Ontario high school e learning
ടൊറന്റോ: ഒന്റാറിയോ പ്രവിശ്യയിൽ ഹൈസ്കൂൾ പഠനം പൂർത്തിയാക്കുന്നതിന് നിർബന്ധമാക്കിയിരുന്ന ഇ-ലേണിങ് ക്രെഡിറ്റ് പദ്ധതിക്ക് വിദ്യാർത്ഥികളിൽ നിന്ന് കനത്ത തിരിച്ചടി. 2024-ൽ പഠനം പൂർത്തിയാക്കിയ ഭൂരിഭാഗം വിദ്യാർത്ഥികളും ഈ നിർബന്ധിത ഓൺലൈൻ പഠന നിബന്ധന പൂർത്തിയാക്കിയിട്ടില്ലെന്ന് വിദ്യാഭ്യാസ മന്ത്രാലയത്തിന്റെ ഏറ്റവും പുതിയ കണക്കുകൾ വ്യക്തമാക്കുന്നു. 2020-ൽ പ്രാബല്യത്തിൽ വന്ന നിയമപ്രകാരം ഹൈസ്കൂൾ ബിരുദം നേടാൻ വിദ്യാർത്ഥികൾ രണ്ട് ഇ-ലേണിങ് കോഴ്സുകൾ പൂർത്തിയാക്കണമായിരുന്നു. ഈ നിബന്ധന നേരിട്ട ആദ്യ ബാച്ചാണ് ഇപ്പോൾ ഇതിൽ നിന്നും കൂട്ടത്തോടെ പിന്മാറിയിരിക്കുന്നത്.
ലഭ്യമായ കണക്കുകൾ പ്രകാരം 2023-24 ബാച്ചിലെ 1.04 ലക്ഷത്തിലധികം വിദ്യാർത്ഥികൾ ഈ നിബന്ധനയിൽ നിന്ന് ഒഴിവാകുകയോ സ്വമേധയാ പിന്മാറുകയോ ചെയ്തു. അതേസമയം, ഏകദേശം 46,000 വിദ്യാർത്ഥികൾ മാത്രമാണ് ഓൺലൈൻ പഠന ക്രെഡിറ്റുകൾ വിജയകരമായി പൂർത്തിയാക്കിയത്. 18 വയസ്സ് തികഞ്ഞ വിദ്യാർത്ഥികൾക്കോ രക്ഷിതാക്കളുടെ അനുമതിയോടെ പഠിക്കുന്നവർക്കോ ഈ നിബന്ധനയിൽ നിന്ന് ഒഴിവാകാനുള്ള അവസരം സർക്കാർ അനുവദിച്ചിരുന്നു. ഇത് ഉപയോഗപ്പെടുത്തിയാണ് ഭൂരിഭാഗം പേരും പദ്ധതിയിൽ നിന്ന് പിന്മാറിയത്.
ഈ വിഷയം കഴിഞ്ഞ ആഴ്ച ഒന്റാറിയോ നിയമസഭയിൽ ഭരണ-പ്രതിപക്ഷങ്ങൾ തമ്മിൽ കടുത്ത വാദപ്രതിവാദങ്ങൾക്ക് വഴിവെച്ചു. വിദ്യാർത്ഥികൾക്കും രക്ഷിതാക്കൾക്കും അധ്യാപകർക്കും ഈ സംവിധാനം വേണ്ടെന്നതാണ് കണക്കുകൾ തെളിയിക്കുന്നതെന്ന് ലിബറൽ പാർട്ടി എംപിപി റോബ് സെർജാനക് ചൂണ്ടിക്കാട്ടി. വിദ്യാഭ്യാസ ചെലവ് കുറയ്ക്കാനാണ് സർക്കാർ ഡിജിറ്റൽ പഠനത്തെ പ്രോത്സാഹിപ്പിക്കുന്നതെന്നും അദ്ദേഹം ആരോപിച്ചു. എന്നാൽ, വടക്കൻ മേഖലകളിലെ വിദ്യാർത്ഥികൾക്ക് അവരുടെ സ്കൂളുകളിൽ ലഭ്യമല്ലാത്ത കോഴ്സുകൾ പഠിക്കാൻ ഓൺലൈൻ സംവിധാനത്തിലൂടെ സാധിച്ചിട്ടുണ്ടെന്നും, ഓൺലൈൻ പഠനം നിർബന്ധമാക്കുക എന്നതല്ല മറിച്ച് വിദ്യാർത്ഥികൾക്ക് തിരഞ്ഞെടുപ്പിനുള്ള അവസരം നൽകുകയാണ് ലക്ഷ്യമെന്നും വിദ്യാഭ്യാസ മന്ത്രി പോൾ കലാന്ദ്ര പ്രതികരിച്ചു.
2024-25 അധ്യയന വർഷത്തിൽ ഏറ്റവും കൂടുതൽ വിദ്യാർത്ഥികൾ ചേർന്ന ഓൺലൈൻ കോഴ്സ് ‘സിവിക്സ് ആൻഡ് സിറ്റിസൺഷിപ്പ്’ (23,000 പേർ) ആയിരുന്നു. ഇംഗ്ലീഷ്, ഗണിതം, ബയോളജി, കെമിസ്ട്രി തുടങ്ങിയ വിഷയങ്ങൾക്കും ആയിരക്കണക്കിന് വിദ്യാർത്ഥികൾ രജിസ്റ്റർ ചെയ്തിട്ടുണ്ട്. എങ്കിലും, ലഭ്യമായ തിരഞ്ഞെടുപ്പുകളിൽ വിദ്യാർത്ഥികൾക്ക് സ്വാതന്ത്ര്യം നൽകിയാൽ അവർ ഓൺലൈൻ പഠനം തിരഞ്ഞെടുക്കുന്നില്ലെന്നാണ് കണക്കുകൾ വ്യക്തമാക്കുന്നതെന്ന് ഈ രംഗത്തെ ഗവേഷക ബെയ്ഹാൻ ഫർഹാദി പറഞ്ഞു. നിലവിൽ, ഹൈസ്കൂൾ വിദ്യാർത്ഥികൾക്കുള്ള ഈ നിർബന്ധിത ഇ-ലേണിങ് ക്രെഡിറ്റ് സംവിധാനം അവസാനിപ്പിക്കണമെന്ന് ആവശ്യപ്പെട്ട് ലിബറൽ പാർട്ടി ഇടക്കാല നേതാവ് ജോൺ ഫ്രേസർ നിയമസഭയിൽ സ്വകാര്യ പ്രമേയം അവതരിപ്പിച്ചിട്ടുണ്ട്.
