വന്ദേമാതരം ആലാപനം തടസ്സപ്പെടുത്തുന്നത് ശിക്ഷാർഹം; കേന്ദ്ര മന്ത്രിസഭയുടെ നിർണ്ണായക അംഗീകാരം

Vande Mataram amendment

ദേശീയ ഗീതമായ വന്ദേമാതരത്തിന് അർഹമായ നിയമപരിരക്ഷ നൽകുന്നതിനായി 1971-ലെ ‘ദേശീയ മഹിമയെ അപമാനിക്കുന്നത് തടയൽ’ (Prevention of Insults to National Honour Act) നിയമത്തിൽ ഭേദഗതി വരുത്താനുള്ള നിർദ്ദേശത്തിന് കേന്ദ്ര മന്ത്രിസഭ അംഗീകാരം നൽകി. ഇതോടെ വന്ദേമാതരം ആലപിക്കുന്നത് മനഃപൂർവ്വം തടസ്സപ്പെടുത്തുന്നത് ശിക്ഷാർഹമായ കുറ്റമായി മാറും. നിലവിൽ ദേശീയ ഗാനമായ ‘ജനഗണമന’യ്ക്ക് ലഭിക്കുന്ന അതേ നിയമപരിരക്ഷ വന്ദേമാതരത്തിനും ഉറപ്പാക്കുകയാണ് ഈ നീക്കത്തിലൂടെ സർക്കാർ ലക്ഷ്യമിടുന്നത്.

പുതിയ നിയമഭേദഗതിയും ശിക്ഷയും:

• അറസ്റ്റും തടവും: വന്ദേമാതരം ആലപിക്കുമ്പോൾ മനഃപൂർവ്വം തടസ്സമുണ്ടാക്കുകയോ അപമാനിക്കുകയോ ചെയ്താൽ മൂന്ന് വർഷം വരെ തടവോ പിഴയോ അല്ലെങ്കിൽ രണ്ടും കൂടിയോ ശിക്ഷയായി ലഭിക്കാം.

• തുല്യ പദവി: ദേശീയ ഗാനത്തെയും ദേശീയ പതാകയെയും ഭരണഘടനയെയും അപമാനിക്കുന്നതിന് നിലവിലുള്ള അതേ ശിക്ഷാ നടപടികൾ ഇനി വന്ദേമാതരത്തിന്റെ കാര്യത്തിലും ബാധകമാകും.

• ആവർത്തിച്ചുള്ള കുറ്റം: നിയമം ലംഘിക്കുന്നത് ആവർത്തിച്ചാൽ കുറഞ്ഞത് ഒരു വർഷത്തെ തടവ് ശിക്ഷ ലഭിക്കുന്ന രീതിയിലാണ് നിയമം പരിഷ്കരിക്കുന്നത്.

വന്ദേമാതരം നിയമഭേദഗതി; പ്രോട്ടോക്കോളും സുപ്രീം കോടതി നിലപാടും.

വന്ദേമാതരത്തിന്റെ 150-ാം വാർഷികാഘോഷങ്ങളുടെ ഭാഗമായി കഴിഞ്ഞ ഫെബ്രുവരിയിൽ കേന്ദ്ര ആഭ്യന്തര മന്ത്രാലയം പുതിയ പ്രോട്ടോക്കോൾ പുറപ്പെടുവിച്ചിരുന്നു. ഇതനുസരിച്ച് ഔദ്യോഗിക ചടങ്ങുകളിൽ വന്ദേമാതരത്തിലെ ആറ് ചരണങ്ങൾ (3 മിനിറ്റ് 10 സെക്കൻഡ്) ആലപിക്കണം. ദേശീയ ഗാനവും ദേശീയ ഗീതവും ഒരുമിച്ച് ആലപിക്കുന്ന ചടങ്ങുകളിൽ വന്ദേമാതരത്തിനാണ് മുൻഗണന നൽകേണ്ടതെന്നും നിർദ്ദേശമുണ്ട്.

സ്കൂളുകളിലും ഔദ്യോഗിക പരിപാടികളിലും വന്ദേമാതരം ആലപിക്കുന്നത് സംബന്ധിച്ച സർക്കുലറിനെതിരായ ഹർജി ഈ വർഷം മാർച്ചിൽ സുപ്രീം കോടതി തള്ളിയിരുന്നു. ഗാനം ആലപിക്കുന്നത് സംബന്ധിച്ച നിർദ്ദേശം നിലവിൽ ഒരു ഉപദേശം (Advisory) മാത്രമാണെന്നും ആലാപനം നിർബന്ധമാക്കാത്ത സാഹചര്യത്തിൽ ഇതിനെതിരെ നൽകിയ ഹർജി അകാലത്തിലുള്ളതാണെന്നും ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് നിരീക്ഷിച്ചിരുന്നു. എന്നാൽ ഇപ്പോൾ ക്യാബിനറ്റ് അംഗീകരിച്ച നിയമഭേദഗതി പാർലമെന്റ് കൂടി പാസാക്കുന്നതോടെ വന്ദേമാതരത്തിന് ശക്തമായ നിയമപരമായ സംരക്ഷണം ലഭിക്കും.