായി പ്രായപൂർത്തിയാകാത്ത കുട്ടികൾ ഉൾപ്പെടെ നിരവധി പേരെ പൊലീസ് അറസ്റ്റ് ചെയ്തു. മിസിസാഗ, ഓക്ക്വില്ലെ, ഹാമിൽട്ടൺ എന്നിവിടങ്ങളിൽ നടത്തിയ റെയ്ഡുകളിലാണ് പ്രതികൾ പിടിയിലായത്. നിലവിൽ ഒളിവിലുള്ള രണ്ട് പ്രതികൾക്കായി പൊലീസ് തിരച്ചിൽ നോട്ടീസ് പുറപ്പെടുവിച്ചിട്ടുണ്ട്. വരും ആഴ്ചകളിൽ കൂടുതൽ അറസ്റ്റുണ്ടാകുമെന്നാണ് സൂചന.
കാനഡയിൽ ആഡംബര വാഹനങ്ങൾ കേന്ദ്രീകരിച്ചുള്ള കവർച്ചകൾ വർദ്ധിച്ചുവരുന്ന സാഹചര്യത്തിൽ പൊതുജനങ്ങൾ ജാഗ്രത പാലിക്കണമെന്ന് പൊലീസ് ഓർമ്മിപ്പിച്ചു. വാഹനം എപ്പോഴും ലോക്ക് ചെയ്യുക, വിലപിടിപ്പുള്ള സാധനങ്ങളും കീ ഫോബുകളും കാറിനുള്ളിൽ വെക്കാതിരിക്കുക, കൂടുതൽ സുരക്ഷയ്ക്കായി സ്റ്റിയറിംഗ് വീൽ ലോക്കുകളോ ട്രാക്കിംഗ് ഡിവൈസുകളോ ഉപയോഗിക്കുക എന്നിവയാണ് പ്രധാന നിർദ്ദേശങ്ങൾ.
