കാനഡ-യുഎസ് വ്യാപാര തർക്കം: കനേഡിയൻമാരുടെ അമർഷം മനസ്സിലാകുന്നില്ലെന്ന് ട്രംപിന്റെ നയതന്ത്രജ്ഞൻ പീറ്റ് ഹൂക്‌സ്ട്ര

ഒട്ടാവ: കാനഡയും അമേരിക്കയും തമ്മിലുള്ള വ്യാപാര തർക്കങ്ങൾ കനക്കുന്നതിനിടയിൽ, കനേഡിയൻ ജനതയുടെ പ്രതികരണങ്ങളെ തള്ളിക്കളഞ്ഞ് യുഎസ് അംബാസഡർ പീറ്റ് ഹൂക്‌സ്ട്ര. കാനഡയോടുള്ള ട്രംപ് ഭരണകൂടത്തിന്റെ കടുത്ത വ്യാപാര നയങ്ങളിൽ കനേഡിയൻമാർക്ക് എന്തുകൊണ്ടാണ് ഇത്രയധികം നിരാശ എന്ന് തനിക്ക് മനസ്സിലാകുന്നില്ലെന്ന് അദ്ദേഹം തുറന്നടിച്ചു. അമേരിക്ക ലോകത്തെ എല്ലാ രാജ്യങ്ങൾക്കും മേൽ താരിഫുകൾ ചുമത്തുന്നുണ്ടെന്നും, കാനഡ അതിൽ പ്രത്യേകം പരിഭവിച്ചിട്ട് കാര്യമില്ലെന്നുമാണ് 72 കാരനായ ഈ റിപ്പബ്ലിക്കൻ നേതാവിന്റെ നിലപാട്.

അമേരിക്കൻ പ്രസിഡന്റ് ഡൊണാൾഡ് ട്രംപിന്റെ അടുത്ത അനുയായിയായ പീറ്റ് ഹൂക്‌സ്ട്ര 2025 ഏപ്രിലിലാണ് ഒട്ടാവയിൽ യുഎസ് അംബാസഡറായി നിയമിതനായത്. കാനഡയിലെ മാർക്ക് കാർണി സർക്കാരിന്റെ വ്യാപാര നയങ്ങളിലുള്ള കടുത്ത അതൃപ്തി അദ്ദേഹം മറച്ചുവെച്ചില്ല.

മദ്യം നിരോധിച്ചതിൽ കടുത്ത അതൃപ്തി:

ട്രംപ് സർക്കാർ കാനഡയിൽ നിന്നുള്ള ചെമ്പ്, ഓട്ടോമൊബൈൽ, മരം, സ്റ്റീൽ, അലുമിനിയം എന്നിവയ്ക്ക് മേൽ ഏർപ്പെടുത്തിയ നികുതികൾക്ക് (Section 232 Tariffs) പ്രതികാരമായി കാനഡയിലെ ഭൂരിഭാഗം പ്രവിശ്യകളും അമേരിക്കൻ മദ്യങ്ങൾ ഔദ്യോഗിക സ്റ്റോറുകളിൽ നിന്നും ഒഴിവാക്കിയിരുന്നു. ഈ നടപടി തികച്ചും അന്യായമാണെന്ന് അംബാസഡർ കുറ്റപ്പെടുത്തി. കാനഡയ്ക്ക് അമേരിക്കയുമായി ബിസിനസ്സ് ചെയ്യാൻ താല്പര്യമില്ല എന്നതിന്റെ വ്യക്തമായ സൂചനയാണിത്.

മദ്യ നിരോധനം പിൻവലിച്ചാൽ പോലും അമേരിക്ക നിലവിലെ താരിഫുകളിൽ യാതൊരു ഇളവും നൽകില്ലെന്നും അദ്ദേഹം വ്യക്തമാക്കി. കൂടാതെ, കാനഡയിലെ പ്രവിശ്യകൾ തദ്ദേശീയ ഉൽപ്പന്നങ്ങൾ മാത്രം വാങ്ങാൻ പ്രോത്സാഹിപ്പിക്കുന്നതും അമേരിക്കയിലേക്കുള്ള യാത്രകൾ ഒഴിവാക്കാൻ രാഷ്ട്രീയക്കാർ ആഹ്വാനം ചെയ്യുന്നതും ശരിയല്ലെന്ന് അദ്ദേഹം കൂട്ടിച്ചേർത്തു. ഒന്റാറിയോ പ്രീമിയർ ഡഗ് ഫോർഡ് അമേരിക്കൻ നയങ്ങളിൽ പ്രതിഷേധിച്ച് തന്റെ വാർഷിക ഫ്ലോറിഡ യാത്ര റദ്ദാക്കിയത് ഹൂക്‌സ്ട്ര ചൂണ്ടിക്കാണിച്ചു.

പ്രതിരോധ ചെലവുകളിലെ അവ്യക്തത:

കാനഡയും യുഎസും തമ്മിലുള്ള 1940 മുതലുള്ള സംയുക്ത സൈനിക ആസൂത്രണ സമിതിയിൽ നിന്നുള്ള പങ്കാളിത്തം പെന്റഗൺ ഈയടുത്ത് നിർത്തിവെച്ചിരുന്നു. എങ്കിലും, കാനഡ ചരിത്രത്തിലാദ്യമായി തങ്ങളുടെ പ്രതിരോധ ബജറ്റ് ജിഡിപിയുടെ 2 ശതമാനത്തിലേക്ക് ഉയർത്തിയതിനെ അംബാസഡർ അഭിനന്ദിച്ചു. എന്നാൽ, നാറ്റോയുടെ (NATO) പുതിയ ലക്ഷ്യമായ 5 ശതമാനത്തിലേക്ക് എത്തുന്നതിനുള്ള കൃത്യമായ പദ്ധതികൾ കാനഡയുടെ പുതിയ ബജറ്റിൽ ഇല്ലെന്ന് ധനമന്ത്രി ഫ്രാൻസ്വാനി ഫിലിപ്പ് ഷാംപെയ്നെ ഹൂക്‌സ്ട്ര വിമർശിച്ചു. ഇരുരാജ്യങ്ങളും തമ്മിൽ നിലവിൽ കടുത്ത അസ്വാരസ്യങ്ങൾ നിലനിൽക്കുന്നുണ്ടെങ്കിലും, അമേരിക്കൻ താല്പര്യങ്ങൾ സംരക്ഷിക്കുന്നതിൽ താൻ സന്തുഷ്ടനാണെന്ന് പറഞ്ഞാണ് അദ്ദേഹം അഭിമുഖം അവസാനിപ്പിച്ചത്.