ലണ്ടൻ: നിത്യോപയോഗ സാധനങ്ങളുടെയും ഗ്രോസറികളുടെയും വർധിച്ചുവരുന്ന വിലക്കയറ്റത്തിൽ വലയുന്ന സാധാരണക്കാർക്ക് ആശ്വാസമേകി കാനഡ ഗവൺമെന്റ് പുതിയ സാമ്പത്തിക സഹായം പ്രഖ്യാപിച്ചു. കാനഡ റെവന്യൂ ഏജൻസി (CRA) മുഖേന നൽകുന്ന ‘കാനഡ ഗ്രോസറീസ് ആൻഡ് എസൻഷ്യൽസ് ബെനിഫിറ്റ്’ (Canada Groceries and Essentials Benefit) പദ്ധതിയുടെ ഭാഗമായുള്ള ഒറ്റത്തവണ ടോപ്പ്-അപ്പ് പേയ്മെന്റ് 2026 ജൂൺ 5-ന് വിതരണം ചെയ്യും.
നിലവിലുള്ള ജിഎസ്ടി/എച്ച്എസ്ടി (GST/HST) ക്രെഡിറ്റ് സംവിധാനത്തിന് പകരമായി വരാനിരിക്കുന്ന പുതിയ പദ്ധതിയുടെ തുടക്കമായാണ് ഈ ടോപ്പ്-അപ്പ് തുക അനുവദിച്ചിരിക്കുന്നത്. 2025-26 വർഷത്തെ ആകെ ജിഎസ്ടി ക്രെഡിറ്റിന്റെ 50 ശതമാനത്തിന് തുല്യമായ തുകയാണ് ജൂൺ അഞ്ചിന് അർഹരായവരുടെ അക്കൗണ്ടുകളിലെത്തുക. രാജ്യത്തെ ഏകദേശം 1.2 കോടിയിലധികം പേർക്ക് ഈ സഹായം ലഭിക്കുമെന്നാണ് ഔദ്യോഗിക കണക്കുകൾ സൂചിപ്പിക്കുന്നത്.
ഈ പുതിയ പദ്ധതി പ്രകാരം നാലംഗങ്ങളുള്ള ഒരു കുടുംബത്തിന് ടോപ്പ്-അപ്പ് ഉൾപ്പെടെ 2026-ൽ 1,890 ഡോളർ വരെ ലഭിക്കാൻ സാധ്യതയുണ്ട്. ഒറ്റയ്ക്ക് താമസിക്കുന്നവർക്ക് 950 ഡോളർ വരെയും സഹായം ലഭിക്കും. ഇതിന് പുറമെ ജൂലൈ മാസം മുതൽ നിലവിലുള്ള ക്വാർട്ടർലി പേയ്മെന്റുകളിൽ 25 ശതമാനം വർധനവ് അടുത്ത അഞ്ച് വർഷത്തേക്ക് നടപ്പിലാക്കാനും ഗവൺമെന്റ് തീരുമാനിച്ചു. നികുതി റിട്ടേണുകൾ കൃത്യമായി ഫയൽ ചെയ്യുന്നവർക്ക് ഈ ആനുകൂല്യങ്ങൾ തടസ്സമില്ലാതെ ലഭിക്കും.
സാമ്പത്തിക സഹായത്തിന് പുറമെ, ഇന്ധനവിലയിലെ വർധനവ് കുറയ്ക്കുന്നതിനായി ഫെഡറൽ എക്സൈസ് ടാക്സ് താൽക്കാലികമായി ഒഴിവാക്കുമെന്നും ഗവൺമെന്റ് അറിയിച്ചു. സെപ്റ്റംബർ 7 വരെ നീണ്ടുനിൽക്കുന്ന ഈ ഇളവ് വഴി ലിറ്ററിന് 10 സെന്റ് വരെ കുറവ് പ്രതീക്ഷിക്കാം. ഈ ആനുകൂല്യങ്ങൾ ലഭിക്കുന്നതിനായി CRA ‘മൈ അക്കൗണ്ട്’ വഴി ബാങ്ക് വിവരങ്ങൾ അപ്ഡേറ്റ് ചെയ്തിട്ടുണ്ടെന്ന് ഉറപ്പുവരുത്താൻ അധികൃതർ നിർദ്ദേശിക്കുന്നു.
-
പേയ്മെന്റ് തീയതി: 2026 ജൂൺ 5.
-
അർഹത: 2024-ലെ ടാക്സ് റിട്ടേൺ ഫയൽ ചെയ്ത, നിലവിൽ ജിഎസ്ടി ക്രെഡിറ്റിന് അർഹരായവർ.
-
പേര് മാറ്റം: 2026 ജൂലൈ 3 മുതൽ ജിഎസ്ടി ക്രെഡിറ്റ് ‘കാനഡ ഗ്രോസറീസ് ആൻഡ് എസൻഷ്യൽസ് ബെനിഫിറ്റ്’ എന്ന പേരിൽ അറിയപ്പെടും.
-
സഹായം: വരുമാനമനുസരിച്ച് ഒറ്റത്തവണ പേയ്മെന്റായി ഏകദേശം 267 ഡോളർ മുതൽ 533 ഡോളർ വരെ ഉടൻ ലഭിക്കും.
