Doug Ford private jet controversy Ontario
ടൊറന്റോ: കാനഡയിലെ ഒന്റാരിയോ പ്രവിശ്യാ പാർലമെന്റിൽ പ്രീമിയർ ഡഗ് ഫോർഡിന് നേരെ പ്രതിപക്ഷത്തിന്റെ രസകരമായ പ്രതിഷേധം. വൻ തുക മുടക്കി സ്വകാര്യ ജെറ്റ് വിമാനം വാങ്ങിയതുമായി ബന്ധപ്പെട്ട വിവാദങ്ങൾക്ക് പിന്നാലെയാണ് ഇടക്കാല ലിബറൽ പാർട്ടി നേതാവ് ജോൺ ഫ്രേസർ പ്രീമിയർക്ക് ഒരു ‘പ്രത്യേക സമ്മാനം’ നൽകിയത്. പൈലറ്റുമാർ സാധാരണയായി കോട്ടിന്റെ കോളറിൽ കുത്തുന്ന, ‘ഫ്യൂച്ചർ പൈലറ്റ്’ എന്ന് രേഖപ്പെടുത്തിയ മെറ്റൽ വിങ്സ് ബാഡ്ജ് ആണ് അദ്ദേഹം ഡഗ് ഫോർഡിന് സമ്മാനിച്ചത്.
READ NEWS:പ്രീമിയർ ഡഗ് ഫോർഡിന്റെ ലക്ഷ്വറി ജെറ്റ് വിവാദം: ഖജനാവിന് 2 ലക്ഷം ഡോളറിന്റെ അധിക ബാധ്യത
ഏകദേശം 28.9 മില്യൺ ഡോളർ വിലമതിക്കുന്ന ‘ചലഞ്ചർ 650’ എന്ന ആഡംബര സ്വകാര്യ ജെറ്റ് വിമാനം പ്രീമിയർ വാങ്ങിയതാണ് വിവാദങ്ങൾക്ക് വഴിവെച്ചത്. നികുതിപ്പണം കൃത്യമായി വിനിയോഗിക്കുമെന്ന് പ്രഖ്യാപിച്ച് അധികാരത്തിലേറിയ ഭരണകൂടത്തിന്റെ ഈ നടപടി ജനങ്ങൾക്കിടയിലും കടുത്ത അതൃപ്തിക്ക് കാരണമായിരുന്നു. പ്രതിഷേധം ശക്തമായതോടെ ദിവസങ്ങൾക്കകം തന്നെ വിമാനം നിർമ്മാതാക്കൾക്ക് തന്നെ തിരികെ വിൽക്കാൻ സർക്കാർ നിർബന്ധിതരായി. എന്നാൽ ഇതിനോടകം തന്നെ വിമാനത്തിന്റെ അറ്റകുറ്റപ്പണികൾക്കും പാർക്കിംഗിനുമായി 190,000 ഡോളറോളം നികുതിപ്പണം ചിലവഴിച്ചിരുന്നു.
പാർലമെന്റിന്റെ സമ്മേളനം അവസാനിക്കുന്ന വേളയിലാണ് നാടകീയമായ ഈ സമ്മാന കൈമാറ്റം നടന്നത്. ഇതൊരു സാധാരണ തമാശയല്ലെന്നും, സാധാരണക്കാർ സാമ്പത്തിക പ്രതിസന്ധിയിലൂടെ കടന്നുപോകുമ്പോൾ ഭരണാധികാരി ആഡംബര ജെറ്റ് വാങ്ങിയതിനെതിരെയുള്ള ശക്തമായ ഓർമ്മപ്പെടുത്തലാണെന്നും ജോൺ ഫ്രേസർ പറഞ്ഞു. സമ്മാനം സ്വീകരിച്ച ഡഗ് ഫോർഡ് അല്പം രൂക്ഷമായ ഭാഷയിലാണ് പ്രതികരിച്ചതെന്നും അദ്ദേഹം കൂട്ടിച്ചേർത്തു. നേരത്തെ 2024 ഏപ്രിലിലും പ്രീമിയറുടെ ഓഫീസിലെ അമിത ജീവനക്കാരുടെ ചിലവുകളെ പരിഹസിച്ച് പ്രതിപക്ഷം പാർലമെന്റിൽ പ്രതിഷേധിച്ചിരുന്നു.
