ലണ്ടൻ: വെസ്റ്റേൺ യൂണിവേഴ്സിറ്റിക്ക് സമീപമുള്ള വെസ്റ്റേൺ റോഡ് – ഫിലിപ്പ് അസീസ് അവന്യൂ ജംഗ്ഷനിൽ വൻതോതിലുള്ള അടിസ്ഥാന സൗകര്യ വികസനത്തിന് ലണ്ടൻ മുനിസിപ്പൽ അധികൃതർ തുടക്കം കുറിക്കുന്നു. കാൽനടയാത്രക്കാർക്കും വാഹനയാത്രക്കാർക്കും സുരക്ഷിതമായ യാത്രാസൗകര്യം ഉറപ്പാക്കുന്നതിനായി വിഭാവനം ചെയ്ത ഈ പദ്ധതിയുടെ നിർമ്മാണ പ്രവർത്തനങ്ങൾ 2026 മേയ് മാസത്തിൽ ആരംഭിക്കും.
വെസ്റ്റേൺ യൂണിവേഴ്സിറ്റിയിലേക്കും സമീപത്തെ മലയാളി വിദ്യാർത്ഥികൾ ഉൾപ്പെടെയുള്ളവർ താമസിക്കുന്ന റെസിഡൻഷ്യൽ മേഖലകളിലേക്കും എളുപ്പത്തിൽ പ്രവേശനം ഉറപ്പാക്കുന്നതാണ് പുതിയ നവീകരണ പ്രവർത്തനങ്ങൾ. പദ്ധതിയുടെ ഭാഗമായി വിശാലമായ കാൽനട ക്രോസിംഗുകൾ സജ്ജമാക്കുന്നതിനൊപ്പം, കാൽനടയാത്രക്കാർക്ക് മുൻഗണന നൽകുന്ന ‘ഹെഡ്-സ്റ്റാർട്ട്’ സിഗ്നൽ സംവിധാനവും ഏർപ്പെടുത്തും. ഫിലിപ്പ് അസീസ് അവന്യൂവിൽ പുതിയ സിഡ്വാക്കുകൾ നിർമ്മിക്കുന്നതോടെ സ്റ്റേഡിയത്തിലേക്കും മറ്റുമുള്ള പ്രവേശനം കൂടുതൽ സുഗമമാകും.
യാത്രാ സൗകര്യങ്ങൾക്ക് പുറമെ മേഖലയിലെ ഭൂഗർഭ പൈപ്പ് ലൈനുകളുടെയും അഴുക്കുചാലുകളുടെയും ആധുനികവൽക്കരണവും ഈ പദ്ധതിയിൽ ഉൾപ്പെടുത്തിയിട്ടുണ്ട്. സൈക്കിൾ യാത്രക്കാർക്കായി പ്രത്യേക ഇൻ-ബൊളിവാർഡ് ലൈനുകൾ നിർമ്മിക്കുന്നതിലൂടെ ട്രാഫിക് തടസ്സങ്ങൾ കുറയ്ക്കാനും സുരക്ഷിതമായ യാത്രാ സാഹചര്യം ഒരുക്കാനും നഗരസഭ ലക്ഷ്യമിടുന്നു. നിലവിൽ ഈ മേഖലയിൽ അനുഭവപ്പെടുന്ന ഗതാഗതക്കുരുക്കിന് പുതിയ ഇന്റർസെക്ഷൻ ലേഔട്ടുകൾ പരിഹാരമാകുമെന്ന് പ്രതീക്ഷിക്കുന്നു.
പദ്ധതിയെക്കുറിച്ച് പൊതുജനങ്ങൾക്ക് കൂടുതൽ വിവരങ്ങൾ അറിയുന്നതിനും അഭിപ്രായങ്ങൾ രേഖപ്പെടുത്തുന്നതിനുമായി ഏപ്രിൽ 28-ന് പൊതുയോഗം സംഘടിപ്പിച്ചിട്ടുണ്ട്. വൈകുന്നേരം 5 മണി മുതൽ 7 മണി വരെ സെന്റ് തോമസ് മോർ കാത്തലിക് സ്കൂളിലാണ് ( St. Thomas More Catholic School, 18 Wychwood Park, London, ON ) യോഗം നടക്കുക. ലണ്ടനിലെ മലയാളി സമൂഹം, പ്രത്യേകിച്ച് യൂണിവേഴ്സിറ്റി മേഖലയുമായി ബന്ധപ്പെട്ട് പ്രവർത്തിക്കുന്നവർ, ഈ യോഗത്തിൽ പങ്കെടുത്ത് നിർദ്ദേശങ്ങൾ സമർപ്പിക്കുന്നത് ഉചിതമായിരിക്കും.
